Read Batak Dairi 3 Musa 21 Bible Online

3 Musa 21 - Batak Dairi bible

3 Musa 21

¹Idokken JAHOWA mo si Musa pesakatken perèntah ènda taba imam-imam pinempar si Aron, “Sada kalak imam mak ndorok mengelamuni dirina sendiri kumerna dekket mengadeppi ulaen mengkubur kadè-kadèna,

²laènken mula simatè idi inangna, bapana, dukakna, dengan sibeltekna

³barang turangna sioda dèng sijahè, janah rebbak sada bages deketsa.

⁴Oda ndorok ia mengelamuni dirinna merkitè mengadeppi ulaen mengkuburken sincelket sinibagesna.

⁵Sada kalak imam oda ndorok mencukkur dèba buk sini takalna janah mak ndorok mengkiskis janggutna barang pè mengugahi dagingna dekket barang kadè sintajem lako menuduhken mersindanggel ia.

⁶MilikKu sinikelini ngo ia janah oda ndorok merkemmer ibaing gerarKu. Pèlènkenna ngo pèlèen pangaen bangKu, jadi kennah mbadia ngo ia.

⁷Sada kalak imam oda ndorok kabin dekket sada kalak daberru luhlah barang sada kalak siso gadi, barang daberru sienggo nung sirang, kumerna milikKu ngo imam.

⁸Kennah iakui bangsa Israel ngo ukum imam imo kalak sinikelini tabaKu kumerna ia ngo memèlèken pèlèen pangaen taba Aku. Aku ngo JAHOWA; Simbadia ngo Aku janah Kuperbadiai ngo bangsangKu.

⁹Mula gabè daberru luhlah berru ni sada kalak imam, mengelèai bapana ngo ia jadi kennah itutung ia soh matè.

¹⁰Enggo mo ipebangkit Imam Huntuen merkitè mengarirken minak mi babo takalna dekket merkitè memakèken pakèen imam huntuen tabasa. Kumernana i mak ndorok ibelli sursar bukna, barang pè mengeribak olesna sikira tanda bonek atè.

¹¹Enggo mo ia ipèlèken taba aku lako mahan milikKu, jadi mak ndorok ia mengelamuni dirina. Oda ndorok ma ia mengelamuni Undung-undungKu merkitè karuar i sidi nai lako mbengket mi bages sin bangkè, agia pè idi bangkè bapana barang bangkè inangna sendiri.

¹³Pellin taba sada kalak simerbaju gadi ibas bangsana nai ngo kessa ndorok ia memuat berru. Oda ndorok ia kabin dekket sada kalak simbalu barang pè dekket sada kalak daberru sienggo pennah isirangken dèba, barang pè dekket sakalak daberru sibabijalang.

¹⁵Mula ilausi hatoren i, karina dukak-dukakna aturen mbadia kin nemmuken, gabè melamun ngo. Aku ngo JAHOWA janah enggo Kukelini ia gabè Imam Huntuen.”

¹⁶Idokken JAHOWA mo si Musa

¹⁷lako mendokken bagèen bai si Aron, “Mula lot pinemparmu mertikas oda ndorok ia memèlèken pèlèen sipanganen taba Aku. Merdalan ngo hatoren i soh mi sidekkah-dekkahna.

¹⁸Kalak simemèlèken pèlèen mak ndorok mertikas dagingna, imo ka- lak pètung barang pangpangen, kalak simertikas abèna barang sendihi dagingna,

¹⁹kalak simatè serrap tanganna barang kèpang nènèhna,

²⁰kalak mukung barang pè kalak rennek, kalak sipaloen barang pè sipuruen dekket kalak sinikasing.

²¹Karina pinempar si Aron simertikas dagingna oda ndorok memèlèken pèlèen sipanganen bangKu.

²²Tapi ndorok ngo ia kipangan pangaen sinipèlèken, bang pè idi pèlèen sipanganen simbadia barang pè pèlèen sipanganen simbadia kaloen.

²³Kumerna mertikas ngo daging kalak i, oda ndorok ia menjolmiti kirè-kirè simengkelang-kelangi Bilik Simbadia barang pè langgaten. Oda ndorok ia mengelamuni barang kadè sienggo ihujuken lako baKu, kumerna Aku ngo JAHOWA, janah Aku ngo simengkelini barang-barang idi.”

²⁴Idi mo hatoren-hatoren sinipesakat si Musa bai si Aron bak dukak-dukakna dekket bai karina bangsa Israel.