Read Batak Dairi 3 Musa 23 Bible Online

3 Musa 23 - Batak Dairi bible

3 Musa 23

¹Iberèken JAHOWA mo bai si Musa

²hatoren-hatoren tersèngèt pèsta agama, sikennah imongmongken gabè ari pèsta lako memoji Dèbata.

³Lot ngo ennem ari lako mahan bahaen, tapi ari pepituken, ari Sabat, imo ari pentadien sienggo merkedekoen bai JAHOWA. Tupung ari i kennah merpulung ngo kènè lako memoji JAHOWA janah oda ndorok mengula.

⁴En mo ari-ari mbellen sienggo itetapken JAHOWA janah kennah imongmongken i katika sienggo itentuken.

⁵Ari Pèsta Paskah sinipèstaken lako pesangapken JAHOWA, itubenai tikan enggo kessa sundut mataniari, ari sipuluh empat bulan sada.

⁶Sibarembenkenna, ari sipuluh lima, itubenai mo Pèsta Roti siso Meragi, janah sidekkah pitu ari oda ndorok kènè kipangan roti sinibahan merdengan ragi.

⁷Sidekkah pitu ari idi, kennah memèlèken pèlèen pangaen bai JAHOWA ngo kènè. I ari perlebbè dekket ari pepituken pèsta i kennah memaing perpulungen ngo kènè lako memoji JAHOWA janah mak ndorok mengulaken ulaen mberrat.

⁹Mula enggo kessa sakat kènè mi nagerri siniberèken JAHOWA taba kènè, janah pepulungken hasil tanoh i, buah pagè siperlebbè iperani kènè kennah embahen ndènè taba imam.

¹¹Tupung ari enggo kessa Sabat, kennah ipèlèken imam ngo pagè i sikira pèlèen hujuen bai JAHOWA, asa sennang atè JAHOWA bai ndènè.

¹²Ibas ari memèlèken pagè i kènè, kennah pèlènken ndènè ma mo pèlèen situtungen sada anak biri-biri tonggal merumur sada tahun janah oda mertikas.

¹³Mahan pèlèen sipanganen pèlèken mo dua kilo nditak sinisakkor dekket minak Zaitun. Bau pelèen idi pesennangken atè JAHOWA. Rasken dekket idi pèlèken ma mo sada sellup laè anggur.

¹⁴Sinderrang mak dèng merembah pèlèen idi bai JAHOWA, situk pè oda ndorok panganen ndènè ibas pagè rimbaru idi nai, agia matah, isaok barang pè ibahan gabè roti. Kennah iuèi karina pinemparmu ngo hatoren i soh mi amman sumendah.

¹⁵Memungkah ari enggo kessa ari Sabat nai, tikan memèlèlèken ukup pagè perlebbè kènè bai JAHOWA, kennah ètong kènè dom pitu minggu.

¹⁶Tupung ari pelimapuluhken, imo ari enggo kessa Sabat pepituken, kennah embahen ndènè pèlèen hantaren bai JAHOWA.

¹⁷Gennep jabu kennah memèlèken dua roti mahan pèlèen hujuen bai JAHOWA. Gennep roti kennah ibahan ibas dua kilo nditak melèmet nai merdengan ragi janah kennah ipesakat bai JAHOWA sikira pèlèen hasil pertemenaen i juma nai.

¹⁸Rebbak dekket roti i kennah ipèlèken bangsa Israel ngo pitu anak biri-biri merumur sitahun, sada lembu tonggal bajar dekket dua kambing. Karina idi oda ndorok mertikas janah kennah ipèlèken mahan pèlèen situtungen bai JAHOWA, rebbak dekket pèlèen hantaren dekket pèlèen laè anggur. Sennang mo atè JAHOWA menganggoh huap baungkus pèlèen idi.

¹⁹Pèlèken ma mo sada kambing tonggal mahan pèlèen kesasaen dosa dekket dua biri-biri tonggal merumur sitahun mahan pèlèen perdamèen.

²⁰Roti dekket anak biri-biri sidua idi kennah imam ngo memèlèken mahan pèlèen hujuen bai JAHOWA, janah i mo jambar imam. Badia ngo karina pèlèen idi.

²¹Ibas arinkenna i kennah merpulung ngo kènè lako memoji JAHOWA janah oda ndorok mengulaken bahan mberrat. Kennah iuèi pinempar ndènè ngo hatoren idi soh mi sidekkah-dekkahna, barang idikè kalak i merian.

²²Mula merani kènè, ulang mo pella potik pagè situbuh i biding-biding juma ndènè i, janah ulang pella olihi nèngè lako pepulungken pagè sitadingna enggo kessa pul peranien. Belli mo idi bai kalak sincor dekket kalak sidèban. JAHOWA ngo Dèbata ndènè.

²³Ari sada bulan pitu kennah ipèstaken sikira ari merkedekoen lako mengadi. Ipersora mo sarunè petandaken ari idi, janah kennah mertumpu ngo kènè lako memoji JAHOWA.

²⁵Pèlèken kènè mo pèlèen sipanganen bai JAHOWA janah ulang mengulaken bahaen mberrat tupung ari idi.

²⁶Ari sipuluh bulan pitu imo ari kerja tahun pengampunen dosa bangsa Israel. Kennah puasa ngo kènè i sidarinkenna i janah maing perpulungen lako memoji JAHOWA ninganna memèlèken pèlèen sipanganen bai JAHOWA.

²⁸Ulang kè mengula i si, kumerna ari pengampunen dosa ngo ari i, asa terolih kesasaen dosa kènè i hadeppen JAHOWA Dèbata ndènè.

²⁹Barang isè kipangan barang kadè tupung arinkenna idi, oda ètongen ne ia bangsa Dèbata.

³⁰Janah barang isè mahan bahaen arinkenna i, matè ihukum JAHOWA mo ia.

³¹Hatoren i merlakku bai karina pinempar ndènè barang i dikè sambing kalak idi merian.

³²Mulai sundut mataniari nai i ari sibah bulan idi soh sundut mataniari i ari sipuluh, kennah pèstanken ndènè bagè ari Sabat, ari merkedekoen mahan pentadien. Kennah puasa kènè sidarinkenna i.

³³Pèsta sapo-sapo bulung itebenai i ari sipuluh lima bulan pitu janah dekkahna pitu ari.

³⁵Sidekkah pitu ari idi gennep ari kènè kennah memèlèken pèlèen sipanganen. I ari perlebbè dekket ari peualuhken kennah maing perpulungen ngo kènè lako mamoji JAHOWA ninganna memèlèken pèlèen pangaen bai JAHOWA. Ulang mo mahan bahaen mberrat i sidarinkenna i.

³⁷Idi mo ari-ari Pèsta agama sinitetapken JAHOWA janah kennah mongmongenken ndènè. Ibas pèsta-pèsta idi kennah pesa- ngapen ndènè ngo JAHOWA merkitè maing perpulungen lako memoji JAHOWA janah memèlèken pèlèen sipanganen, pèlèen situtungen, pèlèen hantaren, pèlèen pinakan dekket pèlèen laè anggur, rembang mi perluna gennep ari.

³⁸Pèsta-pèsta idi imo gabè tambahna mi ari-ari Sabat biasa, jadi pèlèen-pèlèen idi pè tambahna ma ngo mi pemerèken ndènè sienggo ncemmal kin, ibas pèlèen ndènè lako menggarar niat, barang pè pèlèen sitergerrek ibas ukur siniberèken ndènè bai JAHOWA.

³⁹Kessa dung peranien, memungkah ari sipuluh lima bulan pitu, kennah merpèsta ngo kènè pitu ari dekkahna. Ari perlebbè dekket ari peualuhken imo ari simerkedekoen bekkas mentadi.

⁴⁰I ari perlebbè kennah potik kènè mo buah simerandalna kalohon i pekken ndènè nai, bagi ma dekket bulung-bulung palma dekket ranting-ranting kayu ntemtem bulungna, nai tebenai kènè mo pèsta oang-oang lako pesangapken JAHOWA Dèbata ndènè.

⁴¹Kennah merpèsta ngo kènè sidekkah pitu ari. Kennah iulaken pinempar ndènè ngo hatoren idi soh sidekkah-dekkahna.

⁴²Pitu ari dekkahna karina bangsa Israel kennah merian ibas sapo-sapo bulung,

⁴³asa ibettoh pinempar ndènè magahken isuruh JAHOWA ngo bangsa Israel merian ibas sapo-sapo, tikanNa iarak kalak i mbungkas i Mesir nai. Ia ngo JAHOWA Dèbata ndènè.

⁴⁴Bagidi mo cara si Musa pesakatken bai bangsa Israel hatoren-hatoren tersèngèt bakunè carana mahanken pèsta-pèsta lako pesangapken JAHOWA.