Read Batak Dairi 3 Musa 24 Bible Online

3 Musa 24 - Batak Dairi bible

3 Musa 24

¹Idokken JAHOWA mo si Musa

²pesakatken hatoren-hatoren ènda bai bangsa Israel. Embah mo minak Zaitun tulèn janah simendèna kalohon mahan minak lampu i Undung-undung JAHOWA, asa ndorok ilakati, janah ibelli lakat.

³Kennah iatur si Aron ngo lampu-lampu idi mulai cibon nai soh mi siceggen i bekkas pekiroh JAHOWA, i ruar kirè-kirè simenutupi Pèti Perpadanen i Bilik Simbadia kalohon. Kennah ulaenken ngo hatoren idi soh sidekkah-dekkahna.

⁴Kennah iurus si Aron ngo lampu-lampu sini nèhè lampu emmas tulèn i asa dak tong lakat i Undung-undung JAHOWA.

⁵Buat mo sipuluh dua kilo nditak simerandalna kalohon janah bahan mo sipuluh dua roti cengko, gennep roti sakilo nditak.

⁶Cibalken mo roti i dua mpulguken, ennem roti gennep mpulguken, i babo meja simerlampis emmas tulèn silot i Undung-undung JAHOWA.

⁷Bakin mo kemenjen tulèn i gennep pulguken roti i lako petandaken roti idi pèlèen sipanganen bai JAHOWA.

⁸Gennep ari Sabat kennah lot roti sinipehantar ibas Undung-undung JAHOWA. Idi mo patut ulaenken bangsa Israel soh mi sidekkah-dekkahna.

⁹Bai si Aron dekket pinemparna mo roti i. Kennah ipan kalak i ngo idi i bekkas simbadia, kumerna merumangken simbadia kalohon ngo roti idi ibas pèlèen pangaen sinipèlèken bai JAHOWA mahan perjambaren imam.

¹⁰Ibas perundung-undungen kalak Israel lot ngo sada kalak anak laki. Kalak Mesir ngo bapana janah inangna kalak Israel mergerar Selomit, dukak si Dibri marga Dan. Ibas sidari merubat mo kalak i dekket sada kalak Israel i perundung-undungen. Tikan merubat i, isumpahi mo Dèbata. Kumernana i iembah kalak Israel mo ia menghadep taba si Musa,

¹²janah itagangi ngo ia ninganna memèma keputusen JAHOWA tersèngèt barang bakunè sibakinen kalak i tabasa.

¹³Nina JAHOWA mo taba si Musa,

¹⁴“Embah mo kalak i mi ruar perundung-undungen. Karina kalak sienggo mendengkoh ia menumpahi, kennah iampèken tanganna i babo takal kalak i lako memerèken kesaksien magahken mersalah ia. Nai karina mo bangsa i kennah mengkebekki ia dekket batu asa matè.

¹⁵Enggo kessa i mongmongken mo èn bai bangsa Israel: Barang isè menumpahi Dèbata kennah ijalo akibatna,

¹⁶janah ihukum matè. Barang isè sambing menumpahi JAHOWA kennah ikebbekki karina sinterrem dekket batu asa matè. Hukum sibagidi merlakku bai kalak Israel dekket bai kalak sidèban sienggo merian i Israel.

¹⁷Barang isè memunuh denganna sidèban kennah ihukum matè.

¹⁸Barang ise kipateken pinakan kalak sideban kennah igancihi. Henjellenna imo, ‘kessah gancih kessah.’

¹⁹Mula lot sada kalak memaing rèpak dengnganna kennah bakinen tabasa bagè pemaingna i.

²⁰Mula ibohok tulan, ia pè kennah bohoken ma mo tulanna. Mula pètung serrap mata ndèba ibakin, matana pè kennah ipelsut ma mo serrap. Mula ipalu kalak sanga mpupu èpenna, kennah ipupu ma mo èpenna. Barang bakunè sambing pemaingna sanga mertikas kalak, kennah bagidi ma ngo bakinen mendahisa mahan balesna.

²¹Barang isè mematèken pinakan kennah gancihenna, tapi barang isè memunuh jelma kennah ihukum matè.

²²Hukum idi merlakku bai ndènè karina bagi ma bai kalak sidèban pè sienggo merian rebbak dekket kènè, kumerna Aku ngo JAHOWA, Dèbata ndènè.”

²³Enggo kessa ipesakat si Musa ranana idi bai bangsa Israel, iembah kalak idi mo kalak sienggo menumpahi Dèbata idi mi ruar kuta, nai ikebbekki mo ia dekket batu soh matè. Merkitè bagidi enggo iulaken bangsa Israel sienggo iperèntahken JAHOWA bai si Musa.