Read Batak Dairi 3 Musa 25 Bible Online

3 Musa 25 - Batak Dairi bible

3 Musa 25

¹Nai mengerana mo JAHOWA dekket si Musa i babo delleng Sinai janah mendokken tabasa

²pesakatken hatoren-hatoren ènda bai bangsa Israel. Mula mbengket kessa kènè mi nagerri sinaing berènken JAHOWA bai ndènè, kennah pesangapen ndènè ngo JAHOWA merkiè bagèen: Gennep tahun pepituken mak ndorok kènè mengula juma lako suanen.

³Sidekkah ennem tahun mo kènè kennah menuani juma ndènè, menggasi pek- ken anggur ndènè dekket pepulungken hasil juma ndènè.

⁴Tapi gennep tahun pepituken merkedekoen ngo i bai JAHOWA. Asa sidekkah sitahun i kennah ibelli mo bagi juma janah oda ndorok iula. Ulang isuani juma janah ulang icalangi anggur ndènè.

⁵Salang pagè siturah bagi sambing barang anggur siso icalangi, mak ndorok pepulungen dekket peneppen ndènè, kumerna tahun pentadien ngo tahun idi bai tanoh i.

⁶Tapi bang pè bagidi, tong ngo berènken tanoh idi hasilna lako mahan pangaen ndènè, hamba-hamba ndènè, kalak sigajien ndènè, dekket kalak siroh merian rebbak dekket kènè.

⁷Bagi ma dekket bai pinakan-pinakan ndènè dekket bai binatang meriar silot i nagerri ndènè. Karina sinihasilken tanoh idi ndorok ipangan.

⁸Etong mo pitu kali pitu tahun, buèna empatpuluh sibah tahun.

⁹Nai tupung ari si- puluh bulan pitu, imo ari pengampunen dosa, dokken mo sinterrem menempul sarunè i karina bekkas silot i nagerri èn.

¹⁰Kennah merkedekoen ngo baing kènè tahun pelimapuluhken idi janah kimongmongken tahun keluahen bai karina jelma pengisi nagerri i. Ibas tahun idi karina harta milik sienggo idèa kennah olihenken balik bai sidasa kin barang bai pinemparna. Barang isè sienggo idèa gabè hamba kennah iolihken balik taba kadè-kadèna.

¹¹Ulang mo suani kene juma ndènè. Pagè situbuh bagidi sambing barang buah anggur sinipekken anggurmu siso icalangi oda ndorok ipepulung janah ipennep.

¹²Ai tahun simbadia ngo tahun idi bai ndènè. Pellin kipangan kadè siturah bagi sambing ibas juma ndènè mo kessa kènè ndorok.

¹³Tupung tahunkenna idi karina tanoh sienggo idèa kennah iolihken bai sidasa kin.

¹⁴Jadi mula lot tanoh sinidèa ndènè bai samah-samah kènè kalak Israel, barang menokor tanoh bana nai, ulang mo mak sènteng baing kènè menokor bak merdèa.

¹⁵Kennah itentuken ngo harga tanoh i mengèkutken buè tahun sidekkah ndorok memerèken hasil tanoh i soh mi Tahun Mengolihken sinaing roh nola.

¹⁶Mula mbuè bilangen tahunna, mahal mo arga tanoh i. Tapi mula cituk ngo bilangen tahunna, kennah murah ngo hargana, kumerna sinidèana, imo buè siniperani.

¹⁷Ulang mo mersitipuen samah kènè kalak Israel, tapi naing mo nemmuken merkebiaren kènè midah JAHOWA, Dèbata ndènè.

¹⁸Uèi mo karina pati-patiin dekket pe- rèntah JAHOWA, asa sennang kènè nggelluh i nagerri i.

¹⁹Berènken tanoh nagerri idi mo hasilna asa lot cukup panganen ndènè janah merian kènè i sidi oda kurangen kadè.

²⁰Tapi tah lot mengkuso kadè nola mo pangaen sidekkah tahun pepituken tupung oda nisuanen juma janah hasilna pè oda buaten.

²¹I tahun pe-enemken ipasu-pasu JAHOWA mo tanoh gabè bias mo hasilna i soh mi tellu tahun.

²²Janah tikan menuani juma ndènè kènè i tahun peualuhken, hasil peranien i tahun peenemken i tong dèng lot mahan pangaen ndènè. Salang pangaen sinipennep ndènè idi kennah bias dèng soh dapet nola katikana kènè lako pepulungken hasil tahun idi.

²³Oda ndorok idèa tanoh ndènè soh mi sidekkahna, kumerna oda milikmu tanoh idi, tapi Dèbata ngo sidasa. Pellin bagè kalak pendampin ngo kènè simenjalo izin lako memakè tanoh idi.

²⁴Mula idèa sinterpuk juma, kennah iakui ngo hak ni sidasa kin lako menebbus tanoh i.

²⁵Mula lot sada kalak Israel gabè ncor, gabè terpaksa kennah idèa tanohna, kadè-kadèna sincelketna kalohon mo kennah menebbus tanoh idi.

²⁶Mula oda lot kalak simenebbus tapi daoh-daoh arien nola sidasa tanoh idi kin gabè sanggup nola janah lot kèpèngna bias lako menebbus tanohna i,

²⁷nai kennah igarar mo bai kalak sienggo menokor tanohna idi nasa harga hasil tanoh idi sidekkah tahun-tahun siroh nola soh mi Tahun Me- ngolihken sinaing roh nola. Merkitè bagidi mo balik tanoh milikna i.

²⁸Tapi mula oda ia tellap menebbus tanohna i, kalak simenokor i ngo tong merkuasa i tanoh idi soh mi Tahun Mengolihken sinaing roh nola. Ibas tahun idi kennah iolihken ngo tanoh i bai sidasa kin.

²⁹Mula lot kalak merdèa sada bages ipas kuta merparik, merhak ngo ia menebbus bagesna idi ibagasen sitahun memungkah i ari perdèaenna idi nai.

³⁰Tapi mula oda itebbus bages idi ibagasen sitahun, bennè mono hakna lako menebbus. Tong mo hot bages i milik sipenokor i barang pinemparna. I Tahun Mengolihken, oda olihenkenna bages idi.

³¹Ukum bages i kuta siso ikulilingi parik, merdalan ngo hatoren bagè hatoren tersèngèt tanoh: sidasa kin merhak menebbus janah kennah iolihken bages idi tupung tahun mengolihken.

³²Tapi ukum kalak Lepi merhak ngo menebbus barang ndigan sambing harta milik kalak i ibas kuta sienggo itentuken bai kalak idi.

³³Mula lot kalak Lewi merdèa bagesna ibas sada kuta i janah oda itebbus, kennah iolihken ngo bages i bana tupung tahun mengolihken. Kumerna bages kalak Lewi i gennep kuta kalak i imo milik kalak i menettap i tengah-tengah bangsa Israel.

³⁴Tapi ukum rambah i gembar kuta kalak Lewi oda ndorok idèa. Kalak Lewi ngo sidasa idi soh sidekkah-dekkahna.

³⁵Mula lot kalak ibas bangsa ndènè nai simerian i tengah-tengah ndènè gabè ncor janah mak nèngè tuk kenggeluhenna, kennah urupen ndènè ngo ia bagè kalak pendampin barang kalak sidèban, asa tong nggelluh ia i tengah-tengah ndènè.

³⁶Ulang mo pella tunggu kènè bunga barang kadè sinipejual ndènè tabasa, tapi naing mo merkebiaren kènè midah Dèbata ndènè, janah belli mo kalak i nggelluh i tengah-tengah ndènè. Ulang ma memuat laba kènè ibas pangaen sinidèa ndènè tabasa.

³⁷

³⁸Idi mo perèntah JAHOWA Dèbata ndènè sienggo mengarak kènè mbungkas i Mesir nai lako memerèken nagerri Kanaan bai ndènè, asa Ia gabè Dèbata ndènè.

³⁹Mula lot kalak dengan sada bangsa ndènè simerian rebbak dekket kènè gabè ncor dungna idèa dirina mahan hamba ndènè, oda ndorok pasulakken ndènè ia mengulaken bahaen sada kalak hamba.

⁴⁰Kennah rebbak kènè ngo ia sikira gajien janah mengula ia rebbak dekket kènè soh mi tahun mengolihken.

⁴¹Tupung tahun idi ndorok mo ia dekket dukak-dukakna menadingken bages ndènè janah balik mendahi kadè-kadèna dekket mi lebbuh empungna.

⁴²Naposo JAHOWA ngo kalak Israel; Ia ngo mengarak kalak i mbungkas i Mesir nai, janah kumernana i oda ndorok kalak i idèa gabè hamba.

⁴³Asa kalak Israel simerdèa dirina bai ndènè mak ndorok bakinen ndènè siso puna-puna tabasa. Kennah merkebiaren ngo kènè midah Dèbata ndènè.

⁴⁴Mula perlu bai ndènè hamba, ndorok ngo tokor kènè bai bangsa-bangsa silot i sikuliling ndènè nai.

⁴⁵Ndorok ma ngo tokoren ndènè dukak-dukak kalak sidèban sienggo merian i tengah-tengah ndènè. Dukak-dukak kalak sidèban situbuh i nagerri ndènè ndorok ngo i gabè milik ndènè —

⁴⁶janah ndorok ma ngo warisenken ndènè bai dukak-dukak ndènè asa mahan hamba kalak i ia sidekkah nggelluhna. Tapi ukum samah kènè kalak Israel oda ndorok kasar bakinen ndènè.

⁴⁷Mula lot kalak sidèban simerian i tengah-tengah ndènè gabè bèak, janah lot samah kènè kalak Israel gabè ncor, gabè idèaken dirina gabè hamba bai kalak sidèban i barang bai sincelketna,

⁴⁸tong ngo lot hak kalak Israel idi lako itebbus. Sada kalak ibas dengan sibeltekna nai

⁴⁹barang tongana, barang denganna sibeltek bapa barang isè ibas sincelketna nai, ndorok ngo menbbussa. Barang ia sendiri nola mula enggo sanggup, ndorok ngo ia menebbus dirina.

⁵⁰Kennah merarih ngo hamba idi dekket kalak sienggo menokorsa. Kennah iètong kalak i ngo buè tahun kessa nai idèa dirina gabè hamba soh mi Tahun Mengolihken sinaing roh nola, ninganna menentuken harga penebbusna. Kennah itentuken ngo harga idi mengèkutken perètongen upah siniberèken bai kalak sigajin.

⁵¹Kennah igarar hamba idi ngo harga penokor dirina nasa belgah upah sada kalak sigajin sidekkah buè tahun siso nidalanenna dèng,

⁵²

⁵³rumangna bagè enggo ia karèjo bagè kalak sigajien tahunen. Oda ndorok bakinen tuanna siso puna-puna tabasa.

⁵⁴Mula oda ndorok itebbus ia merkitè bagidi, kennah ipaluah ngo ia dekket dukak-dukakna Tahun olihenken sinaing roh nola.

⁵⁵Sada kalak Israel mak ndorok gabè hamba sidekkah nggelluhna kumerna naposo JAHOWA ngo bangsa Israel. JAHOWA ngo simengarak kalak i mbungkas i Mesir nai. Ia ngo JAHOWA, Dèbata kalak i.