Read Batak Dairi 3 Musa 27 Bible Online

3 Musa 27 - Batak Dairi bible

3 Musa 27

¹Iberèken JAHOWA mo bai si Musa

²hatoren ènda lako bai bangsa Israel. Mula lot sada kalak ipèlèken bai JAHOWA lako menèbbus bagah-bagahna kin, ndorok ngo ia itebbus merkitè riar,

³mengèkutken harga sienggo ncemmal merdalan i Undung-undung JAHOWA: — ibabo 60 tahun: anak laki — 15 riar pirak daberru — 10 riar pirak — ikellang-kellang 20-60 tahun: anak laki — 50 riar pirak daberru — 30 riar pirak — ikellang-kellang 5-20 tahun: anak laki — 20 riar pirak daberru — 10 riar pirak — iterruh 5 tahun: anak laki — 5 riar pirak daberru — 3 riar pirak

⁸Mula ncorsu ngo kalak simerbagah-bagah i lako menggarar bagè arga sienggo itentuken idi, kennah iarahken ngo kalakna sienggo ipèlèken bai JAHOWA idi mendahi imam. Kennah Imam mo memahanken moru argana mengèkutken kesanggupen kalak i.

⁹Mula pinakan halal ngo siniperbagahna i janah ndorok ijalo mahan pèlèen bai JAHOWA, oda ndorok gancihen kalak simerbagah-bagah i pinakan idi dekket pinakan sidèban, kumerna karina sinipèlèken bai JAHOWA, gabè JAHOWA mo sidasa. Mula itukari nola katèna, duana mo pinakan i gabè milik JAHOWA.

¹¹Tapi mula haram ngo pinakan i siso ndorok ijalo mahan pèlèen bai JAHOWA, kennah iiring kalak simerbagah-bagah i mo pinakan idi mendahi imam.

¹²Imam mo memakin hargana mengèkutken pengidahna mi pinakan i. Janah harga sienggo ibahanken imo harga patè.

¹³Mula naing itebbus kalak i pinakanna i, kennah igarar hargana janah itambahi duapuluh parsen nai.

¹⁴Mula lot sada kalak memèlèken bagesna bai JAHOWA, itentuken imam mo hargana mengèkutken rumang bages idi. Harga sienggo itentuken imo harga patè.

¹⁵Mula naing itebbus nola katèna bagesna i, kennah gararenna nasa argana itambahi duapuluh parsen.

¹⁶Mula lot sada kalak memèlèken dèba ibas tanohna nai bai JAHOWA, hargana kennah itentuken mengèkutken buè bennih siniperluken lako menuani tanoh i. Gennep duapuluh kilo pagè hargana sipuluh kèpèng pirak.

¹⁷Mula ipèlèken tanoh idi mulai ibas Tahun Olihenken nai, kennah dom hargana igarar.

¹⁸Mula ipèlèken tanoh idi kessa lebbè Tahun Olihenken, kennah imam ngo menaksir harga cingki mengèkutken buè tahun silotna dèng soh mi Tahun Mengolihken sinaing roh nola, nai itentuken mo harga termurahen.

¹⁹Mula sèkel ngo kalak simemèlèken juma idi naing menebbus, kennah igarar mo hargana itambahi dekket duapuluh parsen.

²⁰Mula idèaken juma idi oda dèng lebbè itebbus bai JAHOWA nai, oda nèngè ia merhak lako menebbus jumana i.

²¹I Tahun Mengolihken sinaing roh nola, gabè milik JAHOWA mo juma idi soh sidekkah-dekkahna, janah iberèken bai imam.

²²Mula lot sada kalak memèlèken sinterpuk juma sienggo itokor kin bai JAHOWA,

²³kennah itaksir imam mo hargana mengèkutken buè tahun silotna dèng soh mi Tahun Mengolihken sinaing roh. Nai kennah igarar kalak i mo hargana nasa harga sidarinkenna i. Gabè milik JAHOWA mo kèpèng i.

²⁴I Tahun Mengolihken, kennah iolihken juma i bai sidasa kin barang bai pinemparna.

²⁵Karina harga kennah ibahanken me- ngèkutken harga simerlakku i Undung-undung JAHOWA.

²⁶Pinakan siperlebbè tubuh milik JAHOWA ngo i, jadi oda ndorok pèlènken mahan pèlèen sitergerrek ibas ukur. Anak lembu, anak biri-biri barang pè anak kambing siperlebbè tubuh JAHOWA ngo sidasa i.

²⁷Tapi ukum pinakan haram siperlebbè tubuh ndorok ngo itebbus mengèkutken harga simerlaku i Undung-undung JAHOWA itambahi duapuluh parsen. Mula oda itebbus, ndorok ngo idèa pinakan i bai sidèban mengèkutken harga simerlaku i Undung-undung JAHOWA.

²⁸Sada kalak poda ndorok merdèa barang menebbus barang kadè sienggo ihujuken bai JAHOWA, tah jelma pè i, tah pinakan barang tanoh. Milik JAHOWA ngo i soh mi amman sumendah.

²⁹Salang jelma sienggo ihujuken bai JAHOWA lako ibinasaken oda ndorok itebbus; kennah ibunuh ngo ia.

³⁰Sipersipuluh ibas karina hasil tanoh, tah pagè i barang buah-buahen, mahan bagian JAHOWA ngo i.

³¹Mula lot naing menebbus dèba ipas hasil idi nai, kennah gararenna hargana bagè sienggo itentuken tambah duapuluh parsèn.

³²Sada daripada gennep sipuluh pinakan, milik JAHOWA ngo i. Mula ibilang pinakan i, pinakan pesipuluhken gabè milik JAHOWA.

³³Oda ndorok memilih-milih sidasa pinakan i, siapai selloh siapai nggodo. Oda ma ndorok igancihi. Mula igancihi katèna, duana mo pinakan i gabè milik JAHOWA janah oda ndorok itebbus.

³⁴Idi mo perèntah iberèken JAHOWA i babo delleng Sinai bai si Musa lako bai bangsa Israel.