Read Batak Dairi 3 Musa 3 Bible Online

3 Musa 3 - Batak Dairi bible

3 Musa 3

¹Mula lot kalak memèlèken sada lembu mahan pèlèen perdamèen, ndorok ngo tonggal barang pè berru-berru lembu i, tapi oda ndorok lot tikasna.

²Kalak simemèlèken idi kennah iampèken tanganna mi babo takal pinakan i, nai isèat mo i lebbè pèntu Undung-undung JAHOWA. Kennah ipispisken imam-imam pinempar si Aron mo daroh lembu idi mi empatna lumpak langgaten i.

³Mahan pèlèen perdamèen bai JAHOWA, kennah ipèlèken imam-imam ngo dèba ipas pinakan i nai imo: pessoh simemaluti bitukana,

⁴piah-piah dekket pessohna dekket simerandalna kalohon ibas atèna nai.

⁵Karina idi rebbak dekket pèlèen sidèbankenna i kennah itutung i babo langgaten. Pesennangken atè JAHOWA ngo bau pèlèen situtungen idi.

⁶Mula biri-biri barang kambing ngo mahan pèlèen perdamèen idi ndorok ngo pinakan idi tonggal barang berru-berru, tapi oda ndorok lot tikasna.

⁷Mula lot kalak memèlèken sada biri-biri, kennah iembah ngo i mi JAHOWA.

⁸Isi mo kennah iampèken tanganna mi babo takal biri-biri idi nai isèat mo i i lebbè Undung-undung i. Nai kennah ipispisken imam mo daroh biri-biri idi mi empatna lumpak langgaten i.

⁹Mahan pèlèen perdamèen bai JAHOWA, kennah ipèlèken imam mo ibas biri-biri idi nai imo: pessohna; karina èkur-èkurna simerpessoh janah ipenggel njolmit mi tulan burung-burungna, pessoh simemaluti bitukana,

¹⁰piah dekket pessohna dekket simerandalna kalohon ibas atèna nai.

¹¹Kennah itutung imam simerkebbas mo karina i babo langgaten mahan pèlèen panganen bai JAHOWA.

¹²Mula sada kambing ngo sinipèlèken i, kennah iembah kalak simemèlèken i ngo i mi Undung-undung JAHOWA.

¹³I si mo ia kennah mengampèken tanganna i babo takal kambing i nai isèat mo i i lebbè Undung-undung i. Kennah ipispisken imam mo daroh pinakan i mi empat lumpakna langgaten i.

¹⁴Mahan pèlèen pangaen bai JAHOWA, kennah ipèlèken imam ngo ibas kambing i nai: pessoh simemaluti bitukana i,

¹⁵piah-piah dekket pessohna dekket simerandalna kalohon ibas atèna nai.

¹⁶Kennah itutung imam simerkebbas mo karinana i i babo langgaten. Bau pèlèen panganen idi pesennangken atè JAHOWA. Karinana pessoh pinakan idi bai JAHOWA ngo.

¹⁷Oda ndorok kalak Israel kipangan pessoh-pessoh barang daroh pè. Soh mi sidekkah-dekkahna ngo merlakku hatoren idi janah kennah iuèi karina kalak Israel barang i dikè sambing ia merian.