Read Batak Dairi 3 Musa 4 Bible Online

3 Musa 4 - Batak Dairi bible

3 Musa 4

¹Idokken JAHOWA

²mo imongmongken si Musa bai bangsa Israel magahken barang isè sambing merkitè oda itulun merdosa kumerna ilausi sada pati-patiin JAHOWA kennah ièkuti ngo hatoren.

³Mula Imam Huntuen ngo simerdosa i, gabè dekket nola bangsa Israel mersalah kennah mo ia memèlèken sada lembu tonggal bajar dèng siso lot tikasna, bai JAHOWA asa isasa dosana.

⁴Kennah mo iembah lembu idi mi pèntu Undung-undung JAHOWA. Kennah iampèken Imam Huntuen idi tanganna mi babo takal pinakan i, nai isèat mo i lebbè Undung-undung i.

⁵Iembah mo dèba darohna i mi bagessen Undung-undung i.

⁶Nai kennah isornepken mo jari-jarina mi bagessen daroh i janah memispisken pitu kali mi lebbè kirè-kirè simenirang Bilik Simbadia.

⁷Dèba ibas daroh i nai kennah idalisken mi tanduk-tanduk sinisoki-soki langgaten dahupa sibaungkus ibagasen Undung-undung, janah lebbihna i kennah iarirken mi dangaen langgaten pèmèlèen situtungen silot i lebbè pèntu Undung-undung.

⁸Kennah ibuat Imam i mo karina pessoh lembu tonggal i, imo pessoh simemaluti bitukana,

⁹piah-piah dekket pessohna dekket simerandalna kalohon ibas atèna nai.

¹⁰Karina idi kennah itutung i babo langgaten pemèlèen situtungen tosè bagè pèlèen perdamèen.

¹¹Tapi ukum jukut lembu i, koling-kolingna, takalna, nèhèna, raban sidèbanna bagi dekket bituka rajana,

¹²karinana tupèh laènken sienggo ipejaè kin, kennah iembah mi ruar perundung-undungen. I sidi mo kennah itutung lembu idi i babo sebban i bekkas pengambongen cirabun, imo bekkas sienggo itentuken mi sibagidi.

¹³Mula karina bangsa Israel ngo simerdosa i, oda isengaja mengelausi sada ibas patiin JAHOWA nai,

¹⁴enggo kessa ibettoh dosa i, kennah mèter i sudu bangsa i mo merembah sada lembu tonggal bajar dèng mi lebbè Undung-undung JAHOWA. Kennah ipèlèken ngo pinakan idi mahan pèlèen kessasaen dosa.

¹⁵Kennah iampèken pengulu-pengulu bangsa i mo tangan kalak i mi babo takal pinakan i, nai isèat mo i bekkas i.

¹⁶Kennah iembah Iman Huntuen mo dèba daroh pinakan idi mi bagasen Undung-undung.

¹⁷Kennah isernepken mo i sidi jari-jarina mi bagasen daroh i nai ipispisken pitu kali i lebbè kirè-kirè simenirang Bilik Simbadia.

¹⁸Deba nai kennah idalisken mi tanduk- tanduk sinisoki-soki langgaten dahupa sini- bagasen Undung-undung, janah silebbihna kennah iorèken mi dangaen langgaten bekkas pemèlèen situtungen silot i pèntu Undung-undung.

¹⁹Karinana pessoh pinakan idi kennah ibuat janah itutung i babo langgaten i.

²⁰Carana tosè bagè pèlèen lembu tonggal mahan pèlèen kesasaen dosa. Bagidi mo cara Imam Huntuen memèlèken pèlèen kemulihken dosa-dosa bangsa i, nai isasa JAHOWA mo dosa kalak i.

²¹Kessa bagi kennah iembah mo lembu tonggal i mi ruar, janah itutung i ruar perundung-undungen bagè pemèlèken lembu tonggal mahan pè- lèen kesasaen dosa Imam Huntuen i sendiri. Bagidi mo carana memèlèken pèlèen kesasaen dosa bangsa i.

²²Mula sada kalak simerkuasa ngo simerdosa i tapi oda ma itulun mengelausi sada ibas patiin JAHOWA nai,

²³nai enggo kessa satdar ia, kennah mèter mo ipèlèken sada kambing tonggal siso lot tikasna mahan kesasaen dosana.

²⁴Kennah iampèken mo tanganna mi babo takal pinakan i, nai isèat mo kettan utara langgaten i, bekkas menèat pinakan mahan pèlèen situtungen.

²⁵Kennah isernepken Imam mo jari-jarina mi bagasen daroh pinakan idi nai idalisken mo mi tanduk-tanduk sini soki langgaten i janah mengarirken silebbihna mi dangaen langgaten i.

²⁶Kessa i kennah itutung mo karina pessoh pinakan idi i babo langgaten, bagè sinibakin tupung pèlèen perdamèen. Bagidi mo carana imam memèlèken pèlèen kemulihken dosa sada kalak perkuasa, nai isasa JAHOWA mo dosa kalak i.

²⁷Tah bakunè lot sada kalak ibas jelma keteremmen nai oda itulun memakin dosa mengelausi sada ibas patiin JAHOWA,

²⁸asa enggo kessa satdar ia, kennah mo ipèlèken sada kambing berru-berru siso lot tikasna.

²⁹Kennah iampèken tanganna mi babo takal pinakan i, nai isèat mo kettan Utara langgaten bekkas menèat pinakan mahan pèlèen situtungen.

³⁰Kennah isernepken Imam mo jari-jarina mi bagasen daroh pinakan i, nai idalisken mo mi tanduk-tanduk sinisoki langgaten janah mengorèken silebbihna i mi dangaen langgaten i.

³¹Karina pessoh pinakan idi kennah ibaing bagè sinibakin tupung pèlèen perdamèen. Kennah itutung Imam ngo pessoh i ibabo langgaten, asa sennang atè JAHOWA menganggoh bauna i. Bagi mo cara imam memèlèken pèlèen kemulihken dosa sada kalak jelma keteremmen, nai isasa JAHOWA mo dosana.

³²Mula lot sada kalak memèlèken sada biri-biri mahan kesasaen dosana, kennah berru-berru ngo biri-biri i janah oda lot tikasna.

³³Kennah mo iampèken tanganna mi babo takal pinakan i, nai isèat mo kettan utara langgaten i, bekkas menèat pinakan mahan pèlèen situtungen.

³⁴Kennah isernepken imam mo jari-jarina mi bagasen daroh pinakan i, nai idalisken mo mi tanduk-tanduk sinisoki-soki langgaten, janah mengorèken sitadingna mi danganen langgaten i.

³⁵Nai karina pessoh pinakan i kennah ibuat bagè sinibakin tupung pèlèen perdamèen. Kennah itutung ngo pessoh i i babo langgaten, rebbak dekket pèlèen sipanganen sinipèlèken bai JAHOWA. Bagi mo carana imam memèlèken pèlèen kerna dosa kalak i, nai isasa JAHOWA mo dosana.