Read Batak Dairi 3 Musa 6 Bible Online

3 Musa 6 - Batak Dairi bible

3 Musa 6

¹Iberèken JAHOWA mo hatoren-hatoren èn bai si Musa.

²Kennah ipèlèken sada kalak jelma ngo pèlèen mula merdosa ia meradepken JAHOWA kumerna oda nggèut ia mengulaken barang sinipeliniken denganna bana, barang pè menipu kalak, menangko ugasen, barang pè enggo jupasa ugasen sienggo mbalang, tapi iperso merdengan sumpah.

⁴Kalak simersalah idi menggarar balik karina milik sidapetsa idi merkitè oda jujur. Tikan terdapet ia mersalah, kennah igarar ngo karina balik bai sidasa idi, itambah duapuluh parsen.

⁶Lako mahan pèlèen gancih kerogien i kennah ngo kalak i memèlèken sada biri-biri barang pè kambing tonggal siso mertikas janah ibaing mo hargana mengèkutken harga simerlaku i Undung-undung JAHOWA.

⁷Ipèlèken Imam mo idi mahan tebbus dosa kalak i, nai iampuni JAHOWA mo ia.

⁸Idokken JAHOWA mo si Musa

⁹memerèken bai si Aron dekket dukak-dukakna hatoren-hatoren ènda imo tersèngèt pèlèen sinitutung karinana. Kennah iampèken imam ngo pèlèen situtungen i i babo langgaten janah ibelli mo i sidi sada berngin janah kennah ngo menerrus lakat apina.

¹⁰Enggo kessa kimbali abu pèlèen idi, merpakèen sulabal joppok mo imam dekket jubah ibas kaèn linen nai, kennah idokong mo abu simerpessoh i i babo langgaten i nai janah igamparken mi gembar langgaten.

¹¹Enggo kessa bagi igancihi mo pakèenna janah iembah mo abu idi mi ruar perundung-undungen, mi bekkas sienggo ipepada lako mi si.

¹²Gennep nceggen kennah ibaing imam mo sebban i babo langgaten i, mengatur pèlèen situtungen i babona, dekket menutung pessoh ibas pèlèen perdamèen nai. Kennah menerrus ngo lakat api i babo langgaten janah oda ndorok ibelli mèntep.

¹⁴Bagèen ngo hatoren tersèngèt pèlèen hantaren bai JAHOWA. Kennah iembah sada kalak ibas pemparen si Aron nai pelèen i mi lebbè langgaten.

¹⁵Kennah mo ia memuat singkupul nditak melèmet dekket minak bak karina kemènjenna, nai itutung mo i babo langgaten sikira tanda magahken karina pèlèen idi ipèlèken bai JAHOWA. Bau pèlèen idi mo pesampangken atè JAHOWA.

¹⁶Nditak sitadingna kennah ibaing gabè roti siso meragi janah ipangan imam imam mo i i sada bekkas merkedekoen, imo i Kasèan Undung- undung JAHOWA. Idi mo jambar imam si- niberèken JAHOWA taba kalak i ibas pèlèen sipanganen idi nai. Mbadia kalohon ngo panganen idi, tosè bagè pèlèen kasasaen dosa dekket pèlèen gancih rogi.

¹⁸Soh mi amman sumendah ngo karina anak pemparen si Aron ndorok kipangan roti idi, imo dakdak jambar kalak i ibas pèlèen panganen sinipèlèken taba JAHOWA. Kalak sidèban simenjamah pangaen sienggo ipèlèken idi, kennah mermara kumerna kegegohen kebadiaenna.

¹⁹Iberrèken JAHOWA mo bai si Musa hatoren-hatoren ènda

²⁰tersèngèt pèlèen pebangkitken sada kalak imam pemparen si Aron. Tikan ari pebangkitkensa i, kennah ipèlèken ngo sada kilo nditak berras bai JAHOWA. Sitengah kennah ipèlèken tupung siceggen, janah silebbihna tupung ciboen.

²¹Kennah icampur ngo nditak i dekket minak, nai itutung i babo pemanggangen, kessa i ibellah-bellah janah ipèlèken sikira pèlèen hantaren. Bau pèlèen idi pesennangken atè JAHOWA.

²²Soh mi amman sumendah gennep ipebangkit pinempar si Aron gabè Imam Huntuen, kennah ipèlèken pèlèen idi. Karinana kennah itutung mahan pèlèen bai JAHOWA.

²³Karina pèlèen hantaren sinipèlèken imam kennah itutung karina, cituk poda ndorok ipangan.

²⁴Idokken JAHOWA mo si Musa

²⁵memerè- ken taba si Aron dekket bai dukak-dukakna hatoren-hatoren ènda imo tersèngèt pèlèen pengampunen dosa. Pinakan mahan pèlèen pengampunen dosa kennah isèat i bekkas penèaten pinakan mahan pèlèen situtungen. Mbadia kalohon ngo pèlèen idi.

²⁶Imam simemèlèken pèlèen idi kennah kipangan pèlèen i i sada bekkas merkedekoen imo i kasèan Undung-undung JAHOWA.

²⁷Barang isè sambing janah barang kadè sambing dais mi pinakan idi mermara ngo kumerna kegegohen kebadiaenna. Mula lot sada baju kenna mbirsak daroh pinakan idi kennah itaptapi baju idi i bekkas merkedekoen.

²⁸Koden tanoh sinipakè lako memelgang jukut sinipèlèken idi kenah ipustakken. Mula koden tembaga ngo ipakkè, kennah igusgus ngo koden idi nai iborih dekket laè.

²⁹Karina dukak daholi ibas horong imam-imam nai ndorok ngo kipangan pèlèen simbadia kalohon i.

³⁰Pinakan haliu kerja pengampunen dosa sinibuat dèba darohna lako iembah mi Bilik Simbadia, kennah kerri ilekkup janah oda ndorok ipangan.