Read Batak Dairi 3 Musa 7 Bible Online

3 Musa 7 - Batak Dairi bible

3 Musa 7

¹Enda mo hatoren-hatoren tersèngèt pèlèen gancih kerogien. Mbadia kalohon ngo pèlèen idi.

²Pinakan mahan pèlèenken kennah isèat i bekkas penèaten pinakan mahan pèlèen situtungen, nai ipispisken mo darohna mi empat lumpakna langgaten i.

³Kennah ipèlèken imam ngo karina pessoh pinakan i i babo langgaten imo: Uitna simerpessoh, pessoh simemaluti bitukana, piah-piah dekket pessohna, dekket simerandalna kalohon ibas atèna nai.

⁵Karina idi kennah itutung i babo langgaten sikira pèlèen pangaen bai JAHOWA. Pèlèen idi mo mahan pèlèen gancih kerogien.

⁶Karina dukak daholi ipas horong imam-imam nai ndorok ngo kipangan jukut pèlèen idi, tapi kennah i bekkas merkedekoen ngo ipangan kalak idi i, kerna mbadia kaloen ngo pèlèen idi.

⁷Mi pèlèen pengampunen dosa dekket pèlèen gancih kerogien, dos ngo hatorenna, imo: Jukut pinakan sinipèlèken, imo sulang imam simemèlèken.

⁸Bebak pinakan i pè imam ngo sidasa.

⁹Karina pèlèen hantaren sinitutung ibas penutungen barang iroroh ibas saruam barang ipanggang, imo gabè sulang imam simemèlèken.

¹⁰Tapi ukum pèlèen hantaren siso itasak sinicampur dekket minak barang pè tah ngkerrah, karinana idi bai imam imam pinempar si Aron, janah kennah merbagi dos kalak i.

¹¹Bagèen ngo hatoren tersèngèt pèlèen perdamèen sipèlèenken bai JAHOWA.

¹²Mula pèlèen lako mendokken lias atè ngo pèlèen idi kennah ipèlèken ma mo roti siso meragi. Ndorok ngo ngkapal-ngkapal roti idi sienggo icampur nditak dekket minak zaitun, ndorok ma ngo roti i menipis janah ngkerrah sinidalis dekket minak, barang kuè nditak sinibahan merminak zaitun.

¹³Laènkenna i kennah ma ngo ipèlèken roti sinibahan merdengan ragi.

¹⁴Ibas gennep bagè roti idi nai kennah ipèlèken ngo dèba bai JAHOWA, janah idi mo bagian imam simemuat daroh pinakan i dekket simemispisken mi langgaten idi mahan pèlèen perdamèen.

¹⁵Jukutna kennah ipangan ngo ibas arinkenna pinakan i ipèlèken, situk poda ndorok itadingken mi sibarembenkenna.

¹⁶Mula lot sada kalak merembah pèlèen perdamèen lako pesautken niatna, barang pèlèen sitergerrek iukurna nai, oda pella perlu ipangan karina ibas sidarinkenna i. Silebbihna ndorok ngo ipangan sibarembenkenna.

¹⁷Mula soh mi ari petelluken tong dèng lot iba, kennah ilekkup ngo gulè i kerri.

¹⁸Tapi mula i ari petelluken ipangan dèng jukut idi, oda ngo ijalo pèlèen idi janah oda lot merembahken pasu-pasu bai kalak i, balikna gabè haram mo. Mersalah ngo sikipangan idi janah kennah mo igongken akibatna.

¹⁹Jukut sienggo dais mi barang kadè sienggo samur kennah ilekkup kerri janah oda ndorok ipangan. Jukut pèlèen perdamèen pellin kalak siso samur ngo kessa ndorok kipangan.

²⁰Mula lot kalak ipangan jukut idi keppèken tupung samur ia, oda nè ètongen ia bangsa Dèbata.

²¹Mula lot sada kalak kipangan jukut pèlèen idi kessa enggo lebbèen menjamah barang kadè si samur, ia tah pè idi bai jelma nai barang pè bai pinakan nai, ia pè oda nè ètongen bangsa Dèbata.

²²Iberrèken JAHOWA mo bai si Musa hatoren-hatoren ènda

²³lako bai bangsa Israel. Pessoh lembu, biri-biri barang pè kambing oda ndorok ipangan.

²⁴Pessoh pinakan matè bagi barang kumerna ijerngem binatang sinirambah, oda ndorok ipangan tapi ndorok ipakkè mi keperluen sidèban.

²⁵Kalak sikipangan pessoh pinakan sindorok ipèlèken mahan pèlèen pangaen bai Dèbata, oda nè ètongen bangsa Dèbata.

²⁶Ukum kalak Israel, barang idikè sambing pè ia merian, oda ndorok ipangan daroh manuk-manuk barang pè daroh binatang sidèbanna.

²⁷Barang isè mengelausi hatoren idi oda nè ètongen ia bangsa Dèbata.

²⁸Iberrèken JAHOWA mo bai si Musa hatoren-hatoren ènda,

²⁹lako bai bangsa Israel. Barang isè merembah pèlèen perdamèen, kennah ipejaè mo dèba mahan pèlèen merkedekoen bai JAHOWA.

³⁰Kennah ia sendiri ngo merembah pèlèen sipanganen idi. Pessoh dekket dada pinakan i kennah ipèlèken sikira pèlèen hadeppen bai JAHOWA.

³¹Kennah itutung imam ngo pessoh pinakan i i babo langgaten, tapi ukum dadana i jambar imam ngo i.

³²Paha kamuhunna kennah iberrèken mahan pemèrèken merkedekoen

³³bai imam simemèlèken daroh dekket pessoh pèlèen perdamèen idi.

³⁴Dada dekket paha kamuhun imo pemerèken merkedekoen ibuat JAHOWA ipas pèlèen hadeppen bangsa Israel janah iberrèken bai imam soh mi amman sumendah.

³⁵Ibas pangan sinipèlèken bai JAHOWA nai, i sidi nai ma mo iberrèken bai si Aron dekket bai dukak-dukakna i arinkenna kalak i ipebangkit gabè imam.

³⁶Tikan i arinkenna i idokken JAHOWA mo bai bangsa Israel asa ibas pèlèen kalak idi nai, idi ma mo jambar bai imam. Hatoren idi kennah iuèi bangsa Israel soh mi sidekkah- dekkahna.

³⁷Bagidi mo hatoren-hatoren tersèngèt pèlèen situtungen, pèlèen hantaren, pèlèen pengampunen dosa, pèlèen gancih kerogien, pèlèen pebangkitken dekket pèlèen perdamèen.

³⁸Iberèken JAHOWA ngo pati-patiin idi bai si Musa i delleng Sinai tikan ipasulak bangsa Israel memèlèken pèlèen i gurun Sinai.