Read Batak Dairi 3 Musa 8 Bible Online

3 Musa 8 - Batak Dairi bible

3 Musa 8

¹Nina JAHOWA mo taba si Musa,

²“Tenggoi mo si Aron dekket dukak-dukakna janah embah mo pakèen imam, minak kerja, sada lembu tonggal bajar dèng mahan pèlèen pengampunen dosa, dua biri-biri tonggal dekket sada kembal roti siso meragi.

³Nai dokken mo karina bangsa Israel merpulung i lebbè pèntu Undung-undungKu.”

⁴Ibakin si Musa mo bagè sinidokken JAHOWA. Tikan enggo kessa merpulung kari- na bangsa i i bekkas i,

⁵idokken si Musa mo taba kalak i, “Sikuulaken bagèndari perèntah JAHOWA ngo i.”

⁶Nai idokken mo si Aron dekket dukak-dukakna asa roh mi lebbè janah menguras dirina.

⁷Enggo kessa bagi ipakkèken mo pakèen imam bai si Aron: Anak baju, tali abak, dekket jubah. Bagi ma efod itapelken mi abakna dekket tinali ibas kaèn halus nai.

⁸Nai ileketken mo tutup tenten bai si Aron, janah mi tutup tenten idi ileketken mo Urim dekket Tumim.

⁹Nai ibakin ma mo bulang-bulang mi takal si Aron, janah ibas bulang-bulang idi iselletken mo hiasen emmas, lako petandaken ukum si Aron enggo gabè milik JAHOWA. Karina idi iulaken si Musa bagè sinidokken JAHOWA tabasa.

¹⁰Nai ibuat si Musa mo minak kerja i janah idalisken mo mi Undung-undung JAHOWA dekket mi karina haliuna. Merkitè bagidi karina mo ihuntuken bai JAHOWA.

¹¹Ipispisken mo situk ibas minak idi nai pitu kali mi babo langgaten dekket mi karina haliuna, bagi ma mi babo kancah dekket danganna. Merkitè bagidi karinana mo ipehuntu bai JAHOWA.

¹²Enggo kessa bagi ipebangkit si Musa mo si Aron merkitè mengarirken minak i situk mi babo takalna.

¹³Nai idokken mo dukak-dukak si Aron roh mi lebbè. Ipakkèken mo bai kalak i anak baju dekket tali abak. Nai ibakin mo bulang-bulang mi takal kalak i bagè sinidokken JAHOWA mbangsa.

¹⁴Enggo kessa i, ibuat si Musa mo sada lembu tonggal bajar dèng mahan pèlèen pengampunen dosa. Iampèken si Aron dekket dukak-dukakna i mo tangan kalak i mi babo takal pinakan idi.

¹⁵Nai isèat si Musa mo pinakan i janah ibuat mo dèba darohna. Idalisken mo merkitè jari-jarina daroh i mi tanduk-tanduk sinisoki-soki langgaten i, asa ihujuken langgaten idi bai Dèbata. Daroh sitadingna dèng iorèken mi dangaen langgaten i. Bagidi mo carana langgaten idi iuras janah ihujuken bai JAHOWA.

¹⁶Ibas lembu simbaru isèat idi nai, ibuat si Musa mo karina pessoh simemalut bitukana, piah-piah bak pessohna dekket simerandalna kalohon ibas atèna nai. Karinana idi itutung i babo langgaten.

¹⁷Tapi ukum jukut lembu i, bebakna, rabanna sitadingna i bagi dekket bituka rajana, jadi karina lembu i itutung i ruar perundung-undungen laènken sienggo ipejaè kin bagè sinidokken JAHOWA.

¹⁸Nai ibuat si Musa nola mo biri-biri tonggal mahan pèlèen situtungen, nai iampèken si Aron dekket dukak-dukakna mo tangan kalak i mi babo takal biri-biri i.

¹⁹Isèat si Musa mo biri-biri i janah ipispisken mo darohna mi empatna lumpak langgaten i.

²⁰Nai ilapah-lapah mo pinakan idi janah rabanna dekket nènèhna iborih dekket laè. Itutung mo takal, pessoh dekket sitadingna ibas jukut biri-biri tonggal idi nai mahan pèlèen situtungen i babo langgaten bagè siniperèntahken JAHOWA mbangsa. Bau huap pèlèen sipanganen idi pesennangken atè JAHOWA.

²²Nai ibuat si Musa mo biri-biri tonggal si sada nai mahan pèlèen pebangkitken imam. Iampèken si Aron dekket dukak-dukakna mo tangan kalak i mi babo takal biri-biri idi,

²³nai isèat si Musa mo pinakan i. Enggo kessa i ibuat mo situk daroh pinakan i, nai idalisken mo mi coping kamuhun si Aron, mi kekambal tangan kamuhun dekket mi kekambal nèhè kamuhunna.

²⁴Nai idokken mo roh njolmit dukak-dukak si Aron, nai idalisken ma mo situk daroh i mi coping kamuhun kalak i, mi kekambal tangan kamuhun, dekket mi kekambal kamuhun nèhè kalak i. Daroh sitadingna ipispisken mi siempat lumpakna langgaten i.

²⁵Ibuat si Musa mo pessoh biri-biri idi, uitna simerpessoh, karina pessoh simemaluti rabanna, simerandalna kalohon ibas atèna nai, piah dekket pessohna bak nèhè kamuhunna.

²⁶Ibas kembal sin roti siso meragi nai sienggo ipèlèken bai JAHOWA, ibuat si Musa mo sada roti ngkapal sinibahan merminak bak sada roti menipis. Igamparken mo roti i mi babo pessoh bak kaè kamuhun biri-biri i.

²⁷Karina mo idi ibakin mi tangan si Aron bak dukak-dukakna, nai ipèlèken kalak idi mo i sikira pèlèen merkedekon bai JAHOWA.

²⁸Enggo kessa bagi ibuat si Musa mo pa- ngaen idi bai kalak idi nai janah itutung i babo langgaten, rebbak dekket pèlèen situtungen mahan pèlèen pebangkitken imam. Bau huap panganen idi pesennangken atè JAHOWA.

²⁹Nai ibuat si Musa mo dada biri-biri i janah ipèlèken sikira pèlèen merkedekon bai JAHOWA. Idi mo sulang si Musa ibas biri-biri tonggal sinipèlèken tikan kerja pebangkitken imam. Iulaken si Musa mo karinana idi bagè sienggo iperèntahken JAHOWA bana.

³⁰Enggo kessa bagi ibuat si Musa mo dèba ibas minak Kerja i nai dekket dèba ibas daroh silot i babo langgaten, nai ipispisken mo taba si Aron dekket bai dukak-dukakna bak mi pakèen kalak i. Merkitè bagidi mo si Musa menghujuken kalak i bak pakèen kalak i bai JAHOWA.

³¹Nai idokken si Musa mo taba si Aron bak dukak-dukakna, “Roroh mo jukut pinakan idi i lebbè pèntu Undung-undung JAHOWA. Rembang mi perèntah JAHOWA, kennah ipangan kènè ngo jukut i i sidi dekket roti pèlèen pebangkitken imam silot ibas kembal.

³²Gulè dekket roti sitadingna kennah ilekkup kènè ngo i kerri.

³³Sidekkah pitu ari oda ndorok tadingenken ndènè Undung-undung JAHOWA soh mi pul tikki pebangkitken kènè.

³⁴Idokken JAHOWA ngo asa barang kadè sienggo sibahan ari sidari èn siulaken ma mo tong bagi mi podien en. Merkitè upacara i mo dosa-dosa ndènè iampuni.

³⁵Sidekkah pitu ari, mahar ari berngin, kennah tong kènè hot merian i lebbè pèntu Undung-undung lako mengulaken kadè sinidokken JAHOWA. Mula oda iulaken kènè idi matè mo kènè. Bagidi ngo iperèntahken JAHOWA bangku.”

³⁶Nai iulaken si Aron dekket dukak-dukakna mo karina siniperèntahken JAHOWA merkitè si Musa.