Read Batak Dairi Jeremia 1 Bible Online

Jeremia 1 - Batak Dairi bible

Jeremia 1

¹Bukku ènda isina imo rana si Jeremia anak si Hilkia, sada kalak imam kan kuta Anatot i aur kalak Benjamin nai.

²Ipermongkami JAHOWA ngo si Jeremia i tahun pesipuluhtelluken pemerèntahen si Josia anak si Amon raja kalak Juda.

³Enggo kessa i ipermongkami JAHOWA dèng ma ngo ia barang piga-piga kali nai, mungkah ipas tikan pemerèntahen si Joyakim anak si Josia nai soh mi tahun pesipuluhsadaken pemerèntahen si Zedekia anak si Josia. I bulan pelimaken tahunna idi ibantun mo pengisi Jerusalem mi buangen.

⁴Idokken JAHOWA mo taba aku, “Sinderrang mak dèng pè kuhanaken kono ibagasen kandongen inangmu, janah sinderrang mak dèng tubuh ko, enggo Kupilih janah kupebangkit kono gabè nabi taba bangsa-bangsa.”

⁶Kualoi mo, “Alè JAHOWA Sintèmbul kalohon i, oda ngo pandè aku mengerana kerna bajarsu kalohon dèng aku.”

⁷Ialoi JAHOWA mo, “Ulang dokken kono bajarsu deng. Mula Kupasulak kono barang mendahi isè sambing pè, kennah ngo kono laus, janah karina sikudokken bamu, kennah pesakatenmu bai kalak i.

⁸Ulang kono mbiar bai kalak i, kerna dak ngo denganenku ko, lako menjamotken ko. Aku JAHOWA ngo, sienggo mengerana!”

⁹Enggo kessa bagidi idoroken JAHOWA mo tanganNa, janah menjamah babahku ninganna mendokken, “Dengkohken mo janah mongmongken mo rana siKuruapken ènda.

¹⁰I ari sidari èn Kuberrèken mo bamu kuasa meradepken bangsa-bangsa dekket kerajaen — kuaso lako mengerumpakken dekket mengerentuhken, lako menggolingken dekket kibinasaken, lako pejengjengken dekket menanem.”

¹¹Nai ikusoken JAHOWA mo taba aku, “Kadè ngo idahko, Jeremia?” Kualoi mo, “Dahan kayu badem ngo, alè JAHOWA.”

¹²“Tuhu ngo i,” nina JAHOWA, “Kujaga ngo asa karina sikudokken idi gabè tuhu-tuhu.”

¹³Nai ikusoken JAHOWA nola dèng ma mo taba aku, “Kadè dèng ma idah kono?” Kualoi mo, “Kettan utara kuidah ngo koden sidang gurgur sinna janah naing-naing tungkap misèn.”

¹⁴Nina JAHOWA mo, “Roh nè mo kan utara nai olpek janah sempa mi karina pengisi nagerri ènda.

¹⁵Pasulakkenku mo karina bangsa si kettan utara nai roh lako mengerajai Jerusalem. Ia dingding pagar kumaliang kuta èn bak pèntu-pèntu pengkeruhenna dekket karina kuta sini Juda èn kennah irampasi kalak i.

¹⁶HukumenKu mo bangsangKu, kerna merdosa kalak i janah itondali kalak i Aku. Enggo ipesakat kalak i pèlèen taba Dèbata sidèban, janah memahan gana-gana ningan menembahsa.

¹⁷Kebbas mo ko, alè Jeremia! Laus mo kono janah dokken mo bai kalak i, karina sienggo Kuperèntahken bamu. Ulang ko mbiar taba kalak i, asa ulang Kubaing ko makin mi mbiarna mula pedempak abè dekket kalak i.

¹⁸Dengkohken mo! Ialo pengisi nagerri ènda ngo ko, imo raja-raja kalak Juda, nasa pugabè pemèrèntah, nasa imam, dekket ginemgem. Tapi i ari sidari èn berrènkenku mo bamu gegoh lako mengalo kalak i. Gabè codi bagè sada kuta gotting mo kono, codi bagè tihang bessi dekket pagar dingding tembaga. Mak ndorok nèngè kalak i menaluken ko, kumerna dak ngo Aku mendengani bak menjamoti ko. Aku, JAHOWA ngo sienggo mendokken i.”