Read Batak Dairi Jeremia 10 Bible Online

Jeremia 10 - Batak Dairi bible

Jeremia 10

¹Alè bangsa Israel, dengkohken mo tennah JAHOWA bamu.

²Nina ngo, “Ulang mo èkutken kecemmalen bangsa-bangsa sidèban janah ulang ringgodoren menengngen tanda-tanda si lot i langit sinikebiari bangsa-bangsa idi.

³Oda lot kadè gunana adat kecemmalen bangsa-bangsa idi. Itabahi kalak i ngo kayu i rambah, dekket pasulakken tukkang kayu menukkangi kayu i gabè gana-gana sembahen.

⁴Nai kessa i ilampis mo gana-gana i dekket emmas dekket pirak, nai ipetegguh mo dekket labang asa ulang ndabuh.

⁵Codi ngo gana-gana i bagè perselihi i pekken cèmun. Oda ndorok kalak i mongkam, mak ndorok gumerrek, janah kennah i dokong. Ulang kebbiari kalak i, kerna oda ngo ndorok kalak i memaing jahat taba kènè; memaing selloh pè oda ma ngo tellap kalak i.”

⁶Alè JAHOWA simermulia, oda ngo lot codi bagè ko, mehangga ngo gerarmu janah dom kuasa.

⁷Mènter isè mo oda uè merkebiaren taba kono, raja sagumanna bangsa? Situhuna patut kalohon ngo kono pesangapen. Ibas karinana sipandè i tengah-tengah karina bangsa nai dekket karina raja-raja kalak i nai, sada kalak poda ndorok ipecodi dekket diriMu, alè JAHOWA.

⁸Palek janah moto ngo kalak i karina kumerna manihan kayu sambing ngo dèbatana, oda ndorok mengajarken simerguna.

⁹Ilampis ngo ia dekket pirak bak emmas siniembah i Spanyol dekket kuta Ufas nai, karinana idi sinibahan tangan sipandè mendakdak dekket meneppa emmas. Pakkèenna ibas kaèn meharbu ntua bak meharbu menguda nai, ibahan sipandè mertennun mendè kalohon.

¹⁰Tapi kono, JAHOWA ngo, Dèbata situhuna, Dèbata simemerrè kenggeluhen, raja soh mi sidekkahna. Mula melaga kono, dumegger ngo tanoh èn, mula nggettem iakap ko oda lot bangsa sindorok mertahan. (

¹¹O kènè, alè bangsangku, kennah ngo bagahenken ndènè taba kalak i magahken ukum dèbata siso menghanaken langit bak tanoh i kennah ibinasaken. Kennah tumpat ngo kalak i kan babo tanoh èn nai.)

¹²Ihanaken JAHOWA ngo tanoh èn merkitè kuasaNa, menempa dunia merkitè kepantasenNa, janah pekimbangken langit merkitè kepistarenNa.

¹³Pellin merkitè maing perèntah sambing merdengngor mo laè i langit. Ibaing ngo merrohen hembun i gennep punca tanoh ènda nai, janah ibakin ia ngo kasiksak pelian ibas udan, bagi ma itengesken ia ngo angin i bekkas pemeneppenNa nai.

¹⁴Menengen karinana i satdar mo jelma magahken moto ngo ia keppè janah oda lot merpengantusi. Termèla mo peneppa emmas, kerna palsu ngo gana-gana sinibahanna idi janah oda merkessah.

¹⁵Oda ngo merlapaten gana-gana i patut kenna rèhè janah ilèai. Mula jupa kessa katikana binasa mo kalak i.

¹⁶Ukum Dèbata si Jakob oda ngo bagè gana-gana idi; simenempa nasa silot ngo ia. GerarNa imo JAHOWA Pergegoh Sisotercodi; enggo iteddo ia Israel gabè bangsaNa.

¹⁷Alè pengisi Jerusalem, i kubu ngo kènè! Kumerna i, kebbas-kebbas mo kènè!

¹⁸Ukum sikali èn ambongenken JAHOWA mo karina bangsa Juda mi kebuangen; igeppui mo kè karina. Idi mo tennah bai JAHOWA nai.

¹⁹Pingko-pingko mo pengisi Jerusalem, “Parah ngo ugah nami janah oda nèngè ndorok malum. Kudok kami ngo tikala i kinidersa ènda ndorok kugongken kami, keppèken oda ngo.

²⁰Ncèda ngo undung-undung nami, janah merposteppen karina tinalina. Oda lot nèngè sindorok memajek undung-undung bak mengeleketken saongna, kumerna dukak-dukak pè enggo merlausen.”

²¹Kualoi mo, “Moto ngo pengulu-pengulunta idi, oda ipengido kalak i ajar bai JAHOWA nai, kumerna i mo asa oda saut bahaen kalak i, janah mermerapen kita tah mikè.

²²Dengkohken mo! Lot ngo berita magahken lot sada bangsa i utara nai maingken kegontaren. Gabè melongo mo kuta-kuta silot i Juda ibakin soridadu kalak i janah oda nè isè mengiani. Merciboni mo isidi nasa guraba.”

²³Alè JAHOWA, kubettoh ngo sada kalak poda lot merkuasa lako menentuken nasipna barang pè lako mengatur perdalan nggelluhna.

²⁴Ajari mo kami alè JAHOWA, tapi ulang mo mpiahsu ma lipat. Ulang ma mo hukum kami mula tekka Ko melaga, kerna pasti ngo kami kennah salpun karina.

²⁵Pesembuh mo lagaMu meradepken bangsa siso mengakui kono dekket siso uè mersembah taba kono. Kerna enggo ngo iripasken kalak i bangsaMu janah mengelala nagerri nami.