Read Batak Dairi Jeremia 11 Bible Online

Jeremia 11 - Batak Dairi bible

Jeremia 11

¹Nina JAHOWA mo taba aku,

²“Perdatèken mo sarat-sarat perpadanen siKubaing dekket bangsangKu. Bagahken mo bai kalak Juda dekket pengisi Jerusalem magahken

³Aku, JAHOWA Dèbata Israel, menumpahi barang isè siso menguèi sarat-sarat perpadanenKu idi.

⁴Ia perpadanen idi enggo kin ngo Kubakin meradepken empung kalak i sinderrangna Kubabai kalak i mbungkas i Mesir nai, nagerri codi bagè narakka bai kalak i. Kudokken ngo kalak i asa merpenguèi taba Aku dekket mengulaken nasa sienggo Kuperèntahken. Bagèndari pè enggo ma ngo Kudokken taba kalak Juda dekket pengisi Jerusalem magahken mula iuèi kalak i Aku, gabè bangsangKu mo kalak i janah Aku Dèbata kalak i.

⁵Mula iulaken kalak i karinana idi, pesautenku mo padanKu bai empung kalak i magahken berrènkenku mo nagerri nggabur janah nduma siniianen kalak i bagèndari bai kalak i.” Kualoi mo, “Selloh, alè JAHOWA.”

⁶Nai nina JAHOWA mo taba aku, “Laus mo ko berkat mi gennep kuta i Juda, dekket mi gennep dalan silot i Jerusalem. Pesakat mo tennahKu ènda taba jelma sinisidi. Dokken mo kalak i mendatèken janah menguèi sarat-sarat perpadanenKu.

⁷Sinderrangna kubabai empung kalak i mbungkas i Mesir nai, sessè ngo Kupesèngèt kalak i asa merpenguèi taba Aku. Soh mi sidari èn pè dak tong ngo Aku pesèngètken bangsangKu tersèngèt idi,

⁸janah mendokken kalak i lako menguèi perpadanenKu idi, tapi oda uè kalak i mendengkohken janah oda uè merkebiaren. Baliksa nola dak tong ngo mpihir perukuren kalak i janah jahat bagè siarnia. Kumerna i nasa hukum si lot ibas perpadanen i enggo Kupesempa taba kalak i.”

⁹Nai nina JAHOWA nola mo taba aku, “Enggo mersada taki kalak Juda dekket pengisi Jerusalem lako mengalo Aku.

¹⁰Enggo iulaken kalak i dosa bagè siniulaken empung kalak i siso uè merpenguèi taba Aku, isembah kalak i ngo dèbata sidèban janah oda uè mengèkutken perèntahKu. Agia Israel bagi ma pè Juda ilausi ngo padan sienggo Kubakin dekket empung kalak i.

¹¹Kumerna i, Aku, JAHOWA, pesèngètken naing bakinenku mo roh olpek taba kalak i janah oda terilakken kalak i. Mula pè dilo-dilo kalak i mengido pengurupien baKu, oda uè Aku mendengkohken.

¹²Nai laus mo kalak Juda bak pengisi Jerusalem mengido pengurupien taba dèbata sidèban sinisembah kalak i merkitè pèlèen. Oda ngo tellap dèbata sidèban idi lako paluahken kalak i tikan roh olpek idi.

¹³Mèduk kalohon ngo dèbata kalak Juda, tosè bagè buè kuta kalak i. Ipajek pengisi Jerusalem ngo langgaten bagè buè dalan silot i kuta Jerusalem lako memèlèken pèlèen taba Dèbata Baal.

¹⁴Kerna i, alè Jeremia, ulang mo ko mersodip lako bai kalak i barang mengido pengurupin baKu lako bai kalak i. Mula pè ibagasen kepenjetten kalak i janah mengido pengurupien baku, oda ngo uè aku mendengkohken kalak i.”

¹⁵Nina JAHOWA mo, “Enggo iulaken bangsangKu sikukekelengi i ulah-ulah jahat. Oda lot merhak kalak i merian i BagesKu. Idokdok atè kalak i ngo enggo kessa katèna ibaing bagah-bagah, dekket merkitè pesakatken pelèen pinakan, enggo mènter ndorok kalak i mengambati olpek i. Tah idok ngo ndia merkitè bagidi ndorok kalak i sennang?

¹⁶Nung ngo kugerari kalak i kayu zaitun ntemtem, rombang-rambing buahna merandal-merandal. Tapi, bagèndari merkitè sora bagè renggur mahantu lekkupenku mo bulung-bulungna janah Kucuakken mo karina rantingna.

¹⁷Aku ngo pecèndekken Israel dekket Juda, Aku, JAHOWA Pergegoh Sisotercodi. Tapi, bagendari enggo Kutaki lako perohken olpek taba kalak i. Kalak i sendiri ngo memaingken karinana idi, kumerna enggo iulaken kalak i kejahaten, imo memèlèken pèlèen taba dèbata Baal dungna melaga mo Aku.”

¹⁸Ibagahken JAHOWA mo taba aku tersèngèt taki jahat musuh-musuhku meradepken aku.

¹⁹Codi bagè biri-biri siso pella sek ukur ngo aku iembah mi bekkas pemunuhen. Oda kubettoh keppèken aku ngo sinaing gabè sasaren taki-taki jahat kalak idi. Nina kalak i ngo, “Ita mo sitabah kayu ènda sinderrangna ndorok dèng ia menghasilken buah; sipatèken mo ia asa ulang lot nè kalak mengenget gerarna.”

²⁰Nai mersodip mo aku, “Alè JAHOWA Pergegoh Sisotercodi, kono ngo perhukum senteng; kono ngo simengoji pikiren bak perukuren jelma. Kupesakat mo bamu simasa bangku ènda. Katerra pè ndorok mo aku menaksiken tikan ibalesken kono pemahan kalak i.”

²¹Ukum kalak sini kuta Anatot sèkel ngo kalak i asa matè aku. Nina kalak i ngo, “Mula dak iempet kono ngo pesakatken tennah JAHOWA bai nami, kubunuh kami mo ko.”

²²Kumerna i, nina JAHOWA Pergegoh Sisotercodi i mo, “Kuhukum pè kalak i! Mermatèen mo anak-anak perana kalak i i pergerahaen, matè rapar mo dukak-dukak kalak i.

²³Enggo ngo kutentuken katikana lako perohken jèkat taba kalak Anatot, janah mula dapet kessa katikana hukumen taba kalak i, sada kalak poda ndorok mpellut.”