Read Batak Dairi Jeremia 12 Bible Online

Jeremia 12 - Batak Dairi bible

Jeremia 12

¹“Mula kusohken perkarangku mi hadeppenMu, alè JAHOWA, tentu mo kennah merbukti kono ngo situhuna. Tapi naing ma ngo dok atèngku mengkusoken baMu tersèngèt mi ketègerren: Kasa mo nduma kalak jahat? Kasa kalak siso bujur sikennaen cinari?

²Isuan kono ngo kalak i codi bagè suan-suanen, nai merurat mo kalak i, makin mbellen, janah merbuah. Dak ngo kalak i mengerana selloh-selloh tersèngèt mi diriMu, tapi ukum ibagasen ukurna, situhuna oda ngo isuihken kalak i kono.

³Tapi ukum kono, alè JAHOWA, itandai ko ngo aku. Idah kono ngo kadè sikuulaken, janah ibettoh kono ngo barang bakunè ukurku meradepken kono. Runtun mo kalak perjahat i mi darat, babai mo kalak i bagè biri-biri mi penèaten. Jaga mo kalak i sampè dapet katikana kalak i sèaten.

⁴Sadikè dekkah nai mo ndia nagerri èn dak kerrah-kering, janah dukutna males i gennep juma? Manuk-manuk bak binatang sidèbanna mermatèen kumerna kejahaten bangsa nami. Idokken kalak i ngo, oda idahenku nina nasip kalak i.”

⁵Idokken JAHOWA mo, “Alè Jeremia mula gabè ledja kono mersiadu dekket jelma, bakunè nola mo terbaing kono mersiadu dekket kuda? Mula i tanoh si mènak pè ko buradan, kadè kin mo ndorok ulaenkenmu mula merian kono i rambah tembak sini biding Jordan?

⁶Enggo ngo iselbuh ko, bang dengnganmu sibeltek sendiri pè, dekket ngo kalak i menjuhap kono. Ulang mo tok ukurmu taba kalak i, tukasi pè selloh begèenken ranana.”

⁷Nina JAHOWA mo, “Oda nèngè ngo kusarihken bekkas kundulku, nagerringKu pè enggo Kutadingken, dekket bangsangKu siKukekelengi i pè enggo Kusohken mi tangan karina musuhna.

⁸Ialo bangsa sinipilihKu ngo Aku; codi bagè singa sinirambah bagidi ngo kalak i merngengngeng taba Aku. Kumerna i ngo asa ceggo atèngku taba kalak i.

⁹Codi bagè manuk-manuk sinipellet-pellet keliki ngo kalak i karina arah nai. Diloi mo nasa binatang rambah asa dekket kalaki mengkerriken.

¹⁰Mèduk ngo perkuasa sidèban sienggo mencèdaken pekken anggurKu dekket mendedohi jumangku. NagerringKu simerandal i enggo ibakin kalak i gabè padang gurun longo-longoen.

¹¹Uè, Kuidah ngo kalak i memaingken nagerringKu gabè bekkas melongo peluiken atè. Karinana terulang, oda nèngè isè lot mendatèken.

¹²Merrohen ngo kalak menamun, i delleng-delleng kan kèparen padang gurun nai. Kupemasa ngo geraha lako mencèdaken karina nagerri dungna sada kalak poda ndorok nè sennang nggelluh.

¹³Menuan pagè ngo bangsangKu, tapi dori ngo iperani. Ledja ngo kalak i mahan bahaen tapi oda merhasil sinibahanna. Melaga kalohon ngo Aku dungna oda kasèa peranien kalak i.”

¹⁴Idokken JAHOWA mo, “Enda mo tennahKu tersèngèt nègara-nègara dengngan baleng Israel sienggo mencèdaken nagerri siKuberrèken taba bangsangKu Israel. Codi bagè suan-suanen siniberkat i tanoh nai, bagidi ngo karina kalak jahat i pepuarenku i gennep nagerri kalak idi nai, janah paluahenku mo Juda i gemgemmen kalak idi nai.

¹⁵Tapi enggo kessa kupuari kalak i, masèhenku nola ngo tong kalak i; gennep bangsa mo embahenku nola balik mi nagerrina sendiri.

¹⁶Mula uè ngo kalak i ibas nasa ukur kalak idi nai menjalo agama bangsangKu janah uè merbulaban merkitè mendokken, ‘Merkitè gerar JAHOWA Singgelluh i,’ — tosè bagè pengajari kalak i sinderrangna i bai bangsangKu merbulaban merkitè gerar Baal — nai kalak i pè mbengket gabè bangsangKu mo janah gabè nduma.

¹⁷Tapi bangsa siso uè mengèkutken Aku, rengkatenku mo codi bagè suan-suanen janah Kupetumpat. Aku JAHOWA ngo, simendokken i.”