Read Batak Dairi Jeremia 13 Bible Online

Jeremia 13 - Batak Dairi bible

Jeremia 13

¹Ipasulak JAHOWA ngo aku berkat lako menokor mandar ibas kaèn linen nai janah memakèsa, tapi oda ndorok aku mengosepken mi bagasen laè.

²Nai laus mo aku menokor mandar joppok idi, ninganna menelluk.

³Kessa i mongkam mo JAHOWA taba aku, nina mo,

⁴“Laus mo ko mi Laè Efrat, janah boniken mo mandar idi i ruang-ruang batu.”

⁵Nai rembang mi perèntah JAHOWA laus mo aku janah memoniken mandar idi i gembar Laè Efrat.

⁶Enggo kessa barang sadikè dekkah ipasulak JAHOWA nola mo aku mi Laè Efrat lako memuat mandar joppok idi.

⁷Nai laus mo aku, janah memuat mandar idi i bekkasna kuboniken i nai. Keppèken enggo mumuk mandar idi, janah oda nè terpakkè.

⁸Nai mongkam nola mo JAHOWA taba aku, nina mo,

⁹“Bagidi mo carana bakinenku taba kalak Juda dekket pengisi Jerusalem. Sudahenku mo kinitunggang kalak i simunjung i.

¹⁰Bangsa jahat èn mpihir kalohon ngo perukurenna janah oda nggèut merpenguèi taba Aku. Merpenguèi janah mersembah taba dèbata sidèban ngo kalak i. Kumerna i mo kalak i tosè bagè mandar joppok siso merguna idi.

¹¹Bagè mandar joppok iberretken memmes ibas abak simemakkèsa, bagi mo nemmu katengku asa terberret memmes bangsa Israel bak Juda taba Aku. Merkitè bagidi gabè bangsangKu mo kalak i simemakin gerarKu terpoji janah ipesangap. Tapi oda ngo nggèut kalak i menguèi taba Aku.”

¹²Nina Dèbata JAHOWA mo taba aku, “ Alè Jeremia, bagahken mo tennahKu bai kalak Israel asa gennep goci bekkas anggur kennah idomi dekket anggur. Ialoi kalak i mo, ‘Meter oda kin mo kubettoh kami mak kennah domèn goci dekket anggur?’

¹³Nai dokken mo taba kalak i sini nagerri èn, raja-raja pemparen si Daud, imam, nabi, dekket karina pengisi Jerusalem Kudomi mo i bak anggur soh mabuk.

¹⁴Nai Kupehantukken mo kalak i samahsa. Situa-tua bak simenguda bagi mo Kubakin oda lot ampunen. Kubinasaken mo kalak i oda pella rogi Kuakap barang pè masèh atèngku. Aku, JAHOWA ngo, simendokken i.”

¹⁵Alè bangsa Israel, enggo mongkam JAHOWA! Ulang ko tunggang dengkohken mo Ia!

¹⁶Kennah ngo pesangapenmu JAHOWA Dèbatamu sinderrang mak dèng ipesempa kegellapen, janah terkastuk nèhèmu i uruk-uruk, sinderrang mak dèng sincihur siniharapkenmu iobah gabè kegellapen.

¹⁷Mula alang atèmu mendengkohken, tangis mo aku mboni-mboni. Merkitè ukurku melui kutangisi mo kinitunggangmu. Merkenner ngo èluhku kumerna iembah bangsa JAHOWA gabè tabanen.

¹⁸Idokken JAHOWA mo taba aku, “Dokken mo raja bak bindoharana i susur i tahtana nai, kumerna enggo ndabuh rudangna simerandal i ibas takalna nai.

¹⁹Karina kuta Juda si kettan selatan pè enggo ngo i keppung, janah oda lot sindorok menunjul perjuhapen idi. Karina kalak Juda enggo iembah mi buangen.”

²⁰Nina JAHOWA mo taba pengisi Jerusalem, “Datèken mo! Tupung roh ngo enggo musuhmu i utara nai! I dikè ngo ndia kalakna sikennah kellinenmu dekket sinièndèlkenmu idi.

²¹Kadè ngo ndia dokenkenmu mula kalak sinibakinmu gabè dengnganmu menaluken dekket mengerajai kono? Pasti ngo mpiah iakap kènè bagè daberru ketaring.

²²Dok atèmu ngo sendah kasa mo ndia karina idi sempa mi dirimu, kasa mo iseggai abitmu janah irampok kono. Bettoh mo masa pè karina idi kerna enggo mbelgahsu dosamu.

²³Ndorok kin mo katèmu kalak mbèrèng mengobah rupa kolingna, barang pè biahat mengagoi mèrong-mèrongna? Tentu oda ndorok! Bagi ma ngo kènè pè sincemmal mengulaken jahat oda terbaingsa i mengulaken merandal.

²⁴Pesompar-baèrenku mo kènè codi bagè uhut sinisempulken angin i padang gurun nai.

²⁵Bagidi mo nasip ndènè sienggo Kutentuken kumerna enggo ilupaken kènè Aku, janah kumerna enggo mengketoki dèbata sidèban kènè.

²⁶Aku sendiri mo meneggaken pakkèen i daging ndènè nai asa gabè lubus kènè janah malu.

²⁷Enggo ngo kuidah kènè mengulaken siKukecegoken. Enggo ngo kuidah kènè pèkut-èkutken dèbata sidèban i uruk dekket i juma, codi bagè sada kalak anak laki tergila-gila midah sinibages ndèba barang pè codi bagè kuda tonggal sèkel taba kuda berru-berru. Alè pengisi Jerusalem, merjaya mo kènè! Cidahari ngo ndia asa ntalkas kènè tarap karina kejahaten nai?”