Read Batak Dairi Jeremia 14 Bible Online

Jeremia 14 - Batak Dairi bible

Jeremia 14

¹Bagèen ngo idokken JAHOWA taba aku tersèngèt mosin leggo mertuhu-tuhu.

²“Merbonek atè ngo Juda enggo naing-naing patè karina kutana. Mergalèen i tanoh karina kalakna janah kelsohen. Menderko ngo Jerusalem mengido asa iurupi.

³Karina perkebbas kalak sibèak ipasulak menulusi laè barang i dikè sambing; mi gennep sumur ngo kalak i laus tapi enggo kerri karina laè. Numar mo kiong siniembah kalak i balik. Ibagasen ganggu dekket mendellè mèla mo iakap kalak i janah mengemkemmi abèna.

⁴Oda roh udan janah tanoh kerrang kerring; peruma-uma menungkupi abèna kumerna terdehèrep kalohon.

⁵Oda lot nèngè dukut, kumerna i merlausen mo inang balkih. Itadingken anakna sirembaru tubuh irambah lunglang.

⁶Ringgarung pè dak longgah sambing i pucuk delleng, melung matana kerna oda lot nèngè dukut; mengkas-engkas ngo ia bagè sorigala.

⁷Tenggo-tenggo ngo bangsangKu, ‘Alè JAHOWA, tukasi pè dosa nami menukasi kami bagidi gia urupi mo kami rembang mi bagah-bagahMu. Enggo mo tuhu nggati barang piga-piga kali kono kutadingken kami; tuhu-tuhu ngo merdosa kami baMu.

⁸Pellin sada kono ngo kessa harapenken Israel paluahken kami ibas mara nai. Tapi kasa mo bagè kalak sidèban ko i nagerri nami, codi bagè perdalan-dalan mermalam saberngin kessai laus?

⁹Tapi kasa mo kono bagè kalak sibengap; tosè bagè pakalima siso sanggup mengurupi? Tapi, pasti ngo kono merian i tengah-tengah nami, alè JAHOWA! BangsaMu ngo kami, ulang mo tadingken kami!’ ”

¹⁰Tersèngèt mi bangsa i nina JAHOWA ngo, “Oda sennang ukurku merimbangken kalak i si nggati mperrus bangku nai, janah oda uè mengerajai dirina. Oda lupankenku kesalahen kalak i, hukumenku mo kalak i kumerna dosa kalak i.”

¹¹Nina JAHOWA mo taba aku, “Ulang mo pidoken Aku mengurupi kalak i.

¹²Tukasi nola pè kalak i merpuasa, oda uè Aku lako mendengkohken dilo-dilo kalak i mengido urup; janah tukasi pè kalak i memèlèken baku pèlèen situtungen dekket pèlèen pagè, oda ngo sennang ukurku taba kalak i. Baliksa, salpunenku ngo kalak i merkitè geraha, kelèhèen, dekket sakit wabba.”

¹³Nai ningku mo, “Alè JAHOWA Sintèmbul kalohon i, ibettoh kono ngo nabi-nabi enggo mendokken taba jelma nterrem magahken oda nèngè masa geraha barang pè kelèhèen, kumerna enggo iperbagah-bagah kono ukum i nagerri èn dak ngo merian kedamèen.”

¹⁴Tapi ialoi JAHOWA mo, “Berita luap ngo iembah nabi-nabi idi merkitè gerarKu; oda ngo kupasulak kalak i, janah oda ma ngo lot kubaing perèntah barang pè kirana bai kalak i. Alaten-alaten sinisukutken kalak idi pè oda ngo bangKu nai idi; siso merguna ngo sinialatken kalak i sinibahan-bahan kalak i sendiri.

¹⁵Iranaken kalak i ngo merkitè gerarku ukum nagerri ènda oda nèngè isempa geraha barang pè kelèhèen, keppèken oda ngo lot kupasulak kalak i mendokken bagidi. Aku, JAHOWA, memagahken bamu, alè Jeremia, barang kadè sinaing bakinenku meradepken nabi-nabi siso kupasulak idi. Bunuhenku mo kalak i merkitè geraha dekket kelèhèen.

¹⁶Kalak sienggo menjalo alaten-alaten kalak idi pè tong ma mo bunuhen dos bagè taba nabi-nabi idi. Pengambongenken mo bangkè-bangkè kalak i mi dalan-dalan i Jerusalem oda lot giam simenanem. Bagidi mo nasip kalak i bak dukak-dukak dekket sinibages kalak i. Bakinenku mo kalak i menggongken ali kejahaten kalak i.”

¹⁷Idokken JAHOWA ngo aku memagahken bonek ukurku bai bangsaNa. Kennah ngo dokkenenku bagèen, “Belli mo aku tangis oda meradi-adi, mahar ari berngin merurus èluh. Kumerna melaha-laha ngo ugah bangsangku janah mpiah kalohon iakap.

¹⁸Mula mi jampalen aku, kuidah mo bangkè-bangkè simatè mergeraha. Ibagasen kuta pè kuidah mo kinimpersah, karina jelma enggo patè-patèen kerna kelèhèen. Nabi dekket imam memahan patut bahaenna oda iantusi barang kadè sinibahanna.”

¹⁹Alè JAHOWA, enggo mo ndia putus ukurmu menulak Juda janah ikecegoken kono pengisi Sion? Kasa mo bagi ngkellekna ibatbat kono kami dungna oda nèngè ndorok malum kuakap kami? Datina sambing ngo kami menulusi kedamèen, oda lot gunana kami mengharapken kinijuah, kumerna pellin kekerasen nai ngo kessa lot.

²⁰Alè JAHOWA, pellin taba kono ngo kessa kami enggo merdosa. Kuakui kami ngo dosa nami sendiri dekket dosa empung nami.

²¹Engèt mo bagah-bagahMu, ulang mo ipelèa kono kami; ulang mo sondati bagah-bagahMu bai nami. Jerusalem bekkas tahtaMu simermulia i pè, ulang mo merlèa bakin.

²²Ukum dèbata sinisembah bangsa-bangsa oda ngo ndorok perohken udan mi tanoh èn. Langit pè oda ngo ndorok ma mengorèken udan merkitè kuasana sendiri. Pellin kono ngo sikuharapken kami. Kono ngo memaing idi karina asa jadi.