Read Batak Dairi Jeremia 15 Bible Online

Jeremia 15 - Batak Dairi bible

Jeremia 15

¹Nina JAHOWA mo taba aku, “Oda lot masèh atèngku taba bangsa èn, tukasi pè si Musa bak si Samuel jengjeng i `sen lako mengidoken masèh atèngku bai kalak i! Suruh mo bangsa èn kennah laus, oda lemmo atèngku mengidah kalak i.

²Mula ikusoken kalak i bamu barang pak dikè kalak i laus, dokken mo bagèn, ‘Nina JAHOWA ngo, sinitentuken matè kumerna sakit belli mo matè ia ganaenken sakit. Sinitentuken matè ipas geraha belli mo matè ipas geraha. Sinitentuken matè kumerna lèhè belli mo matè ia kellèhèen! Sinitentuken lako i taban, belli mo ia iembah mahan tabanen!’

³Aku, JAHOWA, enggo menentuken lot empat hukumen ntengngam sinaing masa bai kalak i: Mermatèen mo kalak tupung geraha, isaran-saran biang mo bangkè kalak i, ipaguti manuk-manuk, janah ikerriken binatang rambah.

⁴Bakinenku mo karina bangsa sinidunia èn merdeggar pendurungenna mengidah kalak i. Karinana idi kubakinken imo kumerna ulah-ulah si Manasye anak si Hizkia i Jerusalem sinderrangna ia gabè raja Juda.”

⁵Nina JAHOWA mo, “Alè pengisi Jerusalem, mèter isè mo mermasèh atè bamu? Mèter isè kin mo uè merbonek atè rebbak dekket kono? Mèter isè mo uè singgah lako mengkusoken simasa bamu?

⁶Enggo ngo itulak janah itadingken kènè Aku, kerna i Kuasaken mo tanganKu lako mengereppuk kènè, kerna enggo ngelngellen Aku mengorom lagangKu.

⁷I gennep kuta i nagerri en kupitakken mo kènè codi bagè nggala pagè. Tukasi pè bangsangKu kènè bagidi pè Kubinasaken ngo kènè bak dukak-dukak ndènè kerna oda uè kènè mengobah pekilako ndènè.

⁸Dom mo kalak simbalu i nagerri ndènè, lebbihen bagè kersik sinibiding laut buèna. Bunuhenku mo kalak tikan bajar dèng ia dungna mpersah mo iakap inang kalak i. Sinderrang tengah ari kupasulak mo taba kalak i sada kalak pengago gabè mbiar mo kalak i janah bulisah.

⁹Pertua ibages sikepatèen anak pitu pangsan kerna seldak kessahna. Enggo gellap ari nggelluhna, bagè sinilèaen ngo pengakapna janah epemèla. Kupasulak mo musuh-musuh ndènè lako mengago kènè singgelluhna dèng i tengah-tengah ndènè nai. Aku, JAHOWA, ngo sienggo mendokken i.”

¹⁰Sial ma mo tuhu aku èn! Mahan kadè kin ngo ndia aku itubuhken inangku? Dak ngo aku kennah merubat bak pesoal dekket karina kalak sininagerri en. Tukasi pè aku oda nung pejualken barang pè merjual, tapi bagi nola pè karina jelma ngo menumpahi aku.

¹¹Alè JAHOWA, mula tuhu ngo gia oda kuulaken ulaenku selloh, janah oda mempebèlai karina musuh i hadeppenmu tikan sempa bai kalak i mara bak kesusahen belli mo sumpah kalak i tuhu-tuhu masa. (

¹²Sada kalak poda ndorok memenggelken bessi, tuana mo bessi sini utara nai sienggo isakkor dekket tembaga.)

¹³Nina JAHOWA mo taba aku, “Pasulakkenku mo musuh lako mengaum kinibèak bak harta bangsangKu sikira hukumen kerna dosa-dosa sienggo iulaken kalak i i suberri nagerri.

¹⁴I nagerri sidèban siso nitandaen kalak i, bakinenku mo kalak i gabè hamba musuh-musuh kalak i, kumerna enggo nggerger lagangKu bagè api mergollah-gollah janah oda uè mèntep.”

¹⁵Nai ningku mo, “Alè JAHOWA, iantusi kono ngoi. Èngèt mo janah urupi mo aku. Bales mo pemahan kalak i simengeletlet dekket simendersa aku. Ulang mo sobarsu kono midah kalak i asa ulang nahan saut ibunuh kalak i aku. Engèt mo kumernaken kono ngo aku ilèai.

¹⁶Mongkam ngo kono taba aku, janah kudengkohken ngo nasa ranaMu. Kono ngo sidasa aku, alè JAHOWA Dèbata Pergegoh Sisotercodi, kumerna i maing pesènangken janah pesampangken atèngku ngo karina ranamu.

¹⁷Oda ngo dekket aku mersennang-sennang dekket kalak simertumpu lako kumiali. Kerna tunduk baMu, nai punjung ngo aku merdengan laga.

¹⁸Kasa dak terrus ndersa sambing akapenku? Kasa mo mparah ugahku janah oda uè njuah? Mada ngo ndia ko mertaki lako memaingken aku terdehèrep bagè laè si gabè ngkerrah tikan mosin leggo?”

¹⁹Ialoi JAHOWA mo, “Mula balik kono, Kujalo ngo kono. Gabè mengulaki nola mo kono naposongKu. Mula isukutken kono ngo tersèngèt simerguna janah oda kata luap, nai ndorok nola mo ko balik gabè nabingKu mengolihi. Merrohen nola mo kalak bamu, janah oda perlu nèngè kono laus mendahi kalak i.

²⁰Kubaing mo ko bagè bèntèng tembaga bai kalak i. Ijuhap kalak i mo kono, tapi oda tertalukensa kono. Dengnganenku ngo kono lako menjamotken bak paluahken kono.

²¹Paluahenku mo kono tarap kuasa kalak jahat si kejam i nai. Aku, JAHOWA ngo, simendooken i.”