Read Batak Dairi Jeremia 16 Bible Online

Jeremia 16 - Batak Dairi bible

Jeremia 16

¹Mongkam nola mo JAHOWA taba aku, nina mo,

²“Ulang mo ko kabin janah merdukak i bekkas ènda.

³Ranaenkenku pè bamu kadè sinaing masa meradepken anak-anak situbuh i sèn dekket meradepken partuana.

⁴Mermatèen mo kalak i ibakin sakit simerembah kessah laus, janah ripput mo kalak i ibas geraha barang matè kelèhèen. Sada kalak poda menangisi barang pè menanem kalak i. Sompar-baèr mo bangkè kalak i bagè napu i tanoh, janah ipaguti manuk-manuk bagi ma ipangani binatang rambah.

⁵Ulang mo laus ko mi bages kalak si tupung mersindanggel, alè Jeremia. Ulang bonek ukurmu kemulihken barang isè pè. Oda nèngè pasupasuenkenku kiniduma bai bangsangKu, janah oda nè ma kupacidah kelleng atè barang masèh atèngku bai kalak i.

⁶Mermatèen mo kalak sibèak dekket kalak sincor i nagerri èn oda lot simenanem kalak i. Sada kalak poda lot mendersa dirina barang pè menggonting buk takalna sikira tanda merbonek atè bai kalak i.

⁷Oda ma lot isè si uè memaingken perpulungen mersodip lako mengapoi kalak simersindanggel. Oda lot kalak sidekket merbonek atè agia nola pè meradepken kalak sikepatèen bapa barang pè inang na.

⁸Ulang mo mbengket mi bages kalak situpung merpèsta. Ulang mangan bak mènum rebbak dekket kalak i.

⁹Dengkohken mo kadè sinaing kudokken, Aku, JAHOWA Pergegoh Sisotercodi, Dèbata Israel. Kupetadi mo karina sora oang-oang dekket sampang atè bagi bak kinimeriah pèsta merbayo. Idahen kalak singgelluh ibas sundutmu ènda dèng ngo simasa i.

¹⁰Mula ipesakat kono èn karina taba kalak i, tah bakunè ikusoken kalak i — kasa uè aku menghukum kalak i bagidi mposina. Kusoenken kalak i mo kadè kesalahen bak dosa kalak i meradepken Aku, JAHOWA Dèbata kalak i.

¹¹Dokken mo taba kalak i magahken bagèen ngo ningku, ‘Enggo itadingken empung ndènè Aku, lako mersembah dekket menguèi dèbata sidèban. Ipersomada kalak i ngo Aku janah oda uè merpenguèi taba karina hatorenKu.

¹²Tapi jahaten dèng ngo siniulaken ndènè. Mpihir ngo ukur ndènè, janah pellin mengèkutken nipergeddo ukur ndènè sijahat i sendiri. Oda kènè nggèut merpenguèi taba aku.

¹³Kumarna i pepuarenku mo kènè i nagerri ènda nai janah Kubuang mi sada nagerri siso nung itandai kènè bak empung ndènè. I sidi mo kènè mersembah mahar ari berngin taba dèbata dèbata sidèban, janah oda nè mo aku mermasèh atè taba kènè.’ ”

¹⁴Nina JAHOWA mo, “Roh mo katikana oda nèngè kalak merbulaban merkitè aku, Dèbata singgelluh, simerembah bangsa Israel mbungkas i Mesir nai,

¹⁵tapi kumernaken Aku, Dèbata singgelluh, simerembah bangsa Israel karuar i sada nagerri i utara dekket i karina nagerri sidèban i bekkas kalak i enggo kupemèrap. Babaenku mo kalak i balik mi lebbuh kalak i, nagerri sienggo Kuberrèken bai empung kalak i.”

¹⁶Nina JAHOWA mo, “Naing kudilo mo mèduk perikan lako menangkup kalak èn. Kessa i diloenku ma mo mèduk perburu lako merburu kalak i i gennep delleng dekket uruk bak i liang liang uruk batu.

¹⁷Kuidah ngo nasa siniulaken kalak i. Oda lot mboni baKu; enggo ngo kuidah karina nasa dosa-dosa kalak i.

¹⁸Balesenku mo dosa dekket kejahaten kalak i merkitè hukumen dua kali lempit, kumerna enggo ilamuni kalak i nagerringKu merkitè mbuè sembahen. Ukum sembahen sembahen idi oda ngo merkessah to`se bagè bangkè.”

¹⁹Alè JAHOWA, kono ngo menjamoti aku dekket memerèken gegoh baku; iurupi kono ngo aku tikan masa kepènjetten. Merrohen mo bangsa-bangsa i punca tanoh èn nai mendahi kono janah mendokken, “Ukum empung nami pellin dèbata siso tuhu ngo kessa lot bana siso lot gunana.

²⁰Ndorok kin mo jelma memahan dèbatana sendiri? Tentu oda! Sinibahanna idi pasti oda Dèbata.”

²¹“Kumerna i,” nina JAHOWA, “sikali èn bakinenku mo bangsa-bangsa mengakapken kuasa bak kegegohenKu asa bettohen kalak i soh mi amman sumendah Aku ngo JAHOWA.”