Read Batak Dairi Jeremia 17 Bible Online

Jeremia 17 - Batak Dairi bible

Jeremia 17

¹Nina JAHOWA mo, “Alè bangsa Juda enggo terokir dosamu ibas pusuh peratèenmu dekket ibas karina soki langgatenmu merkitè bulpen bessi simermata intan.

²Orang-orangmu mersembah taba langgaten-langgaten dekket tihang-tihang sienggo ipajek bai sembahen Asyera i gennep kayu sintemtem, i babo-babo uruk,

³dekket i delleng-delleng i ruar kuta. Kumernaken karina bekkas pemèlèen taba gana-gana si enggo ipajek kènè i suberri nagerri deket kumarna karina dosa sienggo iulaken kènè, nai bakinenku mo karina musuh ndènè mengaum nasa harta bak kinibèak ndènè.

⁴Terpaksa mo kènè kennah menohken tanoh sienggo Kuberrèken i bai ndènè i, janah bakinenku mo kènè tunduk taba musuh ndènè i nagerri siso nitandaen ndènè. Kubakin pè karinana idi kumerna lagangKu singgerger i ngo tosè bagè api mergolah-gollah janah oda ndorok terènteppen.”

⁵Nina JAHOWA mo, “Mula itadingken dèba Aku, Jahowana, janah merketoken ia bai jelma, ninganna tunandè mi kegegohenna nai hukumenKu mo ia.

⁶Codi bagè suan-suanen situbuh i jampalen ngo ia, i tanoh ndagal, melongo janah mersira, oda nung iakapi simerandal.

⁷Tapi ukum kalak simerketoken taba Aku, dak ngo pasu-pasuenKu.

⁸Codi ngo ia bagè kayu sinibiding laè menjarir; uratna menjoror sakat mi laè. Oda pella ikebiari mosin leggo, dak ngo meratah bulungna. Tukasi nola pè karina nagerri kelleggoen, oda bulisah ia kumerna dak ngo ia tong merbuah.

⁹Ukur jelma oda terasak, terliciken ibas karinana nai janah mparahsu ngo sakitna.

¹⁰Aku, JAHOWA ngo, simeniahi ukur, simengoji pusuh peratèen jelma. Gennep jelma Kubalesken mo rembang mi pekilakona, janah bakinenkenku bana rembang mi pemahanna.”

¹¹Codi bagè manuk-manuk memedemken siso naruhna, bagidi ngo kalak siso bujur merolihken harta. Sinderrang sitengah umur dèng pè ia mago mo karina hartana. I punca nggelluhna terdapet mo ia kalak simotona kalohon.

¹²Codi bagè tahta simermulia ngo Bages JAHOWA, i delleng sindates i mulana nai.

¹³Alè JAHOWA, kono ngo kettoken Israel, bangsaMu; karina kalak simenadingken kono kennah gabè termèla. Mersep mo kalak idi i dunia ènda nai janah laus mi dunia kalak si matè. Kumerna, kono ngo benna laè mul kenggeluhen enggo itadingken kalak i, alè JAHOWA.

¹⁴Alè JAHOWA, pemalum mo aku, asa gabè njuah njerdik aku. Perkinijuahi mo aku, asa njuah-njuah aku. Pellin kono sambing ngo kupersangapi! Idokken dèba mo taba aku,

¹⁵“Apaina ma mo karina asup JAHOWA idi? Bagèndari ma mo nemmu ibakinken!”

¹⁶Tapi, alè JAHOWA, oda nung aku meneksek asa ipesempa kono olpek taba kalak i. Aku pè oda ngo lemmo ètongenku asa idendenni sindanggel kalak i. Ibettoh kono ngo idi alè JAHOWA. Ibettoh kono ngo barang kadè sikuruapken.

¹⁷Ulang mo kono gabè pebiarken ukurku. Kono ngo bekkas percibonienku mula roh kepenjetten.

¹⁸Katerra pe kalak simengeletlet bak simenèndes aku, pemèlaenmu mo janah dom mbiar ibakin kono. Tapi ulang mo bakin bagidi taba aku, alè JAHOWA. Baing mo roh jèkat taba kalak i sampè dung kalak i salpun karina.

¹⁹Idokken JAHOWA mo taba aku, “Alè Jeremia laus mo ko mi Pèntu pengkeruhen Ginemgem sibellusen raja-raja Juda mula lako ruar dekket mbengket mi kuta. Laus ma mo kono mi karina pèntu pengkeruhen sidèbanna i Jerusalem.

²⁰Pesakat mo tennahKu taba raja-raja dekket karina pengisi Jerusalem simemellus arap pèntu-pèntu idi.

²¹Dokken mo bagèen: ‘Mula naing kènè ulang matè katè ndènè ulang mo kènè merembah embahen tikan ari Sabat, barang merembah embahen mbengket arap pèntu pengkeruhen Jerusalem.

²²Ulang memahan bahaen barang merembah barang kadè pè ka ruar i bages ndènè nai ipas ari Sabat. Kellini mo ari idi lako keperluen baku bagè sienggo kuperèntahken taba empung ndènè.

²³Tapi ukum empung ndènè oda ngo uè mendengkohken barang pè mendatèken kadè sikudokken. Jèngèng ngo kalak i, janah oda nggèut merpenguèi barang pè pincangen.

²⁴Uèi mo karina perèntahKu. Ulang embah barang kadè pè memellus arap pèntu pengkeruhen kuta èn ipas Ari Sabat. Kelini mo, ari Sabat lako bangku janah ulang mo mengulaken barang kadè pè ipas ari idi.

²⁵Mula tuhu-tuhu ngo kènè mengulaken karina nasa pèrèntahKu idi, nai raja-raja dekket pugabè simemerèntah bagè si Daud mo memengketti pengkeruhen-pengkeruhen kuta Jerusalem. Rasken mo kalak i dekket kalak Juda bak pengisi Jerusalem mengkunduli kerèta merkuda, nai rami kalohon mo kuta Jerusalem.

²⁶Merrohen mo kalak i kuta silot i Juda nai dekket i sosor-sosor sikuliling Jerusalem nai; merrohen ma mo kalak i i ladang kalak Benjamin nai, i ladang pispis delleng i ladang uruk-uruk nai, dekket i Juda sikan selatan nai. Iembahi kalak i mo mi BagesKu pinakan mahan pèlèen, bang silako tutungen bak pè oda, bagi ma pèlèen pagè dekket kemènjen bak pèlèen lias atè.

²⁷Karinana idi masa mula tunduk kènè taba aku janah mengkemeduken ari Sabat lako baku. Ulang embah kènè embahen barang kadè pè memellus arap pèntu Pengkeruhen Jerusalem ibas ari idi. Mula ilausi kènè karina pèrèntahKu idi, karinana pèntu-pèntu pengkeruhen Jerusalem bak istana-istana kulekkup, kerri janah oda terènteppen api idi.’ ”