Read Batak Dairi Jeremia 18 Bible Online

Jeremia 18 - Batak Dairi bible

Jeremia 18

¹Nai idokken JAHOWA mo taba aku,

²“Laus mo ko mi bages siteppa koden; i sidi mo Kubagahken tennahKu bamu.”

³Nai laus mo Aku mi bages siteppa koden janah kudapet mo ia tupung karèjo i pemoterenna.

⁴Mula tupung kessa koden sinipekadèna i kurang selloh, ibahan nola mo gabè koden sidèban bagè sinipergeddo ètongenna.

⁵Nai ipasulak JAHOWA mo aku mendokken taba bangsa Israel,

⁶“Alè kènè bangsangKu, mèter oda mo terbaing Aku taba kènè bagè sinibakin tukkang teppa i meradepken tanoh dendangna? Bagè tanoh dendang i tangan siteppa koden, bagidi ma ngo kènè i tanganKu.

⁷Mula tupung sada katika Aku memutusken lako mengeranggutken, mengerentuhken, dekket mengelalaken sada bangsa barang pè kerajaen,

⁸nai mènter tobat bangsa i ibas dosana nai, nai sondatenku mo niatKu idi.

⁹Balikna nola, mula enggo kutetahken lako pejengjengken barang pè petegguhken sada bangsa barang kerajaen,

¹⁰tapi mènter nola mo bangsa idi oda nè merkebiaren baku ninganna mengulaken jahat, nai sondatenKu mo niatku idi.”

¹¹Nina JAHOWA mo taba aku, “Bagèndari pè, dokken mo taba kalak Juda dekket pengisi Jerusalem ukum Aku tekka ngo memaing sura-sura lako mengalo kalak i dekket pehantarken hukumen taba kalak i. Dokken mo kalak i petadiken pengelako kalak i simerdosa i bagi lako pesellohken pekilako bak ulah-ulah kalak i.

¹²Tapi ialoi kalak i mo, ‘Kadè mo gunana i? Dak ngo kuempet kami mengekutken gerrek atè nami! Gennep ngo kami naing mengulaken cibellek ukur nami si jahat i!’ ”

¹³Nina JAHOWA mo, “Kusoken mo mi gennep bangsa tah nung ma masa bagèen. Enggo iulaken bangsa Israel ulaen ngerri!

¹⁴Oda nung mersep hembun batu i delleng batu i Libanon nai. Oda nung kin laè mbarngap menjarir i delleng nai gabè ngkerrah.

¹⁵Tapi ukum bangsangKu enggo mo lupa baku, janah enggo menutung dahupa nola kalak i taba sembahen sidèban. Tertuktuk ngo kalak i i dalan arnia si kennah bellusen kalak i, nai sumirpang nola mo mi dalan si mak dèng i pedèas.

¹⁶Enggo ibakin kalak i nagerri èn gabè bekkas memaing merdeggar pendurungen, janah soh mi amman sumendah gabè sirèhè-rèhèen. Karina simengelausisa mengupirken takalna kumerna bejogitenna.

¹⁷Codi bagè abu tanoh isempul angin kebincaren, bagidi ngo bangsangKu naing pesakatenku mi lebbè musuh. Mula roh kessa jèkat, tondalenkenku mo kalak i janah oda urupenku kalak i!”

¹⁸Idokken dèba mo, “Aci mo kita mertumpu mengalo si Jeremia. Oda pellin ia kessa ndorok mengerana taba Dèbata. Dak ngo lot imam sindorok memerèken perguruen, lot ngo kalak bijak sindorok memerèken ajar; janah lot ngo nabi sindorok pesakatken taba kita tennah bai Dèbata nai. Aci mo siaduken ia mi perhukumen janah ulang nè sidengkohken ranana.”

¹⁹Nai mersodip mo aku, “Alè JAHOWA, dengkohken mo sodipku; datèken mo kadè sinidokken musuhku tersèngèt mi diringku!

²⁰Mènter patut mo balesenken simerandal dekket kejahaten? Tapi enggo ngo ikurak kalak i geddung asa ndabuh aku mi bagessen. Engèt mo magahken enggo kubèla kalak i i lebbèMu, asa ulang melaga kono taba kalak i.

²¹Tapi ukum bagèndari, alè JAHOWA belli mo mermatèen dukak-dukak kalak i kelèhèen barang pè matè ibas geraha. Belli mo daberru-daberru kalak i kembalangen sinibalèna bak dukakna; belli mo horong anak laki matè kumerna sakit wabba dekket anak perana matè ibas geraha.

²²Pasulak mo sintempu roh penamun mi bages kalak i, asa derru-derru kalak i buradan. Enggo ikurak kalak i geddung asa ndabuh aku mi bagessen, janah enggo itogong kalak i banto lako menangkup aku.

²³Tapi ukum kono, alè JAHOWA, ibettoh kono ngo karina taki-taki kalak i lako mendungi kessahku. Kumerna i ulang mo ampuni kesalahen kalak i; ulang mo sasa kesalahen kalak i. Ligas mo kalak i sampè galdap. Bakinken mo taba kalak i lagaMu.”