Read Batak Dairi Jeremia 19 Bible Online

Jeremia 19 - Batak Dairi bible

Jeremia 19

¹Ipasulak JAHOWA mo aku menokor goci dekket mengarahken barang piga-piga kalak pengulu bangsa bagi imam imam sienggo tua-tua,

²lako berkat rebbak dekket kalak i mi Napa Hinom arap Pèntu Pengkeruhen Beling. Kennah ngo aku kimongmongken i bekkas i kadè sinitennahkenNa baku.

³Kennah dokenkenku ngo bagèen, “Alè raja-raja Juda bak pengisi Jerusalem! Dengkohken mo barang kadè sinaing dokenkenku bai ndènè Aku, JAHOWA Pergegoh Sisotercodi, Dèbata Israel. Pemasaenku mo jèkat mbellen mi babo bekkas ènda, nai tersengget mo kalak simendengkohsa.

⁴Kubakin bagidi kumerna enggo itadingken bangsa èn Aku. Ilamuni kalak i ngo bekkas èn merkitè memèlèken pèlèen taba dèbata-dèbata siso nitandaen kalak i, bai empung simengusurken kalak i dekket raja-raja Juda. Bagi ma enggo idomi kalak i bekkas èn dekket daroh kalak siso mersalah.

⁵Ipejengjeng kalak i ngo langgaten bai dèbata Baal lako memèlèken dukak-dukak kalak i sikira pèlèen situtungen, kepeken oda nung kalak i kudokken lako mengulaken bagidi, baliksa nung poda turah bagi ibas pikirenKu.

⁶Kumerna i, dapet mo katikana bekkas èn oda nè igerari Tofet barang pè Napa Hinom, tapi Napa Pengerabbaten nola mo.

⁷I bekkas èn mo sondatenku karina taki kalak Juda bak pengisi Jerusalem. Bellinku mo kalak i italuken karina musuh-musuh kalak i janah ibunuh ibas geraha. Bangkè kalak i pè ibelli mo ipaguti manuk-manuk dekket ipangani binatang sinirambah.

⁸Pesempaenku mo jèkat tengngam kalohon mi babo kuta ènda dungna gennep kalak simentas i sidi kennah tersengget janah mali tendi.

⁹Kaliangen musuh mo kuta ènda, janah mertaki lako memunuh pengisina. Bagi mo jibuna pengepungen i, dungna kalak sinibagasen kuta ènda pè gabè mersipangan bana, soh mi dukak-dukak kalak i sendiri.”

¹⁰Kessa bagi idokken JAHOWA mo aku memustakken goci i i lebbè kalak simengèkutken aku.

¹¹Kennah ngo dokenkenku taba kalak i magahken enggo idokken JAHOWA Pergegoh Sisotercodi bagèen, “Lalaenkenku mo bangsa dekket kuta èn asa codi bagè goci simpustak idi oda nèngè ndorok terpekadè. Tanemen ndèba mo bangkè-bangkè kalak i i Tofet, kumerna oda lot nèngè bekkas pendèban sidèban.

¹²Ia kuta èn dekket pengisina bakinenku mo bagè mi Tofet.

¹³Karina bages sini Jerusalem, dekket karina bages raja-raja Juda, kennah melamun bagè Tofet; kumerna i bungkulen karina bages karina kalak enggo menutung dahupa taba dèbata langit, dekket memèlèken anggur bai dèbata sidèban.”

¹⁴Nai kutadingken mo Tofet bekkasku ipasulak pesakatken tennah JAHOWA. Laus mo aku mi kasèan Bages JAHOWA janah cènder i si, nai kubagahken mo taba karina kalak,

¹⁵ia ukum JAHOWA Pergegoh Sisotercodi, Dèbata Israel mendokken bagèen, “Kumerna jèngèng ngo kènè janah oda uè mendengkohken Aku, nai kupesempa mo mi kuta ènda dekket mi karina kuta silot i kumaliangna nasa jèkat sienggo Kurencanaken.”