Read Batak Dairi Jeremia 2 Bible Online

Jeremia 2 - Batak Dairi bible

Jeremia 2

¹Ipasulak JAHOWA mo aku kitingtingken berita ènda bai karina kalak i Jerusalem, “Alè Israel, Kuèngèt ngo bagi setia kono tikanna poso dèng kono; soh mo belgahna kelleng atèmu tikan ambong belagen dèng kita. Mi padang gurun pè iekutken kono ngo Aku memellus tanoh siso tersuanen.

³Alè Israel, milikKu sadaku ngo, tampuk pusuh-pusuhKu kekelengen atèngKu. Kupesempa ngo jekat taba karina simemakin kono gabè ndersa, Aku, JAHOWA ngo, sienggo mendokken i.”

⁴Dengkohken mo tennah JAHOWA, alè kènè pemparen si Jakob, marga-marga Israel!

⁵Nina JAHOWA ngo, “Kesalahen kadè ngo ndia jupa empungmu taba Aku, asa gabè iselbuh kalak i Aku? Ijalangi kalak i ngo sembahen siso maharga janah kalak i sendiri ngo gabè merlèa dungna.

⁶Oda isarihken nè aku; Aku, sienggo meneggu-neggu kalak i i dalan, janah merembah kalak i mbungkas kan Mesir nai mengelausi padang gurun, tanoh dakkir simbuè kelbak-kelbukna, bana ngkerrah bagi ma mermara — tanoh siso kianen janah siso nung ibellus!

⁷Kutaruhken ngo kalak i mi nagerri simerandal tanohna lako mengakapi nasa hasil dekket simerandal i sidi. Tapi i sidi ngo tanohKu ilamuni kalak i janah gabè meronah ibaing kalak i silot bangku.

⁸Oda lot imam simengkusoken barang i dikè Aku, JAHOWAna. Simemettoh hukum pè oda ibettoh barang isè Aku, memberontak ngo perkuasa taba Aku. Merkitè gerar Baal ngo nabi-nabi mengerana, janah menembah sembahen siso merguna.”

⁹Nina JAHOWA mo, “Bagèndari pè kuperkaraken nola mo bangsangKu, janah Kuadili pinemparna.

¹⁰Dalani mo mengèkut-ngèkut pesisir Siprus kettan kesunduten, pasulak mo kalak dempak kebincaren mi nagerri Kedar, perrèso mo selloh i sidi, tah nung ma lot masa tosè bagidi?

¹¹Oda dèng lot nung sada bangsa menggancih dèbatana tukasi pè idi oda Dèbata situhuna. Tapi, bangsangKu enggo menggancih Aku, sipesampang atè kalak i dekket siso ndorok memakin barang kadè pè.

¹²Kumerna i, alè langit, dumegger mo ko! Bengngap janah menggirgir mo ko!

¹³Dua bagè ngo dosa iulaken bangsangKu: itondali kalak i Aku, mata mul simemerèken kenggeluhen bai jelma; ibahan kalak i ngo bana bendar ntelpus siso ndorok menennak laèna.”

¹⁴“Oda ngo hamba ukum Israel, oda ma pinempar hamba. Tapi kasa mo ia enggo gabè benduten alona?

¹⁵Merngengngeng ngo musuhna tabasa bagè singa, ndagal ngo ibakin tanohna janah terulang, kerri karina kutana ipangan api, ibelli terulang oda lot pengisina.

¹⁶Alè Israel igonting kalak Memfis dekket kalak Tahpanhes ngo buk takalmu.

¹⁷Kono sendiri ngo memakinken karina simasa ibas dirimu, kerna tikan Kuteggu-teggu kono i perdalanen, itondalken kono ngo Aku, JAHOWA Dèbatamu.

¹⁸Kadè mo labana kono mi Mesir? Lako naing menum batang Laè Nil ngo? Kadè ma mo labana laus ko mi Assur? Lako naing menum batang Laè Efrat ngo?

¹⁹Kejahatenmu sendiri ngo menghukum dirimu, tersiksa mo kono kumerna itulak kono Aku, Dèbatamu. Bagèndari pè akapi mo bakunè pagit dekket mpiahna mula itondalken kono Aku janah oda ipesangap kono. Aku, JAHOWA Dèbatamu enggo mendokken; Aku ngo Jahowa Dèbata Sintèmbul kalohon janah Pergegoh Sisotercodi.”

²⁰Nina JAHOWA ngo, “Enggo ndekkah kono oda nggèut tunduk baKu; oda nggèut menguèi barang menembah Aku. Ibabo gennep uruk sindates, dekket i terruh gennep kayu ntemtem isembah kono ngo sembahen-sembahen simaing meppar.

²¹Kusuan ngo kono bagè kayu anggur siKupilih ipas bennih simerandalna nai. Tapi bagèndari enggo mobah ko, gabè suan-suaen meriar janah oda merlapaten.

²²Agia nola pè meridi ko merkitè memakè sabun mbuè kalohon, tapi ukum sikat-sikat kesalahenmu dak tong ngo taridah baKu.

²³Mboho ma mo kono mendokken oda kono meronah, janah oda nung nimu ièkutken kono Beel! Tengngen mo barang bakunè pekilakomu i gennep lembeng, èngèt mo kejahatenmu janah akui mo! Codi bagè onta berru-berru ketagien ngo kono, lojang mi jèhè mi julu oda mertentu,

²⁴nai mbengket mi padang gurun melongo. Oda ndorok tercèkèpen ia mula tupung kessa naing rèdi. Oda perlu tulus-tulus si sèkel tabasa, kumerna sidang merrèdi dak ngo ia mendoroken dirina.

²⁵Alè Israel, ulang mo kono lojang menjalang dèbata-siso tuhu, janah ulang mo ko mersurak mendiloi kalak i, nahan terdengdeng nèhèmu janah ngkerrah bergengmu kerna muasen. ‘Malot i, ulang harapken nè aku balik,’ nimu mo, ‘kerna kelleng ngo atèngku taba dèbata sidèban, janah uè mengekutken kalak i.’ ”

²⁶Nina JAHOWA mo, “Codi bagè penangko termèla tikan tertangkup, bagidi mo kè karina mèla ma mo iakap kènè, alè kènè kalak Israel, raja-raja dekket pugabè ndènè, imam-imam dekket nabi-nabi ndènè!

²⁷Kennah ipemèla mo kènè, kerna simpenggel kayu ngo idilo kè bapa ndè janah singkabuah batu idokken kè inang ndè. So lot giam roh kènè mendahi Aku, balikna itadingken kè nola ngo Aku. Tapi mula roh kessa mo kinimpersah, Aku mo itenggoi kènè asa roh lako paluahken kènè.

²⁸Idikè ngo enggo sembahen sembahen sinibahan ndènè i? Mula lot kepenjetten dokken mo kalak i lako paluahken kènè, tah terbaingsa ma! Alè Juda bagè buè kutamu ngo buè sembahenmu!

²⁹Menter kadè mo ndia siso sennang iakap kè tersèngèt Aku asa mènter ialo kènè Aku?

³⁰Percuma sambing ngo kènè Kuhukum, kerna so uè kènè menjalo sipesèngèt. Codi bagè singa simenggasa, bagidi ngo kènè memunuh nabi-nabi ndènè.

³¹Alè bangsa Israel dengkohken mo ranangKu ènda. Nung ma ngo dahkè Aku bagè padan gurun barang pè bagè tanoh gellap bulita taba kènè? Tapi kasa mo idokken kènè naing kè katendènè bèbas, janah oda uè nèngè balik taba Aku?

³²Mèter lot kin mo katè ndènè simerbaju mengelupaken perhiasenna, barang pè daberru sinaing sijahè mengelupaken pakkèenna lako sijahè? Tapi ukum kènè enggo ndekkah kalohon mengelupaken Aku — oda terkira nèngè barang sadikè enggo dekkahna.

³³Pandè tuhu-tuhu ngo kè mengatur taktik lako memuat ukur sinikekelengenmu. Sibabijalang siluhlahna kalohon pè ndorok dèng ngo merguru bamu nai!

³⁴Meronah ngo pakènmu kenna daroh kalak sincor bak kalak siso mersalah, oda ngo daroh penangko si kenna tangkup. Bagidi nola pè,

³⁵idokken kènè ngo magahken oda kènè mersalah, oda nèngè Aku melaga taba kènè. Tapi Aku, JAHOWA, hukumenku mo kènè kumerna oda kènè uè mengaku salah ndènè.

³⁶Ndor kalohon ngo kènè mènter laus mengido urup taba sembahen sidèban! Pasti ngo kennah terdehèrep kènè ibakin kalak Mesir, dos bagè tikanna terdehèrep kènè ibaing kalak Assur.

³⁷Terdehèrep janah mela ma mo kènè menadingken Mesir. Aku, JAHOWA, enggo menulak kalak siniasangken ndènè i; oda lot kadè dapet kènè laba bai kalak idi nai.”