Read Batak Dairi Jeremia 20 Bible Online

Jeremia 20 - Batak Dairi bible

Jeremia 20

¹Ia imam Pasyhur anak si Imer imo mandur huntuen Bages JAHOWA. Tikan idengkoh ia aku kimongmongken karinana idi,

²idokken mo asa itendel aku janah ibèangken i Pèntu Pengkeruhen Benjamin, pèntu kettan dates i Bages JAHOWA.

³Siceggenna nola enggo kessa ipaluah si Pasyhur aku i bèangen idi nai, ningku mo tabasa, “Ukum gerar siniberrèken JAHOWA bamu oda nè ngo si Pasyhur, tapi ‘gontar barang m dike sambing.’

⁴JAHOWA sendiri mendokken, ‘Kubaing mo ko mbiar taba dirimu sendiri dekket taba dengngan-dengnganmu. Idahenmu mo kalak i ibunuh musuh kalak i. Karina kalak Juda Kubelli gabè ikuasai raja Babel; deba bai kalak idi nai itaban mo mi Babel, janah sitadingna ibunuh mo.

⁵Kubelli mo musuh kalak idi bagi ma mengerampasi dekket merembah mi Babel karina kinibèak kuta èn, bak karina ugasenna, bagima dekket karina barang pusakka raja-raja Juda pè.

⁶Janah ukum kono, alè Pasyhur rasken kadè-kadèmu pè itangkup janah iembah mo mi Babel. Matè mo kono i sidi janah itanem; bagi ma ngo bak karina dengnganmu sienggo mendengkohken karina luapmu.’ ”

⁷Alè JAHOWA, ièlèk-èlèk kono ngo aku janah enggo terèlèk aku. Mergegohen ngo kono daripada aku janah enggo ipetunduk kono aku. Gennep ngo kalak mengerèhè aku, ilèai ceggen nai soh mi ciboen.

⁸Gennep aku mongkam, kennah ngo aku mersurak tuk gegohku, “Kekejamen! Kemagoen!” Alè JAHOWA, irèhè janah ilèai ngo aku gennep tèk, kumernaken pesakatken tennahMu.

⁹Tapi mula ibagasen ukurku ningku ngo, “Belli mo bagi kulupaken sambing mo JAHOWA, oda mo uè nèngè aku mengerana merkitè gerarNa,” nai bagè api mo tennahMu mengilas ibas pusuh peratèenku. Enggo kucuba menahanken, tapi keppèken oda tergongken aku.

¹⁰Terdengkoh ngo kalak i dikè-dikè merkosik, “Kebiaren nai ngo kumasèbut! Aci mo siaduken ia taba perkuasa!” Baliksa tupèh karina supan-supanku memèma kededabuhku. Nina kalak i ngo, “Tah bakunè merkitè èlèk-èlèk, ndorok ia sitaluken, asa ndorok kita memalesken hellemta tabasa.”

¹¹Tapi ukum kono alè JAHOWA, kettan aku ngo ko; mergegoh kalohoen ngo kono janah mahantu. Kalak simengeletlet dekket simendersa aku kennah geppah janah oda mergoldè. Termèla mo kalak i soh mi sidekkahna, sondat mo karina taki-taki kalak i. Kinilèa kalak i pè kennah ngo dak ièngèt.

¹²Tapi, alè JAHOWA Pergegoh Sisotercodi, ntèger ngo ioji kono jelma i; ibettoh kono ngo ukur bak pikiren kalak i. Kumarna i duè mo aku mengidah kono kibales kejahaten musuh kerna taba kono ngo kusohken simasa baku.

¹³Endèken mo JAHOWA janah poji mo Ia kerna ipaluah Ia ngo kalak sitertokoh merkitè kuasa kalak durhaka nai.

¹⁴Merjaya mo ari pertubuhku! Dolien kin mo merlèa aku tikan itubuhken inangku.

¹⁵Merjaya ma mo kalak simerembah sukuten simemakin bapangku merlolo atè kalohon, tikan ibagahken tabasa, “Dapetten sada dukak daholi ngo ko!”

¹⁶Belli mo simerembah sukuten idi dos bak karina kuta sinilala JAHOWA oda nè lot masèh atèna. Belli mo ia mendengkoh kalak mendeherreng mpiah tikan sicegen dèng, dekket surak-surak geraha cèger ari.

¹⁷Kumerna oda ibunuh aku sidang ibas kurungen manik dèng aku, asa dak tong aku ikurungen manik inangku janah beltekna gabè sikira pendèbaen baku.

¹⁸Kasa mo aku kennah itubuhken? Pellin lako ndersa dekket asa susah sambing ngo? Janah asa memellus bagi sambing ngo nggelluhku pellin ibas termalu?