Read Batak Dairi Jeremia 21 Bible Online

Jeremia 21 - Batak Dairi bible

Jeremia 21

¹Ia si Zedekia raja Juda ipasulak ngo mendahi aku Imam Pasyhur anak si Malkia, dekket Imam Zepanya anak si Maaseya. Idokken ngo kalak i pesakatken taba aku pengidoen ènda,

²“Pido mo petunjuk bai JAHOWA nai man banta, kumerna sidang ikubu si Nebukadnezar raja Babel dekket tenterrana ngo bagèndari kutanta ènda. Tah bakunè ibaing JAHOWA kelengangen taba kita, janah memaksa si Nebukadnezar mendokken asa balik sondar rombongen tenterrana.”

³Nai mongkam mo JAHOWA taba aku, nai kudokken mo pasulakken i

⁴memagahken taba si Zedekia ukum JAHOWA, Dèbata Israel, bagèen ngo idokken, “Alè Zedekia, kutaluken mo tenterramu simergeraha mengalo raja Babel dekket tenterrana. Pegukgukenku mo karina sinjata tenterra-tenterramu i tengah-tengah kuta.

⁵Aku sendiri ngo mengalo kènè merkitè kegegohenku dekket merkitè lagangku nggerger i.

⁶Bunuhenku mo pengisi Kuta èn; bang jelma bak binatang mermatèen mo kumerna sakit wabba sintengngam idi.

⁷Ukum kono dekket pugabè-pugabèmu bagi dekket kalak simpellut i pergerahaen nai, kan kelèhèen dekket sakit wabba nai, karinana Kubelli itangkup Raja Nebukadnezar dekket musuh-musuh simertaki naing memunuh ko. Bunuhen si Nebukadnezar mo kènè karina oda lot ampunen bana, janah oda lot masèh atèna. Aku, JAHOWA ngo, sienggo mendokken i.”

⁸Nai ipasulak JAHOWA nola mo aku mendokken bagèen taba bangsaNa, “Dengkohken mo! Aku, JAHOWA memerèken bai ndènè pilihen: Dalan menuju kenggeluhen ngo barang dalan menuju kematèen.

⁹Gennep kalak simerian ibagasen kuta matè mo kumerna geraha, kelèhèen, barang pè kerna sakit wabba. Tapi kalak i si karuar lako menerrah taba kalak Babel simengkubu kuta ènda, mpellut mo janah oda ibunuh.

¹⁰Enggo kutetahken lako mengelala kuta ènda, janah oda nè menghargaisa. Isohken mo kuta ènda taba raja Babel; ilekkup mo kuta ènda sampè kerri karina. Aku, JAHOWA ngo, sienggo mendokken i.”

¹¹Ipasulak JAHOWA ngo aku lako pesohken tennah èn mendahi sisimpangaen raja Juda, pemparen si Daud: “Dengkohken mo kadè sikudokken Aku JAHOWA. Usahaken mo asa merdalan kesèntengen gennep ari. Paluah mo kalak sinipetcek ibas kuasa kalak simemetceksa nai. Mula oda, kejahaten siniulakenmi mo memaingken engnget lagangKu codi bagè api siso ndorok terènteppen.”

¹³Kessa i nola idokken JAHOWA mo taba Jerusalem, “O alè Jerusalem! Datessen ngo bekkasmu daripada napa-napa i sikulilingmu. Codi bagè uruk ndates ngo ko i jampalen sindèas, tapi naing aloenku mo kono. Idokken kono ngo sada kalak poda ndorok menjuhap ko barang pè menumbur bèntèng-bèntèngmu,

¹⁴tapi naing hukumenku ngo ko kumerna pemahanmu. Lekkupenku mo istanamu, janah karina si lot i kumaliangna pe lekkupenku ngo. Aku, JAHOWA ngo, simendokken i.”