Read Batak Dairi Jeremia 22 Bible Online

Jeremia 22 - Batak Dairi bible

Jeremia 22

¹Ipasulak JAHOWA mo aku laus mi istana raja Juda, pemparen si Daud, lako pesohken tennah JAHOWA mendahi raja, dekket taba pugabè-pugabèna, bagi dekket pengisi Jerusalem. Bagèèn mo rana JAHOWA taba kalak i,

³“Ntèger mo ulaken kènè janah bujur. Paluah kènè mo kalak si kenna petcek ipas kuasa kalak simemetceksa nai. Ulang mo menèndes barang mengulaken jahat taba kalak sidèban, anak melumang, barang simbalu. Ulang mo bunuh siso mersalah i bekkas èn.

⁴Mula tuhu-tuhu ngo kènè mendalanken perèntah-perèntahKu idi, nai raja-raja simemerèntah bagè si Daud bengketenna mo pèntu pengkeruhen istana ènda. Karina kalak i rebbak dekket pugabè-pugabè dekket ginemgem kalak i mengkunduli kurèta bak kuda.

⁵Tapi mula oda iuèi kènè karina perèntahKu nai Kusempetaken mo kennah gabè terulang mo istana ènda. Aku JAHOWA ngo, simendokken i.

⁶Ukum baku merandal kalohon ngo istana raja Juda, bagè merandal kuta Gilead dekket delleng-delleng Libanon; tapi bakinenku mo bekkas i bagè padang gurun siso iiani jelma.

⁷Pasulakkenku mo kalak lako mengelalasa. Iembah kalak i mo takkè, janah mengerumpakken tihang-tihangna simerandal sinibahan ibas kayu sempènur Libanon nai. Nai ipengambongken kalak i mo mi bagasen api.

⁸Enggo kessa i nterrem mo kalak sidèban memellus i sidi janah mersikusoen samah kalak i kasa ndia ibaing, JAHOWA, bagidi taba kuta simerandal idi.

⁹Nai ialoi dèba mo masa pè karinana idi imo kumerna enggo iosè kènè perpadanen ndènè dekket Aku, Dèbata ndènè, janah enggo menembah dekket menguèi taba dèbata sideban.”

¹⁰Alè kalak Juda, ulang mo pella bonek kènè kumerna kemematè Raja Josia. Si Joahas anakna idi mo tangisi kènè kerna enggo iembah ia laus janah oda nèngè balik. Oda nèngè mo idahenna tanoh lebbuhna.

¹¹Tersèngèt si Joahas, anak si Josia, simbangkit gabè raja Juda menggancih bapana, idokken JAHOWA ngo bagèen, “Enggo laus ia i sènda nai, janah oda nèngè balik.

¹²Matè mo ia i buangen, janah oda nèngè mo idahenna nagerri èn.”

¹³Merjaya ngo kalak sipejengjengken bagesna merkitè dalan siso sènteng, janah mengambihisa dekket dalan siso bujur. Merjaya ngo ia simendokken kalak mengula oda merupah.

¹⁴Merjaya ma ngo tong kalak simendokken, “Pejengjengenku mo istana mbellen merbilik-bilik mbellang i tengkat babo,” nai ibahan mo ibas istana idi jendèla bingkèna ipas kayu sempènur Libanon nai, janah icèt mbara.

¹⁵Dengkohken mo, alè Raja Joyakim! Mula enggo kessa pana ipejengjeng kono istana ibas kayu sempènur Libanon simerandalna kalohon nai, mènter idi mo bettina magahken kono nai ngo raja sisellohna daripada raja-raja sidèbanna? Cuba mo lebbèken èngèt bapamu: Iakapi ia ngo nggelluh merasa janah merhasil karina sinibahanna, kumerna dak ngo ia pènter janah bujur bagi ma ibagasen hukum ntèger menghukumken perkara kalak sincor. Kennah bagidi mo nemmuken perulaen kalak simenandai JAHOWA.

¹⁷Tapi ukum kono, alè Joyakim, laèn ngo. Pellin menulusi laba mi dirimu sambing ngo ko. Ibunuh kono ngo kalak siso mersalah, janah menèndes ginemgemmu mpiah kalohon.

¹⁸Kumarna i ukum tersèngèt si Joyakim raja Juda, anak si Josia, idokken JAHOWA ngo bagèen, “Oda ngo lot isè menangisi matè pè ia; oda lot isè giam mendokken, ‘Nang, nasip dengnganki, nong alè.’ Oda lot bonek barang mendokken ‘Masèhna i atè raja i!’

¹⁹Isaran mo si Joyakim janah iambongken mi ruar pèntu pengkeruhen Jerusalem, bagè pemaing ndèba taba bangkè kalodè.”

²⁰Nina JAHOWA mo, “O kènè alè pengisi Jerusalem, laus mo kènè mi Libanon dekket mi Basan, janah mersurak mo kènè i sidi. Derru-derru mo kènè i delleng Moab, kumerna karina dengngan ndènè sada taki enggo italuken.

²¹Enggo ngo mengerana kin aku bamu sinderrang mendè dèng rejekimu, tapi oda uè kono mendengkohken. Tuhuna bagi ngo gia pekilakomu arnia nai soh mi bagèndari; oda nung ko merpenguèi taba Aku.

²²Kumerna i, mersep mo karina pengulu-pengulumu bagè sinisempul angin. Denganmu arih-arih i pè iembah mo sikira tabanen, janah ilèai dekket i pemèla mo kutamu kumerna karina kejahatenmu.

²³Sennang ngo kono merbekkas ikulilingi tihang-tihang sempènur Libanon, tapi kaduan enggo kessa sempa bamu sakit, mpiah mo iakap kono bagè daberru si naing ketaring.”

²⁴Idokken JAHOWA ngo taba Raja Joyakhin anak si Joyakim raja Juda, “Kemulihken Aku, Dèbata singgelluh, kuhentekken tukasipè kono codi bagè cincin mercap baku ibas tangan kamuhunKu, bagidi nola gia kennah sintakenku ngo kono

²⁵janah Kupesakat taba kalak sinikebiarenmu dekket sinaing memunuh kono. Kusohken mo kono taba si Nebukadnezar raja Babel, bang taba orang-orangna.

²⁶Pepuarenku mo kono dekket inangmu janah Kubuang mi nagerri siso tanoh lebbuhmu, janah i sidi mo kono matè.

²⁷Nteddoh kalohon mo kènè mi nagerri èn, tapi oda ngo balik nèngè kènè.”

²⁸Aku si Jeremia mendokken, “Mada ngo Raja Joyakhin enggo gabè bagè koden mpustak siniambongken janah oda nèngè patohen? Kerna ni i ngo ndia asa ipuari ia dekket dukak-dukakna janah ibuang mi nagerri sidèban siso nitandai kalak i?”

²⁹Nong alè nagerringku, dengkohken mo kadè sinidokken JAHOWA,

³⁰“Enggo ngo itentuken kin kalak i asa kembalangen dukak-dukakna janah pukpuk mesial ibas nggelluhna. Ibas pemparenna nai pè oda lot sampit lako memerèntah i Juda gabè raja pemparen si Daud. Aku, JAHOWA ngo, simendokken i.”