Read Batak Dairi Jeremia 23 Bible Online

Jeremia 23 - Batak Dairi bible

Jeremia 23

¹Nina JAHOWA Dèbata Israel mo, “Merjaya mo kènè alè pengulu-pengulu simengago janah pemèrapken bangsangKu! Patutna kin nemmuken jamotenken ndènè ngo bangsangKu, tapi oda iulaken kènè; ibelli kènè ngo mermèrapen janah merberrusen. Bagèndari pè hukumenku mo kènè kumerna kejahaten ndènè.

³Tapi pepulungenku nola mo bangsangKu sitadingna dèng ibas gennep nagerri i bekkas kalak idi Kubuang i nai. Embahenku mo kalak i balik mi tanoh asal kalak i janah makin nterremna mo kalak i.

⁴Pebangkitenku mo pengulu lako menjamoti kalak i. Oda nèngè mo mbiar barang pè ringgodoren bangsangKu; sada kalak poda mbalang bai kalak idi nai. Aku, JAHOWA ngo, sienggo mendokken i.”

⁵Nina JAHOWA mo, “Roh nè mo katikana, pebangkitenku mo sada raja perhukum ntèger ibas pemparen si Daud nai. Bijak ngo raja i memerèntah, janah mengulaken kadè hukum ntèger dekket bennar i suberri nagerri i.

⁶Mula enggo kessa ia memerèntah, njuah-njuah mo kalak Juda, janah kalak Israel pè mènak mo nggelluhna. Igerari mo raja i ‘JAHOWA keluahenta.’

⁷Roh nè mo katikana, oda nèngè kalak mersumpah merkitè Aku, Dèbata singgelluh, simerembah bangsa Israel karuar i Mesir nai,

⁸tapi gabè merkitè Aku, Dèbata singgelluh, simerembah bangsa Israel karuar i sada nagerri i utara nai ngo, dekket i karina nagerri sidèban bekkas kalak i kupemèrap i nai mo. Merian i tanoh kalak i sendiri nola mo kalak i.”

⁹Enda mo tennahku tersèngèt nabi-nabi: Melala ngo atè-atèngku janah menggirgir aku. Mbadia ngo JAHOWA bak kataNa simemaingken aku bagè kalak mabuk mbuèsu menum pola.

¹⁰Dom ngo nagerrinta kalak siso setia taba JAHOWA. Jahat ngo pengelako kalak i janah isalah gunaken kalak i ngo kuasana. Kumerna sempetta JAHOWA, dukut sinijampalen pè gabè males janah suberri nagerri merbonek atè.

¹¹Nina JAHOWA ngo, “Ukum nabi dekket imam oda uè tunduk baku. Baliksa i BagesKu pe enggo kudapet kalak i mengulaken jahat.

¹²Kumerna i, ndalit janah gellap mo dalan kalak i, dungna terdengdeng mo kalak i janah tergempang. Kupesempa mo jèkat taba kalak i, mula enggo kessa dapet katikana lako menghukum kalak i. Aku, JAHOWA ngo, sienggo mengerana.

¹³Enggo kuidah dosa nabi-nabi Samaria. Mengerana ngo kalak i merkitè gerar Baal, janah mengelalingken Israel, bangsangKu.

¹⁴Tapi kuidah ngo i Jerusalem nabi-nabi mengulaken muat mi jahatna deng. Merluap ngo kalak i janah merlangkah julumeddem, janah mendekdek kalak simengulaken jahat, dungna sada kalak poda nggèut nèngè tobat. Ukum baku karinana ngo kalak i jahat bagè pengisi Sodom dekket Gomora.”

¹⁵Nina JAHOWA Pergegoh Sisotercodi ngo, “Berrènkenku mo bai nabi-nabi sini Jerusalem idi suan-suanen pagit mahan panganenna dekket racun mahan ènumenna, kumerna kalak i ngo memaingken karina kalak i suberri nagerri oda nè pesangapken Aku.”

¹⁶Taba pengisi Jerusalem, nina JAHOWA Pergegoh Sisotercodi ngo, “Ulang dengkohken rana nabi-nabi sidak tong pellin memaingken terdehèrep sambing. Pellin magahken sura-sura sambing ngo kessa kalak i oda ngo tennahKu.

¹⁷Dak ngo idokken kalak i, taba kalak siso nggèut mendengkohken ranangku, ‘Njuah-njuah ngo kènè!’ Janah taba kalak si jèngèng idokken kalak i mo, ‘Oda nè mermara ko.’ ”

¹⁸Aku mendokken, “Sada kalak poda ibas nabi-nabi idi nai memettoh barang kadè silot ibas perukuren JAHOWA. Oda ngo lot bai kalak idi nai sinung mendengkoh dekket mengarusi sura-suraNa; oda ma ngo lot mendimataken barang menuihken nasa ranaNa.

¹⁹Bagè angin kalisungsung mengamuk ngo laga JAHOWA janah menerpa karina kalak perjahat.

²⁰Oda malap lagaNa mula mak dèng saut kariNa sinitakina. Ipodi ari iarusi bangsa JAHOWA mo tangkas simasa idi.”

²¹Nina JAHOWA mo, “Ngkasah kalon ngo nabi-nabi idi, keppèken oda ngo lot Kupasulak kalak i. Merkitè gerarKu ngo kalak i magahken berita, keppèken so lot tennah Kuberrèken bai kalak i.

²²Mula ibettoh kalak i ngo barang kadè silot ibagasen pikirenKu, tentu mo enggo ibagahken kalak i taba bangsangKu karina sienggo kuruapken. Nai tobat mo bangsangKu ibas dosa-dosa bak ulah-ulah kalak i si jahat idi nai.

²³Aku ngo Dèbata si lot barang idikè sambing, oda pellin i sada bekkas sambing.

²⁴Sada kalak poda ndorok kiboniken dirina ibas penengenenKu nai, kumerna lot ngo Aku barang idikè sambing: I sorga bak i tanoh èn.

²⁵Enggo ngo kubettoh karina sinidokken nabi-nabi i. Merluap ngo kalak i merkitè gerarKu ai enggo ijalo kalak i nina tennahKu arap nipi nai.

²⁶Soh ndigan ngo ndia nabi-nabi idi mengelalingken bangsangKu merkitè berita karangen kalak i sendiri?

²⁷Idokdok kalak i ngo pana merkitè nipi sinisukutken kalak i lupa mo bangsangKu taba Aku bagè empung kalak i simengelupaken aku janah gabè menembah Baal.

²⁸Mula ternipi nabi patutna kennah mendokken, ‘Pellin nipi ngo kessa èn.’ Tapi ukum nabi simenjalo tennah baku nai kennah ibagahken mo tennah i dekket bennar. Oda terpedos pagè dekket ronci.

²⁹Codi bagè api ngo katangKu, dekket codi bagè palu-palu simemustakken batu!

³⁰Kualo ngo nabi-nabi sipesakatken tennah bai samah dengnganna nai, nai idokken mo idi tennah baku nai.

³¹Kualo ma ngo nabi-nabi sipesakatken kata-katana sendiri, nai idokken nola rana i baku nai.

³²Aku, JAHOWA, mengalo nabi nabi sibagidi sipesakatken nipina dom luap. Ilalingken kalak i ngo bangsangKu merkitè luap dekket bual kalak i. Oda lot kupasulak nabi-nabi idi. Cituk poda lot merlapaten kalak i bai bangsangKu. Aku JAHOWA ngo, sienggo mengerana.”

³³Nina JAHOWA mo, “Alè Jeremia, mula lot sada kalak ibas bangsangKu nai sada kalak nabi barang pè imam mengkusoken bamu, ‘Kadè ma ngo tennah JAHOWA?’ Kennah mo aloi, ‘Kono ngo boban JAHOWA; kerna i ipatakken mo ko.’

³⁴Mula lot sada kalak bai bangsangKu nai barang nabi barang pè imam dak mengerana tersèngèt ‘boban JAHOWA’, nai hukumenku mo ia dekket kadè-kadèna.

³⁵Balikna, karina mo nemmu kalak kennah mengkusoken mendahi dengnganna dekket taba sincelketna, ‘Kadè ngo alus bai JAHOWA nai?’ barang pè ‘Kadè ngo idokken JAHOWA?’

³⁶Oda ndorok nèngè kalak i mendokken kata ‘boban JAHOWA’. Mula lot dèng kalak mendokken rana bagi, nai kubaing mo tennahku idi gabè tuhu-tuhu boban mendahisa. Kalak simendokken ‘boban JAHOWA’ imo pellin pesungkarken ranangKu, Dèbata kalak i, Dèbata singgelluh, JAHOWA Pergegoh Sisotercodi ngo i.

³⁷Sindorok dokenken kalak i mendahi nabi-nabi imo pellin, ‘Kadè ngo alus JAHOWA bamu? Kadè ngo idokken JAHOWA?’

³⁸Mula lot kalak siso merpenguèi taba perèntahKu idi, janah dak dèng mendokken rana ‘boban JAHOWA’,

³⁹nai kujemput mo kalak i, janah mengkebekken kalak i ndaoh, bang kalak i barang pè kuta sienggo Kuberrèken bai kalak i dekket bai empung kalak i.

⁴⁰Termèla janah merlèa mo kalak i baingenku soh mi sidekkah-dekkahna janah jalonken kalak i pè oda ilupaken jelma.”