Read Batak Dairi Jeremia 24 Bible Online

Jeremia 24 - Batak Dairi bible

Jeremia 24

¹I sada katika enggo kessa si Joyakhin anak si Joyakim raja Juda rebbak dekket pugabè pemerèntah Judea, nasa tukkang dekket kalak pandè ibantun si Nebukadnezar raja Babel, janah iembah gabè tabanen i Jerusalem nai mi Babel, iberrèken JAHOWA mo sada alaten bangku. Kuidah mo lot dua kirang sin buah kayu ara gampar i lebbè Bages JAHOWA.

²Kirang perlebbè sin buah kayu ara merandal-merandal, bagè buah kayu ara ulbah-ulbah dèng, tapi kirang sipeduaken sin buah kayu ara macik-macik, gabè oda ndorok terpangan.

³Nai nina JAHOWA mo taba aku, “Alè Jeremia, kadè ngo idah ko?” Kualoi mo, “Buah kayu-ara ngo, alè JAHOWA. Simerandal-merandalna merandal kalohon, janah simacik-macikna macik kalohon dungna oda ndorok terpangan.”

⁴Nai idokken JAHOWA nola mo,

⁵“Kalak sienggo kubelli iembah mi Babel i kuètong ngo i codi mi buah kayu ara merandal-merandal ènda; kumerna i Aku, JAHOWA, Dèbata Israel, selloh mo bakinenku taba kalak i.

⁶Jamotenku mo kalak i janah merembah kalak i balik mi nagerri ènda. Pejengjengken nola mo Aku, oda nèngè mengerentuhken kalak i, menuan nola mo Aku, oda nè mengerengkat kalak i.

⁷Berrènkenku mo bai kalak i ukur sèkel lako mengantusi Aku ngo JAHOWA. Nai gabè bangsangKu mo kalak i, janah Aku gabè Dèbata kalak i, kerna balik nola mo kalak i mendahi Aku ibagasen nasa ukurna nai.

⁸Tapi ukum si Zedekia raja Juda dekket karina pugabè sincelket tabasa, dekket kalak Jerusalem sitadingna sitong merian i nagerri èn barang sienggo mbungkas mi Mesir, karina mo kalak i bakinenku bagè buah kayu ara macik-macik ènda, siso ndorok terpangan. Aku, JAHOWA ngo, sienggo mengerana.

⁹Cilaka mo kalak i baingenku nai gabè buradan mo karina bangsa i suberri dunia èn. Barang idikè sambing kalak i Kusompar-baèrken, dak rèhèen mo kalak i, ibaing gabè sitaba-tabaen janah ipencèdurken. Gerar kalak i ibaing gabè kata sumpah.

¹⁰Pemasaenku mo taba kalak i geraha, kelèhèen, dekket sakit wabba dungna matè mo kalak i karina janah oda lot nè tading i nagerri ènda sienggo Kuberrèken bai kalak i dekket bai empung kalak i.”