Read Batak Dairi Jeremia 25 Bible Online

Jeremia 25 - Batak Dairi bible

Jeremia 25

¹I tahun pe-empatken enggo kessa si Joyakim anak si Josia gabè raja Juda, kujalo mo tennah bai JAHOWA nai tersèngèt karina bangsa Juda. Tahun perlebbè mo i tikanna enggo kessa si Nebukadnezar raja Babel.

²Ningku mo taba karina bangsa Juda dekket pengisi Jerusalem,

³“Sidekkah duapuluh tellu tahun, mungkah tahun pesipuluhtelluken pemerèntahen si Josia anak si Amon i Juda, soh mi sidari èn enggo mengerana JAHOWA taba aku janah oda nung aku lupa pesakatken bai ndè barang kadè sienggo nidokkenNa. Tapi oda isuihken kènè.

⁴Bagi ma pukpuk ngo ipasulak JAHOWA bai ndè nabi-nabi naposoNa, tapi oda uè kènè mendengkohken dekket memperatè-atèken kalak i.

⁵Idokken kalak i ngo kènè asa menadingken pekilako ndè jahat i, dekket karina perulaen ndè simerdosa i, asa ndorok kènè tong merian i nagerri èn sienggo iberrèken JAHOWA bai ndènè dekket bai empung ndènè gabè milik pusakka ndènè.

⁶Igerra nabi-nabi idi ngo kènè menembah dekket menguèi dèbata sidèban. Igerra kalak i ngo kènè menembah gana-gana sinibahan ndènè sendiri, kumerna sibagidi ngo memaingken JAHOWA melaga. Mula iuèi kènè ngo perèntah JAHOWA idi, oda ngo hukumenna kènè.

⁷Tapi JAHOWA sendiri ngo mendokken ukum kènè oda uè mendengkohkensa. Baliksa gabè isongkit kè nola ngo lagaNa kumernaken gana-gana ndènè idi. Kènè sendiri ngo perohken hukumNa taba diri ndènè.

⁸Kumerna oda uè kènè mendengkohken ranaNa, nai nina JAHOWA Pergegoh Sisotercodi i mo,

⁹‘Diloenku mo karina bangsa i utara nai, dekket bagi ma naposongKu, si Nebukadnezar raja Babel. Kupeberkat mo kalak i lako mergeraha mengalo Juda dekket pengisina bagi dekket karina bangsa i kumaliangna. Ripasenkenku janah bellienku mo sompar-baèr bangsa Juda rasken dekket bangsa-bangsa cibal-balengna soh mi sidekkahna. Tersengget mo karina kalak simengidahsa janah merdeggar pendurungenna menengngen. Aku, JAHOWA ngo, enggo mengerana.

¹⁰Petadienku mo oang-oang lolo atè kalak i dekket kinirami pesta merbayo. Oda mo lot nèngè minak kalak i mahan lampu, janah kerri mo pagè kalak i.

¹¹Kubelli mo salpun karina nagerri èn janah gabè terulang melongo. Bangsa-bangsa kumaliangna pè tunduk mo taba raja Babel pitupuluh tahun dekkahna.

¹²Enggo kessa i hukumenku nola ma mo bangsa Babel dekket rajana kumerna dosa kalak i. Kurumpakken mo nagerri Babel janah kubelli ncèda soh mi sidekkahna.

¹³Hukumenku mo Babel merkitè karina olpek sienggo kusura-surai kin taba bangsa-bangsa dekket sienggo kubagahken kin arap si Jeremia — imo karina olpek sinisuratken ibas bukku ènda.

¹⁴Kubales mo karina ulah-ulah kalak Babel; i perhamba raja-raja mbellen dekket mbuè bangsa mo kalak i.’ ”

¹⁵JAHOWA, Dèbata Israel, mendokken taba aku, “Buat mo perènumen anggur èn sienggo Kusini bak anggur pungurKu. Embah mo taba karina bangsa barang pak dikè kono kupasulak, janah dokken mo kalak i mengènum anggur èn.

¹⁶Mula ienum kalak i kessa, oyong mo kalak i janah bennè ukurna kerna geraha sikupemasa bai kalak i.”

¹⁷Nai kujalo mo perènumen anggur idi i tangan JAHOWA nai, janah berkat meneppet karina bangsa mi bekkas sienggo idokken JAHOWA dahinku, nai kubaing mo kalak i mènum anggur idi.

¹⁸Kuberrè mo mengènum anggur i Jerusalem dekket karina kuta i Juda, rebbak dekket raja-raja bak pugabè-pugabèna, dungna gabè codi bagè jampalen males mo kalak i janah ngerri idahen. Sakat mi ari sidari èn dak ibaing dèba ngo gerar kalak i gabè sumpah.

¹⁹Enda mo gerar-gerar kalak sidèban si kennah mengènum ibas perrènumen anggur JAHOWA idi nai; raja Mesir rasken pugabè-pugabèna dekket sinipebangkitna: karina kalak Mesir dekket kalak sidèban si lot i Mesir; karina raja i nagerri Us; karina raja kuta-kuta Palistim i Askelon, Gaza, Ekron; karina kalak singgelluhna dèng i Asdod; karina kalak Edom; Moab, dekket Amon; karina raja i Tirus dekket Sidon; karina raja sinibiding Laut Tengah; kuta-kuta Dedan, Tema, dekket Bus; karina kalak simenggonting bukna joppok; karina raja Arab; karina raja marga-marga campuren simerian i gurun pasir; karina raja i Zimri, Elam, dekket Madai; karina raja i utara, ndaoh bak ndessing, gennep mersada-sada kalak. Karina bangsa sinibabo tanoh èn kennah mengènum anggur idi. Janah kalak perpodi si kennah mengènum anggur idi imo raja Babel.

²⁷Nai nina JAHOWA mo taba aku, “Dokken mo taba kalak i magahken Aku, JAHOWA Pergegoh Sisotercodi, Dèbata Israel, mendokken kalak i mènum sampè mabuk janah mutah-utah. Kubaing mo ndabuh kalak i janah oda nèngè ndorok kèkè kumerna geraha sikupemasa bai kalak i.

²⁸Janah mula oda uè kalak i menjalo perènumen idi i tanganmu nai lako mengènum anggurna, dokken mo enggo ihatorken JAHOWA Pergegoh Sisotercodi tersèngèt misi.

²⁹Tebbenaenku mo pengerentuhen idi i kutangKu nai sendiri. Ulang sanga nola idok kalak i — ukum kalak i oda nè ihukum. Pasti ngo kalak i kennah ihukum kerna pemasaenku mo geraha bai gennep bangsa i suberri tanoh èn. Aku, JAHOWA, Pergegoh Sisotercodi ngo, sienggo mendokken i.

³⁰Karina sikudokken bamu i, alè Jeremia, kennah ngo pesakatenmu. Dokken mo bai kalak i, ‘Dumegger ngo sora JAHOWA i sorga nai; ibas bekkasNa simbadia i nai ngo ia menggeruhguh mengalo bangsaNa. Karina pengisi tanoh èn ngo mendengkoh Ia mersurak bagè pengula simemerroh anggur i bekkas pemerrohen.

³¹Sakat mi punca tanoh èn ngo merginoling soraNa; Ibaingken JAHOWA ngo perkara taba bangsa-bangsa. Karina jelma ngo i hukum janah kalak jahat pè ihukum matè mo.’ ”

³²Nina JAHOWA Pergegoh Sisotercodi i mo, “I gennep punca tanoh ènda nai ngo angin kalisungsung merdengung; sempa mo olpek mi gennep bangsa mersada-sada.”

³³Ipas sidarinkenna i darak mo bangkè kalak siniripasken JAHOWA i suberri tanoh èn. Oda nèngè itangisi kalak i; oda ma pella nè iosong lako ikubur, tapi ibelli sambing go bagidi i tanoh i tosè bagè pulguken semperren.

³⁴Alè kènè pengulu-pengulu, kènè alè simermakan bangsa JAHOWA! Derru-derru mo kènè nggang kalohon! Mergoling-goling mo kènè ibas abu, kerna enggo dapet katikana kènè bunuhen, janah sindorok mpellut pè isompar-baèrken mo. Codi mo kènè bagè goci maharga ndabuh janah mpustak.

³⁵Pasti ngo kènè mak ndorok mpellut.

³⁶Kekelsohen ngo kènè janah tangis melui kalohon kerna enggo iripasken JAHOWA bangsamu merkitè lagana dekket mengelala nagerrimu si mènak idi.

³⁸Bagè singa karuar ibas liangna nai, bagidi ma mo JAHOWA karuar lako menghukum bangsana. Kinitengngam geraha bak pungur JAHOWA enggo mengobah nagerri ènda gabè padang gurun.