Read Batak Dairi Jeremia 26 Bible Online

Jeremia 26 - Batak Dairi bible

Jeremia 26

¹Sintempu enggo kessa si Joyakim anak si Josia gabè raja Juda,

²nina JAHOWA mo taba aku, “Laus mo ko cènder i kasèan BagesKu janah mengerana mo ko taba pengisi Juda siroh mersembah taba aku i sidi. Pesakat mo taba kalak i karina sikudokken bamu lako bagahenken bai kalak i. Ulang orui situk pè.

³Tah bakunè uè nola bangsa i mendengkohken, nai gabè mentadi mengulaken jahat, gabè kusondati nola mo niatKu lako mengago kalak i rembang mi ulah-ulah kalak i si jahat i.”

⁴Ipasulak JAHOWA ngo aku mendokken bagèen taba kalak i, “Aku, JAHOWA, enggo memerèntahken asa tunduk kènè taba Aku dekket mengulaken pati-patien sienggo Kuberrèken taba kènè.

⁵Kennah ma ngo kènè mendengkohken kadè sinidokken karina naposongKu, imo nabi-nabi sidak pukpuk kupasulak mendahi kènè. Tapi laju oda uè kènè mendengkohken kalak i.

⁶Mula dak tong ngo kènè mengalo, bakinenku mo taba bages bekkas pemojien ènda bagè simasa taba Silo, asa karina bangsa sini dunia èn mendokken gerar kuta Jerusalem ènda mahan sumbiah.”

⁷Idengkoh imam-imam, nabi-nabi dekket ginemgem ngo karina sikuranaken i Bages JAHOWA idi.

⁸Mènter enggo kessa mo pul kumongmongken karina tennah JAHOWA bagè sinidokkenNa idi, itangkup kalak i mo aku ninganna mersurak, “Kennah patenken ngo kono!

⁹Mboho ma mo kono mendokken merkitè gerar JAHOWA magahken BagesNa ènda nimu kennah codi bagè simasa taba Silo, dekket naing lalaenken mo kuta ènda janah gabè terulang oda nè i iani jelma.” Nai irengemmi jelma mbellang i mo aku.

¹⁰Tikan idengkoh karina pugabè pemerèntah Juda kessa mo si masa i, menter ndor mo kalak i karuar kan istana raja nai ninganna laus mi Bages JAHOWA, janah kundul i Pèntu Pengkeruhen Sirimbaru.

¹¹Imam-imam dekket nabi-nabi mendokken taba pugabè-pugabè idi dekket bai ginemgem, “Patut ngo ihukum matè kalak èn kumerna enggo iruapken ia rana simerallo mi kutanta ènda. Kenè sendiri pè enggo ngo idengkohken kènè.”

¹²Nai ningku mo, “JAHOWA ngo pasulakken aku pesakatken tennah meralo mi Bages JAHOWA dekket kuta ènda bagè sinidengkoh ndènè.

¹³Kumerna i obahi kènè mo pernggelluh ndènè dekket perulaen ndènè, uèi kènè mo JAHOWA Dèbata ndènè; asa isondati Ia takina lako mengagoken kènè.

¹⁴Tersèngèt bagè diringku, enggo tuhu ibagasen kuasamu memaingken barang kadè sambing mengèkutken gerrek atèmu.

¹⁵Tapi èngèt mo, mula ibunuh kènè aku, gongenken ndènè dekket pengisi kuta ènda mo kesalahen kumernaken memunuh kalak siso mersalah. Kumerna, JAHOWA ngo pasulakken aku lako memerrèken sèngèt-sèngèt idi taba kènè.”

¹⁶Nai nina karina pugabè pemerèntah bak ginemgem i mo taba imam-imam dekket nabi nabi idi, “Mengerana ngo kalak èn merkitèken Gerar JAHOWA Dèbatanta; oda patut ia ihukum matè.”

¹⁷Enggo kessa idi menter roh mo barang piga-piga kalak ibas pengulu bangsa idi nai mi lebbè janah mendokken taba kalak simertumpu i sidi,

¹⁸“Sinderrangna si Hizkia gabè raja Juda, ipesakat nabi Mika kan Moresyet nai ngo taba ginemgemna kata bagèen siroh bai JAHOWA Pergegoh Sisotercodi idi nai, ‘Naing ibajak ngo Sion bagè juma, gabè pulguken merentuh mo Jerusalem, janah Uruk Bages JAHOWA gabè rambah.’

¹⁹Tapi oda ngo ibunuh Raja Hizkia dekket kalak Juda si Mika. Baliksa mbiar ngo si Hizkia taba JAHOWA janah mengidoken masèh atè. Nai isondati JAHOWA mo asupna lako mengago kalak i. Janah bagèndari, enggo hampir perohken jèkat mbellen mi dirinta kita.”

²⁰Nung ma ngo lot kalak sidèban mengerana menduhuli kuta dekket bangsa ènda merkitè gerar JAHOWA bagè sikubakinken. Gerarna imo si Uria anak si Semaya i Kiryat-Jearim nai.

²¹Tikan idengkoh Raja Joyakim rebbak dekket pakalima-pakalimana dekket pugabè-pugabè pemerentah rana si Uria i, mertaki mo raja lako memunuhsa. Tapi terbertik mo taba si Uria tersèngèt misi gabè mbiar mo ia janah mperrus mi Mesir.

²²Tapi ipasulak Raja Joyakim mo si Elnatan anak si Akhbor rebbak dekket piga-piga kalak sidèban laus mi Mesir lako mengaleng si Uria.

²³Nai iembah kalak i mo ia balik mendahi Raja Joyakim. Nai idoken raja i mo lako bunuhen ia, janah iambongken bangkèna i perkuburen jelma nterrem.

²⁴Tapi bagèndari merkitè pengurupi si Ahikam anak si Safan, aku si Jeremia oda ngo isohken mi tangan jelma nterrem lako bunuhen.