Read Batak Dairi Jeremia 27 Bible Online

Jeremia 27 - Batak Dairi bible

Jeremia 27

¹Oda ndekkah enggo kessa si Zedekia anak si Josia gabè raja Juda, ipasulak JAHOWA mo aku

²memahan tinali ipas koling-koling nai dekket koldang-koldang ibas kayu nai, janah mengeleketken ibas tengkukukku.

³Ipasulak ma ngo aku pesohken tennahNa mendahi raja-raja Edom, Moab, Amon, Tirus dekket Sidon, marapken suruhen kalak i sienggo roh mi Jerusalem lako menongkir Raja Zedekia.

⁴Kennah ngo aku memagahken bai kalak i, ukum JAHOWA Pergegoh Sisotercodi, Dèbata Israel mendokken,

⁵“Merkitè kuasangKu mbellen i dekket merkitè kegegohenKu enggo kuhanaken tanoh èn bak jelma dekket sagumanna natèk-natèk, janah ndorok ngo Aku memerrèken bai barang isè sambing gerrek atèngku.

⁶Aku ngo sienggo menohken karina bangsa ènda mi bagasen kuasa naposongKu, si Nebukadnezar, raja Babel. Salang karina binatang pè enggo kosohken bana mahan rajaenna.

⁷Karina bangsa kennah patu tabasa, taba dukakna, dekket taba kempuna sampè dapet katikana negarana sendiri gabè ndabuh. Ipas katika i tunduk taba bangsa-bangsa simergegoh dekket taba raja mbellen mo bangsa Babel.

⁸Hukumenku mo bangsa barang pè kerajaen siso uè tunduk taba si Nebukadnezar merkitè geraha, kelèhèen, dekket sakit wabba, sampè tunduk dungna bangsa i tabasa.

⁹Ulang mo dengkohken nabi-nabi barang isè nola pè idi simenggerra kènè tunduk taba raja Babel, agia nola pè kalak i mengakuken enggo menjalo pemernoi arapken nipi nai, tendi tendi, barang pè merkitè memakè kegegohen persibalik mata.

¹⁰Ioto-otoi kalak i ngo kènè dungna ibabai mo kènè ndaoh i nagerri ndènè nai. Kupuari mo kènè i nagerri ndènè nai janah gabè binasa mo kènè.

¹¹Tapi ukum bangsa siuè patu janah uè merpenguèi taba raja Babel duèenku ngo merian i lebbuhna sendiri, janah menuan pagè i sidi. Aku, JAHOWA ngo, sienggo mengerana.”

¹²Aku si Jeremia, bagidi ngo tong kubagahken taba si Zedekia raja Juda. Ningku ngo, “Menerrah mo kono taba raja Babel. Merpenguèi mo ko tabasa dekket taba bangsana, asa njuah-njuah Raja i.

¹³Enggo idokken JAHOWA ukum bangsa siso merpenguèi taba raja Babel matè mo ipergerahaen, kelehèen, barang ibuat sakit wabba. Kasa mo ndia Raja i dekket ginemgemna uè matè bagidi?

¹⁴Ulang mo dengkohken nabi-nabi simenggerra Raja i tunduk taba raja Babel kerna ioto-otoi kalak i ngo Raja i.

¹⁵Idokken kalak i ngo merkitè gerar JAHOWA kalak i mengerana, tapi luap ngo kalak i. JAHOWA sendiri ngo mendokken oda nung ipasulak kalak i. Kumerna i pesompar-baèrenken janah ibinasaken mo raja i rebbak deket nabi-nabi sienggo merluap taba Raja i.”

¹⁶Kessa i nola kubagahken mo taba imam-imam dekket taba karina ginemgem magahken bagèen ngo idokken JAHOWA, “Ulang dengkohken nabi-nabi simendokken oda ndekkah nèngè embahenna mo karina balik nasa ugasen sini BagesKu i Babel nai. Luap ngo kalak i.

¹⁷Ulang beggèken kènè kalak i! Menerrah mo kènè taba raja Babel, asa maluah kènè. Kasa kennah melala kuta en?

¹⁸Mula tuhuna ngo kalak i nabi, janah enggo menjalo tennah baku nai, pasti ngo kalak i bagèndari mengido bangKu, JAHOWA Pergegoh Sisotercodi, asa ugas-ugasen silotna dèng i BagesKu dekket i istana raja i Jerusalem oda iembah mi Babel.

¹⁹Kumerna Aku, JAHOWA Pergegoh Sisotercodi, Dèbata Israel, enggo memutusken karina ugasen idi kennah iakut mi Babel, janah hot i sidi soh mi kuperdatèken nola i. Ipas katika idi nola pè asa kuèmbah mi bekkas èn. Aku JAHOWA ngo, sienggo mengerana.” Ugas-ugasen silotna dèng i Bages JAHOWA idi imo: tihang-tihang, kancah tembaga, kurèta-kurèta, dekket barang piga-piga nai sidèbanna milik Bages JAHOWA. Ukum ugas-ugasen idi oda ngo dekket iembah mi Babel, tikan si Joyakhin anak si Joyakim raja kalak Juda dekket karina simpantas niasè kalak Juda dekket Jerusalem ibantun Raja Nebukadnezar mi Babel.