Read Batak Dairi Jeremia 28 Bible Online

Jeremia 28 - Batak Dairi bible

Jeremia 28

¹Ipas tahunkenna i ma bulan lima tahun pe-empatken pemerèntahen Raja Zedekia, mengerana mo si Hananya anak si Azur, sada kalak nabi i kuta Gibeon nai taba aku i Bages JAHOWA. I lebbè imam-imam dekket jelma nterrem idokken mo taba aku

²ukum JAHOWA Pergegoh Sisotercodi, Dèbata Israel, mendokken bagèen, “Enggo kupedalmeh kegegohen raja Babel.

³Ibagasen sidua tahun èn kuolihken mo karina ugasen i Bagesku nai, sienggo ibantun Raja Nebukadnezar mi Babel.

⁴Embahenku ma mo balik si Joyakhin anak si Joyakim raja Juda, rasken dekket karina ginemgem Juda sienggo ibantun mi Babel. Tuhu tuhu ngo, Aku naing menèlpangken kegegohen Babel. Aku, JAHOWA ngo, mendokken i.”

⁵Nai i lebbè imam-imam dekket karina ginemgem si cènder i Bages JAHOWA idi, ningku mo taba si Hananya,

⁶“Selloh! Katerra pè saut mo bagè siniramalkenmu idi, janah tuhu-tuhu iembah JAHOWA balik i Babel nai karina ugasen silot i Bages JAHOWA rebbak dekket karina kalak sienggo i buang mi sidi.

⁷Tapi ukum kono, alè Hananya, dekket kènè karina alè jelma nterrem, dengkohken kènè mo ènda:

⁸Enggo kin ngo iramalken nabi-nabi sinilebbènta magahken sempa mo geraha, jèkat, bang sakit wabba mendahiken mèduk bangsa dekket kerajaen mergegoh.

⁹Tapi ukum nabi simengalamatken kedamèen, sindorok iakui kira nabi tuhu-tuhu nipasulak JAHOWA, imo mula tuhu tuhu masa bagè sinialamatken idi.”

¹⁰Nai mèter iranggutken si Hananya mo koldang-koldang i tengkukukku nai janah ibohok.

¹¹Idokken mo i lebbè karina jelma nterrem sinisidi, “Idokken JAHOWA bagenda mo carana Ia memenggel koldang-koldang sinilekketken Raja Nebukadnezar ipas tengkukuk karina bangsa nai; ibakin JAHOWA mo idi ibagasen sidua tahun ènda.” Enggo kessa bagidi laus mo aku.

¹²Oda sadikè dekkah enggo kessa simasa i, ipasulak JAHOWA mo aku

¹³laus mendahi si Hananya lako mendokken bagèen, “Idokken JAHOWA ngo magahken kono pè ndorok ngo kipenggelken koldang-koldang kayu i, tapi gancihenna nola mo dekket koldang-koldang bessi.

¹⁴JAHOWA Pergegoh Sisotercodi Dèbata Israel mendokken, naing iberretken mo koldang-koldang bessi mi tengkukuk karina bangsa ènda, janah gabè tunduk taba raja Nebukadnezar raja Babel mo kalak i. Idokken JAHOWA deng ma ngo binatang pengago pè pesakatenna ma ngo mi kuasa si Nebukadnezar.”

¹⁵Karinana idi kupasakat taba si Hananya, nai ningku nola dèng ma mo, “Dengkohken mo, alè Hananya! Oda ngo lot ipasulak JAHOWA kono; enggo ibakin kono bangsa ènda merketoken taba rana-rana luap.

¹⁶Kumerna i JAHOWA sendiri mendokken ukum kono isalpuni mo kono i babo tanoh ènda nai. Matè mo kono ibas tahun ènda, kerna enggo ipasulak kono bangsa ènda mengalo JAHOWA.”

¹⁷Nai tahunkenna i ma, i bulan pepituken, matè mo si Hananya.