Read Batak Dairi Jeremia 29 Bible Online

Jeremia 29 - Batak Dairi bible

Jeremia 29

¹Kubakin mo surat mendahi imam-imam, nabi-nabi, pengulu-pengulu bangsa singgelluhna dèng, dekket mendahi karina kalak sidèban sienggo itaban si Nebukadnezar i Jerusalem nai mi Babel.

²Kugoritken surat idi enggo kessa Raja Joyakhin, inangna, pugabè-pugabè istana, pugabè-pugabè pemerèntah Juda dekket Jerusalem, nasa tukkang, dekket nasa sipandè mahan bahaen itaban mi buangen.

³Kutengesken ngo surat idi arap si Elasa anak si Safan, dekket si Gemarya anak si Hilkia sinipasulak si Zedekia raja Juda mendahi si Nebukadnezar raja Babel. Kata surat i mendokken,

⁴“Bagèen ngo rana JAHOWA Pergegoh Sisotercodi, Dèbata Israel mendahiken karina kalak sienggo nibuangna i Jerusalem nai mi Babel:

⁵‘Hot mo kènè i sidi merian! Pejengjeng kènè mo bages ndènè gennep. Pungkah kènè mo juma ndènè janah pangan kènè mo hasilna.

⁶Jejap mo kènè asa lot dukak ndènè, janah duè ma mo dukak-dukak ndènè merkejejapen asa lot ma dukak kalak idi. Kennah ngo muat mi tambahna bilangen ndènè janah oda ndorok moru.

⁷Karèjo mo kènè mahan kiniduma karina kuta bekkas ndènè Kubuang. Mersodip mo kènè baku mahan keperluen karina kuta idi, kerna mula nduma ngo kuta idi, nduma ma mo bang kènè pè.

⁸Aku JAHOWA, Pergegoh Sisotercodi, Dèbata Israel, pesèngètken kènè asa ulang i belli kènè diri ndènè ikilang nabi-nabi simerian i tengah-tengah ndènè barang pè tah isè nola idi simendokken ndorok kalak i mengalamatken kadè sinaing masa i podi ari. Ulang sarihken kènè rana nipi kalak i.

⁹Ipakkè kalak i ngo gerarKu lako menukutken taba kènè tersèngèt siso tuhu. Oda ngo lot kupasulak kalak i. Aku JAHOWA ngo, sienggo mengerana.’

¹⁰Nina JAHOWA ngo, ‘Mula enggo kessa soh tikkina pitupuluh tahun bai Babel, perdatèenkenku nola mo kènè, janah memahèi padanKu lako merembah kènè balik mi bekkas ènda.

¹¹Otang Aku sendiri ngo bettoh-bettohen nasa rencanangKu taba kènè? Karina rencana idi oda ngo lako mengagoken kènè, tapi lako mahan kinimendè nggelluh ndènè dekket lako memerrèken mendahi kènè nggelluh mi silako roh sidom pengharapen ngo.

¹²Nai mengido tolong mo kènè mendahi Aku. Merrohen nola ma mo kènè lako mersodip taba Aku, janah kualoi mo sodip ndènè i.

¹³Itulusi kènè nola mo Aku janah jupa kènè mo Aku, kerna itulusi kènè ngo aku ibas nasa ukur ndènè nai.

¹⁴Tuhu-tuhu, jupa kènè mo Aku. Pepulungenku nola mo kènè i tengah-tengah karina bangsa nai dekket i karina nagerri bekkas ndènè ipemèrap dekket ibuang idi nai. Babaenku nola mo kènè balik mi nagerri asal ndènè ènda bak pesuangken silot bai ndè. Aku, JAHOWA ngo, sienggo mengerana.’

¹⁵Ukum dok atè ndènè, enggo mo iberrèken JAHOWA bai ndènè nabi-nabi i Babel.

¹⁶Dengkohken mo kadè sinidokken JAHOWA tersèngèt raja simemerèntah bagèndari, imo raja pemparen si Daud; dekket tersèngèt pengisi kuta èn, imo sincelket ndènè siso dekket iembah rebbak deket kènè mi buangen.

¹⁷JAHOWA Pergegoh Sisotercodi mendokken, ‘Pemasaenku mo geraha, kelèhèen, dekket sakit taba kalak i. Bakinenku mo kalak i codi bagè buah kayu ara macik kalohon gabè mak nèngè terpangan.

¹⁸Kuletlet mo kalak i merkitè geraha, kelèhèen dekket sakit wabba dungna karina bangsa i suberri dunia èn bejogiten menengen simasa bai kalak i. Barang idikè sambing kupesompar-baèr kalak i, bejogiten mo kalak janah buradan menengen kadè sienggo masa bai kalak i. Kenna rèhèen mo kalak i, janah gerar kalak i ibaing gabè sumbiah.

¹⁹Karinana idi masa bai kalak i, kumerna oda iuèi kalak i tennahKu sidak tong Kupesakat bai kalak i tarapken nabi-nabi naposongKu idi. Oda ngo uè kalak i memperatè-atèken tennahKu idi.

²⁰Asa kènè karina sienggo Kubuang mi Babel, dengkohken mo kadè sikudokken.’

²¹JAHOWA Pergegoh Sisotercodi, Dèbata Israel, enggo mengeranaken tersèngèt si Ahab anak si Kolaya deket tersèngèt si Zedekia anak si Maaseya simemakkè gerar JAHOWA lako pesakatken taba kènè tersèngèt siso tuhu. JAHOWA mendokken pesakatenna mo kalak i bai kuasa si Nebukadnezar raja Babel, sinaing memunuh kalak i i lebbè mata ndènè.

²²Asa mula naing kessa kalak sienggo iembah i Jerusalem i nai mi Babel naing menumpahi sada kalak jelma, dokenken kalak i mo, ‘Katerra pè ibaing JAHOWA mo bamu bagè taba si Zedekia dekket si Ahab, sienggo itutung raja Babel gelluh-gelluhen.’

²³Bagidi mo nasip kalak i kerna enggo mengulaken dosa dosa mbellen i Israel: Merlangkah julumeddem ngo kalak i, dekket memakè gerar JAHOWA lako mengeranaken kata-kata siso tuhu. Meralo ngo idi mi lemmo atè JAHOWA. Ibettoh ia ngo barang kadè iulaken kalak i, janah ia sendiri gabè saksi mengalo kalak i. JAHOWA ngo enggo mengerana.”

²⁴JAHOWA Pergegoh Sisotercodi, Dèbata Israel pesakatken tennah baku lako bai si Semaya, kalak Nehelam, kumerna enggo itengesken si Semaya surat merkitè gerarna sendiri mendahi karina pengisi Jerusalem, mendahi Imam Zepanya anak si Maaseya dekket mendahi karina imam sidèban. Ibas surat idi isuratken si Semaya ngo bagèen mendahi si Zepanya:

²⁶“Enggo ipebangkit JAHOWA kono gabè imam menggancih si Joyada, janah bagèndari pè kono ngo perkebbas sindatesna i Bages JAHOWA. Ulaenmu imo memerèntahken asa gennep kalak gila, simengakuken dirina nabi, ilanggu dekket rantè bessi i kerahongna.

²⁷Tapi kasa mo kono oda mukkap meradepken si Jeremia kalak Anatot idi sienggo mengaku gabè nabi i tengah-tengahta?

²⁸Kennah ngo sompellen babah kalak i, kerna idokken ngo taba dengan-denganta i Babel, ndekkah dèng ngo kalak i merian i sidi. Janah kerna i, nina, kennah ngo kalak i pejengjengken bages merjuma janah kipangani hasilna.”

²⁹Ijakaken Imam Zepanya ngo surat idi taba aku.

³⁰Kerna i ipasulak JAHOWA ngo aku

³¹menengesken berita tersèngèt si Semaya mendahi karina kalak Israel siterbuang mi Babel. Bagèen mo berita idi, “Enggo mengerana si Semaya taba kènè bagè cara nabi; keppèken Aku, JAHOWA, oda lot menuruhsa. Kumerna enggo tok kènè ibakin ia meradepken rana siso tuhu,

³²janah kerna enggo isuruh ia kènè mengalo Aku, asa hukumenKu mo ia dekket pinemparna. Sada kalak poda bai kalak i nai merian i tengah-tengah ndènè lako mengidah nasa simerandal sinaing bakinenKu taba karina bangsangKu. Aku, JAHOWA ngo sienggo mengerana.”