Read Batak Dairi Jeremia 3 Bible Online

Jeremia 3 - Batak Dairi bible

Jeremia 3

¹Nina JAHOWA mo, “Mula lot sada kalak partua ibages isirangken sinibalèna, nai gabè sinibages kalak sidèban nola mo daberru idi, nai oda nèngè mo ndorok sinibalèna i kin lako memuatsa balik gabè sinibagesna, kumerna memaing ncèda ngo bagi i nagerri èn. Alè Israel, bagendari enggo mbuè kalohon kekelengen atèmu, kasa mo bagèndari nola kono balik mendahi Aku!

²Oji mo lebbè tengngen dempak dates, mi pucuk-pucuk delleng! Bekkas apaina dèng mo siso nung mak iteppet ko lako mercampur? Bagè kalak Arab sini padang gurun, bagidi ngo ko kundul i biding dalan memèma kalak sinaing mersikekelengen. Isamuri kono ngo nagerri ènda merkitè merlangkah pilit dekket kejahatenmu.

³Kumerna i ngo asa tertahan laè kan langit nai, janah udan i mosin perudan oda roh. Tosè bagè sibabijalang ngo ko dekket siso memettoh mèla.

⁴Tikan ibas kepenjettenmu idi, idokken kono ngo taba Aku magahken Aku ngo bapamu, kukekelengi kono mungkah kedek nai.

⁵Idokken kono ma ngo magahken Aku oda ngo pukpuk dak melaga taba kono. Idi ngo idokken kono alè Israel, tapi sintorna i iulaken kono ma mo tong karina nasa kejahaten sindorok iulaken kono.”

⁶Tikan pemerèntahen Raja Josia, idokken JAHOWA ngo bagèen taba aku, “Enggo ma ngo idah kono kadè siniulaken Israel, daberru siso setia idi? Itadingken ia ngo Aku janah merlangkah julumeddem i babo gennep uruk ndates dekket i terruh gennep kayu ntemtem.

⁷KatèngKu mo enggo kessa iulaken ia karina idi, dahari mak balik ia taba Aku. Tapi keppè oda ngo balik ia taba aku, baliksa makin laus ngo ia merkendangen. Imo dalanna asa kusirangken janah kupelaus ia. Iidah Juda, dengngan sibeltek Israel, siso setia idi ngo karinana idi, tapi oda ngo mbiar ia. Baliksa ia nola pè dekket ngo gabè sibabijalang,

⁹janah laju oda ibettoh mèla. Merlangkah julu meddem ngo ia kumerna menembah batu deket kayu dungna gabè samur mo nagerri ènda.

¹⁰Enggo kessa iulaken Juda siso setia i karinana idi, roh nola ma mo ia balik taba Aku, tapi ipakulah-kulah ngo i, kumerna oda ngo tulus ukurna. Aku, JAHOWA, ngo simendokken i.”

¹¹Nai ibagahken JAHOWA nola mo taba aku, tukasi pè Israel enggo menondalisa, keppèken sellohen dèng ngo Israel daripada Juda siso setia i.

¹²Ipasulak JAHOWA ngo aku laus lako mendokken ènda bai Israel: “Alè Israel siso setia, balik mo kono taba Aku! Dom masèh atè ngo aku janah oda ngo soh mi amman sumendah aku melaga taba kono.

¹³Akku sambing mo magahken mersalah ngo kono, janah enggo memberontak taba JAHOWA, Dèbatamu. Akku mo magahken enggo ituduhken kono kelleng atèmu taba dèbata bangsa sidèban iterruh gennep kayu ntemtem, janah oda menguèi perèntahKu. Aku, JAHOWA ngo, sienggo mendokken i.”

¹⁴Nina JAHOWA mo, “ O kènè bangsa siso setia balik mo kènè taba Aku! Aku ngo sidasa kènè. Kualeng mo kènè, sada kalak ibas gennep kuta nai, dua kalak ibas gennep horong nai, janah merembah kènè balik mi Uruk Sion.

¹⁵Kuberrèken pè bai ndènè pengulu-pengulu simerpenguèi taba aku. Iuluken kalak i mo kènè selloh merkitè bijak dekket dom pengantusien.

¹⁶Nai enggo kessa tambah mbuè kènè i nagerri èn, oda nè mo terrèngèten ndèba tersèngèt Pèti PerpadanenKu. Oda nè mo ipikirken barang pè ièngèt kalak idi i, baliksa oda nèngè ngo perlu bai kalak idi i barang pè memahan Pèti Perpadanen sidèban.

¹⁷Ipas katika i mo kuta Jerusalem gabè igerari ‘Tahta JAHOWA’, janah suberri bangsa mo mertumpu i kuta i lako menembah Aku. Oda nèngè mo kalak i mengèkutken lemmo-lemmo atèna simbangal dekket jahat i.

¹⁸Mersada nola mo Israel dekket Juda, janah rebbakken roh kan nagerri kebuangen i utara nai. Balik nola mo kalak i mi nagerri sienggo Kuberrèken mahan tanoh pusakka bai empung ndènè.”

¹⁹Nina JAHOWA mo, “Alè Israel, naing ngo dok atèngku menjalo kono gabè dukakKu, dekket memerèken bamu nagerri simemaing sennang ukurmu, nagerri simendèna kalohon i suberri dunia. Naing ngo dok atèngku idokken kono taba Aku bapa, janah oda nè mperrus ko baku nai.

²⁰Tapi codi bagè sinibages siso setia, kono pè oda ma ngo setia taba aku. Aku, JAHOWA ngo sienggo mendokken i.”

²¹Terdengkoh ngo sora ngurngar i babo pucuk-pucuk delleng; idi mo sora tangis bangsa Israel janah simengelèk-èlèkken, kumerna enggo merdosa kalak i janah mengelupaken JAHOWA Dèbata kalak i.

²²Alè kènè karina sienggo menadingken JAHOWA, balik mo kè! Pemalumenna mo kènè, janah baingenna mo kènè gabè setia. Dokenken ndènè mo, “Uè Bagèndari roh mo kami mendahi JAHOWA, kumerna Ia ngo Dèbata nami.

²³Magosia sambing ngo kami rumimba-rimba menembah sembahen i babo pucuk-pucuk delleng! Pellin bai JAHOWA Dèbata nami nai ngo kessa roh pengurupi bai Israel.

²⁴Penembahen taba dèbata Beel, sembahen pemelaken idi ingo memakin kami kembalangen dukak-dukak nami bagi pinakan lembu dekket biri-biri, imo karina sienggo nikelejaken empung nami mungkah arnia nai.

²⁵Asa, atèna mo bagi kami menggongken kememalu, janah atèna mo bagi kami gabè merlèa. Kumerna, enggo merdosa kami bak empung nami taba JAHOWA Dèbata nami, janah oda nung ne menguèi perèntahNa.”