Read Batak Dairi Jeremia 30 Bible Online

Jeremia 30 - Batak Dairi bible

Jeremia 30

¹JAHOWA Dèbata Israel, mendokken taba aku, “Suratken mo ibas sada bukku karina sienggo Kudokken bamu.

³Kerna dapet ne mo tikkina Kupesuang balik bangsangKu Israel dekket Juda. Embahenku ngo kalak i balik mi nagerri sienggo Kuberrèken bai empung kalak i. Balik nola mo gabè kalak i sidasa nagerri idi. Aku, JAHOWA, ngo sienggo mengerana.”

⁴Nina JAHOWA ngo taba bangsa Israel dekket Juda,

⁵“Enggo kubeggèken derko kalak siringgodoren, derko kalak siburadan siso lot merkedamèen.

⁶Cuba mo pikirken janah perèso! Ndorok ngo anak laki menubuhken dukak? Mula bagidi, kasa gennep anak laki kuidah melangan abèna janah menongkel beltekna dekket tanganna bagè daberru sinaing ketaring?

⁷Enggo dapet tikkina ari ntengngam, ari siso lot todesna. Ukum bai bangsangKu ari sikebiaren ngo idi; tapi paluahenku ngo ukum kalak i.”

⁸Idokken JAHOWA Pergegoh Sisotercodi dèng ma ngo taba bangsaNa, “Mula roh kessa ari idi, kucuakken mo koldang-koldang sinibaingna mi tengkukuk ndènè, janah kutalkasi mo langgu ndènè. Oda nèngè mo kènè gabè hamba kalak sidèban.

⁹Gabè tunduk taba aku, JAHOWA Dèbata ndènè mo kènè, dekket taba sada kalak pemparen si Daud sinaing pebangkitenku gabè raja.

¹⁰Alè bangsangKu Israel, ulang kènè mbiar! Alè naposongKu si Jakob, ulang mo ko ringgodoren! Paluahenku mo kènè dekket pinempar ndènè i nagerri sindaoh nai, bekkas ndènè itaban. Balik nola ngo kènè i sidi nai janah merian i nagerri ndènè ibagasen mènak. Sennang mo kènè nggelluh; oda lot nèngè sikebiaren ndènè.

¹¹Roh nèngè mo aku janah paluahenku mo kènè. Karina bangsa, bekkas ndènè kupesompar-baèrken karina naing Kubinasaken, tapi ukum kènè oda ngo bagidi Kubakin. Tuhu oda ngo mpellut kènè ibas hukumen nai tapi adil ngo hukumKu taba kènè rembang bagè sienggo ihatorken. Aku, JAHOWA ngo, sienggo mengerana.”

¹²Nina JAHOWA mo taba bangsaNa “Mpiah kalohon ngo sakitmu oda lot tambar mi ugahmu

¹³Sada kalak poda uè mengusahaken kono bakunè asa njuah, oda lot tambar baroh-barohmu oda lot nèngè harapen lako njuah bamu.

¹⁴Karina sinikekelengenmu enggo lupa taba ko; oda nèngè uè kalak i menarihken dirimu. Bagè musuh ngo Aku menjuhap deket menghukum kènè mpiah kalohon kerna mbuè ngo dosa ndènè janah mbelgah ngo kesalahen ndènè.

¹⁵Ulang nèngè mo kelsohken tersèngèt ugah-ugahmi, kerna oda lot nè harapen ko lako njuah. Kuhukum kènè bagidi kumerna mbuè ni dosamu dekket mbelgah ni kesalahenmi.

¹⁶Tapi kum bagèndari karina simenellen kènè kennah telennen, janah karina nasa musuhmu ibantun mo mi buangen. Kudersa mo simendersa kènè, Kurampasi mo kalak simengerampasi kènè.

¹⁷Tukasi nola pè musuh ndènè mendokken, ‘Enggo iambongken Sion janah oda lot isè menarihken,’ bagi nola pè bakinenku ngo kènè merkinijuah, janah tambarenku mo ugah-ugah ndènè.”

¹⁸Nina JAHOWA dèng ma: “Ukum kènè, bangsangKu masèhenku janah pesuangenku mo kènè balik mendè i lebbuh ndènè sendiri. Pekadèenku nola mo Jerusalem janah ipeselloh istanana.

¹⁹Ipoji pengisi kuta i mo Aku merkitè endè, janah mersurak-surak merlolo atè. Mersangap mo kalak i kubakin janah oda nèngè ipelèa, janah dak mertambah-tambah mo bilangen kalak i.

²⁰Terberita nola mo Kubaing bangsangmu bagè sienggona, janah cènder nola balik gabè bangsangKu. Karina simenèndessa Kuhukum mo.

²¹Raja simemerèntah kènè pè merasal i bangsa ndènè nai mo. Bebas mo ia ndorok menjolmiti Aku mula kudilo ia menghadep Aku. Kerna mènter isè mo pang menghadep Aku merkitè ukur-ukurna sendiri? Kènè ngo gabè bangsangKu janah Aku gabè Dèbata ndènè. Aku, JAHOWA ngo simendokken idi.”

²³Laga JAHOWA codi bagè kalisungsung, bagè angin ndor sapa-sipu menerpa kalak perjahat, janah oda uè mentadi kum mak dèng saut merdalan karina sura-surana. Ipodi ari pè asa iarusi bangsaNa tersèngèt mi si.