Read Batak Dairi Jeremia 31 Bible Online

Jeremia 31 - Batak Dairi bible

Jeremia 31

¹Nina JAHOWA mo, “Roh mo katikana Aku gabè Dèbata karina marga Israel, janah kalak i gabè bangsangKu.

²I padang gurun kupacidah ngo masèh atèngku taba kalak i sienggo mpellut ibas kematèen nai. Tikanna itulusi bangsa Israel ketenangen,

³i sindaoh nai kupacidah ngo diringKu bai kalak i. Alè bangsa Israel, arnia nai ngo Aku dak mermasèh atè bamu, janah mi podi ari nola pè dak tong ngo Kupacidah magahken dak ngo kukekelengi kènè.

⁴Bakinenku mo termurmur bangsa ndènè bagè sienggona. Balik nola mo kènè sikali nai memalu gendang, janah tumatak merlolo atè.

⁵Pungkahen ndènè mo pekken anggur i delleng Samaria, janah ipotik simenuan mo buahna.

⁶Tuhu-tuhu dapet nèngè mo katikana karina pertaram kuta dilo-dilo i delleng Efraim, ‘Ita kè mo menangkeng mi Sion, mendahi JAHOWA Dèbatanta.’ ”

⁷Nina JAHOWA, “Merendè mo kè mersampang atè bai Israel BangsangKu bangsa sitermurmur ibas karina bangsa nai. Endèken mo endè pemojien, janah beritaken mo: ‘Enggo ipaluah JAHOWA sitadingna dèng kin ibas bangsaNa nai.’

⁸Kubabai ngo kalak i balik i utara nai; Kupepulung ngo kalak i i karina punca tanoh ènda nai. Mengèkut mo taba kalak i sipètung dekket kalak sipangpangen, bagi dekket daberru sirimbaru ketaring deket simengkandong. Roh ngo kalak idi balik ibagasen bilangen nterrem kalon mi nagerri ènda.

⁹Merdalan ngo kalak i ninganna terèluh, Kuapoi janah Kuteggu-teggu ngo kalak i. Kubabai mo kalak i tarap bekkas simbuè laèna, tarap dalan ndèas i bekkas kalak i oda pella terdengdeng. Ukum bai kalak Israel, bagè sikira bapa ngo aku; Efraim ngo anakKu situaen.”

¹⁰Nina JAHOWA, “Dengkohken mo alè karina bangsa! Pesakat kènè mo tennahKu mi kèpar laut. BangsangKu sienggo kupesompar-baèrken kupepulung nola janah kupehèdu-hèdu codi bagè permakan menjaga biri-birina.

¹¹Enggo Kuperkinijuahi Bangsa Israel, janah Kupaluah tarap bangsa simergegoh nai.

¹²Merrohen mo kalak i mi Uruk Sion abèna pè mbinar-mbinar, ninganna merendè merlolo atè kumerna karina pemerrèkenKu bai kalak i, imo pagè, minak, anggur, lembu dekket biri-biri. Codi bage pekken cukup laèna ngo kalak i, janah oda kurangen barang kadè.

¹³Ipas katika i tumataki mo nasa simerbaju ibagasen lolo atè. Rebbak mersennang-sennang mo situa-tua deket kalak simenguda, kerna Kuapoi mo kalak i. Obahenku mo bonek atè kalak i gabè lolo atè, ukur bonek kuobah gabè kelolonken.

¹⁴Pebessurenku mo imam merkitè pangaen merotcè-otcè janah Kuberèken mo karina nasa siniperluken bangsangKu. Aku, JAHOWA ngo, simendokken i.”

¹⁵Nina JAHOWA mo, “Terdengkoh ngo sora tangis derru-derru i kuta Rama dekket kekelsohen idomi kinimpersuk. Itangisi si Rahel ngo dukak-dukakna, Oda uè ia iapoi kerna oda lot nèngè dukak kalak i.

¹⁶Petadi mo tangismu janah apus mo èluhmu! Oda sia-sia nola kelejaenmu bai dukak-dukakmu. Lot ngo upah bamu, mermulaken dukak-dukakmu i nagerri alomu nai.

¹⁷Lot ngo siharapenken bamu i ari podi; merbaliken mo dukak-dukakmu mi kutana.

¹⁸Kudengkoh ngo bangsa Israel mengerana ibagasen bonek, ‘Alè JAHOWA, codi ngo kami bagè pinakan simakdèng ipelemmuk tapi iajari kono ngo kami asa patuh, janah bagèndari hantar ngo kami lako balik baMu. Asa, embah mo kami balik, alè JAHOWA Dèbata nami.

¹⁹Enggo kutondalken kami kono, tapi kuselselli kami ngo pemahan nami i. Enggo kessa ihukum kono kami, tungkuk ngo takalnami kumerna bonekna. Mèla ngo kami janah gabè merlèa, kumerna enggo merdosa tikan poso dèng.’

²⁰Alè Israel, kono ngo anak kekelengenKu, anak lemmo-lemmo, tampuk pusuh-pusuhKu. Gennep Aku mengasup kono dak ngo kuèngèt kono merdengngan ntedoh. Bakinenku mo bamu dom masèh atè.

²¹Tanda mo dalan-dalan, bakin mo rambu-rambu tulusi mo dalan sinidalanenmu arnia. Alè Israel, balik mo ko! Balik mo ko mi kutamu siperlebbè.

²²Sakat soh ndigan ngo kono dak pukpuk ragu, alè bangsa siso setia taba Aku? Enggo kuhanaken sada sirimbaru i dunia, bagè cara jaè-jaè oda obah bagè daberru simemoniken anak laki.”

²³JAHOWA Pergegoh Sisotercodi, Dèbata Israel mendokken, “Mula enggo kessa kubaingken bangsangKu termurmur nola bagè sinderrangna i, nai terdengkoh nola mo kalak mendokken i nagerri Juda bak karina kuta silot i si, ‘Katerra pè ipasu-pasu JAHOWA mo Uruk Simbadia i Jerusalem bekkas merian simerkedekoen baNa.’

²⁴Merian i Juda mo kalak i dekket i karina kuta silot i si. Lot nola mo i si peruma-uma dekket permakan simermakani lembu dekket biri-birina.

²⁵Peguharenku mo daging kalak i sienggo ledja i, janah pebessurenku mo sindotè kumerna kelèhèen.

²⁶Ipas katika i dokenken ndèba mo, ‘Enggo kessa lènek meddem, ngguhar mo kuakap.’

²⁷Aku, JAHOWA mendokken lot ngo katikana kaduan domenku jelma bak pinakan nagerri Israel dekket Juda.

²⁸Bakunè kin arnia Aku mermuduken kalak i nai asa Aku nola ma mengerengkat, mengerentuhken dekket mengelala kalak i, bagidi nola ma mo Aku menjaga kalak i asa Kupetegguh janah kupekèkè nola kalak i balik.

²⁹Ipas katika i oda nè mo dokenken ndèba, ‘Partua kipangan buah macem, èpen dukakna nola mengakapken mengèlu,’

³⁰tapi barang isè kipangan buah macem, ia sendiri mo mengakapken mengèlu èpenna. Gennep mo kalak matè kumerna dosana sendiri.”

³¹Nina JAHOWA mo, “Dapet nèngè mo katikana Aku memahanken perpadanen sirembaru dekket bangsa Israel bak Juda.

³²Tapi ukum perpadanen idi oda ngo bagè perpadanen siKubakin dekket empung kalak i tikanna Kubabai kalak i mbungkas i Mesir nai. Tukasi pè Aku bagè sada kalak sini balè bai kalak i, tapi iosè kalak i ngo padanKu dekket kalak i.

³³Bagèen mo padan sirembaru sinaing bakinenku taba bangsa Israel: LeketenkenKu mo pati-patinku ibagasen pusuh peratèen kalak i, janah Kusuratken ibas atè-atè kalak i. Aku mo gabè Dèbata kalak i, janah kalak i mo gabè bangsangKu.

³⁴Oda pella perlu nèngè sada kalak pè bai kalak idi nai mengajari samah kalak i lako menandai JAHOWA. Kumerna karina kalak i, simbelgah barang anak-anak, itandai ngo Aku. Kulupaken mo kesalahen-kesalahen kalak i, merpemuati mo ukurku midah dosa-dosa kalak i. Aku, JAHOWA ngo, sienggo mengerana.”

³⁵Mataniari ipehantar JAHOWA lako menerangi mahar; bulan dekket bintang-bintang lako menerangi berngin. Igaru ngo laut gabè kumecaho mo galombang, JAHOWA Pergegoh Sisotercodi, idi ngo gerarna.

³⁶Merjandi ngo JAHOWA, “Sidekkah oda mobah hukum dunia dekket berngin, ari leggo dekket ari udan tong ngo hot bangsa Israel gabè sada bangsa.

³⁷Mula i sada tikki ndorok tersibar langit dekket dangaen tanoh ndorok iperèso, ipas katika i mo Israel tulakenKu kumerna karina ulah-ulah kalak i jahat i. Aku, JAHOWA, ngo sienggo mengerana.”

³⁸Nina JAHOWA, “Roh mo tikkina ipelias nola mo balik Jerusalem gabè kutangKu, mungkah i palas Hananeel nai soh mi Pèntu Pengkeruhen Soki.

³⁹I sidi nai mo balengna menghuju Uruk Gareb, ninganna merèluk mi Goa.

⁴⁰Karina lembeng idi, sinipakè mahan kuburen dekket bekkas pengambongen simperren i biding Laè Kidron sakat mi Pèntu Pengkeruhen Kuda dempak kebincaren, merkemeddu mo i lako baku. Oda nèngè mo rentuhenken kuta Jerusalem barang pè ilala.”