Read Batak Dairi Jeremia 32 Bible Online

Jeremia 32 - Batak Dairi bible

Jeremia 32

¹I tahun pesipuluhken pemerèntahen si Zedekia raja Juda, imo tahun pesipuluhualuhken pemerèntahen si Nebukadnezar raja Babel, mongkam mo JAHOWA taba aku.

²Ipas katika i tupung ngo tenterra Babel menjuhap Jerusalem. Itahan ngo aku i kasèan istana raja

³kerna ituduh Raja Zedekia aku enggo meningtingken pendokken JAHOWA bagèen, “Bellinku mo Raja Babel menaluken dekket mengerajai kuta èn,

⁴janah Raja Zedekia pè oda mpellut. Pesakatenku mo ia taba raja Babel, janah mengadep raja idi ninganna mengerana sendiri dekketsa.

⁵Nai iembah nola mo si Zedekia mi Babel janah merian i sidi soh mi Kuhukum ia. Tukasi pè ia mengalo kalak Babel, oda ngo lot lapatenna. Aku, JAHOWA ngo, sienggo mengerana.”

⁶Nina JAHOWA mo taba aku — ukum si Hanameel, anak puhunku si Salum, roh nèngè mo lako mengido asa kutokor tanohna i Anatot i ladang kalak Benjamin. Kerna, aku ngo pamilina sincelketna merhak lako menokor tanoh i.

⁸Nai pas bagè sienggo nidokken JAHOWA, roh mo si Hanameel mendahi aku i kasèan istana, janah mengidoken asa kutokor tanohna idi. Kerna i tok mo ukurku tuhu-tuhu ngo JAHOWA enggo mengerana taba aku.

⁹Nai kutokor mo tanoh i bai si Hanameel nai argana sipuluh pitu kèpèng pirak. Kudilo mo saksi-saksi janah i lebbè kalak i kutekken mo surat penokoren i, nai kubakin mo sègèlna — janah kutimbang kèpèngna.

¹¹Kessa i kubuat mo surat penokorna sienggo mersègèl i janah sienggo sin sarat-sarat bak hatoren simerlakku. Kubuat ma mo salinen surat siso mersègèl i,

¹²janah duana surat idi kuberrèken bai si Barukh anak si Neria kempu si Mahseya. Kusohken mo i lebbè si Hanameel dekket saksi-saksi sienggo menekken surat-surat idi, dekket i lebbè kalak sidang kundul i kasèan idi.

¹³Ningku mo i lebbè kalak i karina taba si Barukh,

¹⁴“JAHOWA Pergegoh Sisotercodi, Dèbata Israel, memerèntahken asa buat duana surat ènda, agia aslina bang pè salinenna, janah masukken mi bagasen sada koden tanoh asa tahan ndekkah.

¹⁵JAHOWA Pergegoh Sisotercodi, Dèbata Israel, mendokken ukum bages, tanoh dekket pekken anggur idèa nola mo i luas i nagerri èn.”

¹⁶Enggo kessa mo kuberrèken surat perdèaen i bai si Barukh, mersodip mo aku,

¹⁷“Alè JAHOWA Sintèmbul kalohon, kono ngo simenempa langit dekket tanoh merkitè kuasa dekket kegegohenMu simbelgah kalohon i. Oda lot barang kadè pè songket baMu.

¹⁸Ipetuduh kono ngo masèh atèMu simenettap i bai meribu-ribu kalak, tapi ihukum kono ma ngo kalak kumerna dosa partuana. Kono ngo Dèbata sitermurmur janah mahantu; JAHOWA Pergegoh Sisotercodi ngo gerarmu.

¹⁹Karina ngo takimu mahantu janah kelengangen ngo pemahanmu; idah kono ngo karina siniulaken jelma, janah kibalesken taba kalak i rembang bagè siniulaken kalak i.

²⁰Arnia pè ipehana kono ngo kelengangen dekket siso nung masa i Mesir, janah soh bagèndari dak ibaing kono ngo bagidi, bang i tengah-tengah kalak Israel barang pè i tengah-tengah karina bangsa sidèban. Kerna i bagèndari termurmur ngo kono barang i dikè sambing.

²¹Merkitè kuasa dekket kegegohenMu mahantu i ibabai kono ngo bangsa Israel mbungkas i Mesir nai. Ipehana kono ngo tanda-tanda bak kelengangen bagi bang simasa menggontarken musuh.

²²Berrènkenmu ngo nagerri merandal janah nggabur èn bai kalak i bagè sienggo iperbagah ko bai empung kalak i.

²³Tapi tikan roh kalak i mi nagerri ènda janah mengerampasisa, oda patuh nèngè kalak i mi perèntahMu, janah oda nè merpengelako rembang mi karina peddahMu. Karina sinidokkenmu taba kalak i sada poda iulaken kalak idi. Kerna i ibakin kono mo roh karina olpek ènda taba kalak i.

²⁴Enggo ibahan kalak Babel parik-parik pengkubuen bekkas perjuhapen i kumaliang kuta lako menalukensa, janah bagèndari enggo roh kalak i menjuhap. Pergerahaen, kelèhèen dekket sakit wabba mo memaingken kuta ènda gabè patu mi tangan kalak i. Idah kono ngo karina sinidokkenmu idi enggo gabè ntarar.

²⁵Bagidi nola pè, alè JAHOWA Sintèmbul kalohon i, kono ngo mendokken aku menokor tanoh èn i lebbè saksi-saksi, tukasi pè sinempas nai naing irampas kalak Babel kuta èn.”

²⁶Kessa i nola nina JAHOWA mo taba aku,

²⁷“Aku ngo JAHOWA, Dèbata ni karina jelma. Oda lot songket bangku.

²⁸Bellinku mo kuta ènda irampasi si Nebukadnezar raja Babel rebbak dekket karina tenterrana. Itaban kalak idi mo kuta ènda,

²⁹janah ilekkup soh kerri rebbak dekket karina bages sinibaing kalak simendungkul lagangKu, kerna ibabo bages idi mo kalak i menutung dahupa taba dèbata Baal dekket mengarirken anggur mahan pèlèen taba dèbata sidèban.

³⁰Mungkah kessa nai kin lot kalak i, kalak Israel dekket kalak Juda enggo dak memaing oda sennang Aku. Idungkul kalak i ngo lagangKu merkitè pemahan kalak i si jahat i.

³¹Kessa nai ipajek kuta ènda, enggo melaga kalohon Aku ibakin pengisi kuta èn. Enggo ngo sanga kudokken lako mengagoken kalak i,

³²kerna karina kejahaten siniulaken kalak Juda dekket Jerusalem deket nasa raja, pugabè pemerèntah, imam dekket nabi-nabi kalak i.

³³Enggo itadingken kalak i Aku janah tukasi pè Aku dakdak pukpuk mengajari kalak i, oda ngo uè kalak i mendengkohken janah oda uè mèut.

³⁴Tambahna deng bages sinipejengjeng mahan bekkas pemojien taba aku pè enggo ilamuni kalak i merkitè menggamparken gana-gana kalak i sikukecegoken i bekkas idi.

³⁵Ipajek kalak i mo langgaten-langgaten bai Dèbata Baal i Lembeng Hinom janah memèlèken dukak-dukak kalak i bai Dèbata Molokh. Keppèken oda nung kudokken kalak i mengulaken idi, baliksa oda nung turah ibas pikirenKu kalak i mahanken bagi tengngamna dekket memaingken kalak Juda merdosa.”

³⁶JAHOWA, Dèbata Israel, mendokken taba aku, “Alè Jeremia, idokken bangsa Israel geraha, kelèhèen, dekket sakit ngo memakin kuta èn ndabuh mi tangan raja Babel. Bagèndari pè, dengkohken mo kadè sinaing dokenkenku bamu.

³⁷Naing pepulungenku mo bangsa èn i karina nagerri bekkas kalak i kupesompar-baèrken i nai kerna lagangKu dekket nggettemKu taba kalak i. Embahenku mo kalak i balik mi bekkas èn janah ndorok merian i bekkas ènda ibagasen kemènaken.

³⁸Gabè bangsangKu mo kalak i, janah Aku gabè Dèbata kalak i.

³⁹Berrènkenku mo bai kalak i pellin sada ngo kessa situjuen ibas nggelluh èn: Imo, pesangapken Aku soh mi amman sumendah; idi mo merembahken kiniselloh bai kalak i sendiri, dekket bai pinempar kalak i.

⁴⁰Bakinenku mo perpadanen simenettap meradepken kalak i. Oda nè mentadi aku memakin simerandal taba kalak i. Bakinenku mo kalak i merkebiaren janah hormat taba aku ibas nasa ukurna nai asa ulang menisi kalak i bangku nai.

⁴¹Sennang mo ukurku pepadaken simerandal taba kalak i, janah memakin kalak i menettap i nagerri ènda soh misidekah-dekkahna.

⁴²Bakunè kin Aku perohken jèkat taba bangsa ènda, bagi ma mo Kuberrèken karina simerandal sienggo Kuperbagah-bagah i bai kalak i.

⁴³Kalak mendokken ukum nagerri ènda enggo gabè bagè padang gurun siso niianen jelma bak binatang, janah ukum nagerri èn enggo ndabuh mi tangan kalak Babel. Tapi aku mendokken, luas masa nola mo merdèa bak menoker juma i nagerri èn;

⁴⁴itekkèni mo surat penokorennna, isègèl, janah ipetegguh saksi-saksi. Masa mo idi i tanoh kalak Benjamin, i sosor-sosor kumaliang Jerusalem, i karina kuta Juda, i karina kuta aur uruk-uruk, sinipispis delleng, dekket i Juda Selatan. Pesuangenku mo balik bangsa èn i nagerri ènda. Aku, JAHOWA ngo, sienggo mengerana.”