Read Batak Dairi Jeremia 33 Bible Online

Jeremia 33 - Batak Dairi bible

Jeremia 33

¹Sinderrang itahan dèng aku i kasèan, roh nola mo bangku tennah sidèban bai JAHOWA nai

²simenjadiken tanoh èn janah simemahan bak menggamparken i kebekkasenna. Nina mo,

³“Dilo-dilo mo ko taba Aku, kualoi pè kono; asa Kubagahken mo bamu tersèngèt simerandal dekket sikelengangenken siso nibettohmu dèng.

⁴Enggo irontasken istana raja Juda dekket karina bages sini kuta Jerusalem lako petegguhken pertahanen meradepken peraloen bak pengkubu musuh. Tapi Aku, JAHOWA, Dèbata Israel mendokken,

⁵magosia sambing ngo mengalo kalak Babel, kerna pellin memaingken kuta èn dom bangkè kalak sikuripasken kerna laga dekket nggettemku taba kalak i. Oda roh gèutku nèngè menengèn kuta èn kerna karina kalakna enggo mengulaken jahat.

⁶Tapi pesuangenKu nola ngo seggen kuta èn dekket pengisina pè; balik nola mo kalak i mergegoh. Kuberrèken mo bai kalak i kiniduma dekket kemènaken merlebbih-lebbih.

⁷Bakinenku nola mo terberita Juda dekket Israel bagè sienggona i janah balik nola mo kalak i jengjeng gabè bangsangKu.

⁸Pepantingenku mo kalak i ipas dosa-dosa siniulaken kalak idi nai meradepken Aku; merpemuati mo ukurku taba dosa-dosa dekket pengalonken kalak i.

⁹Gabè kelolonken janah kehangganKu nola mo Jerusalem. Karina bangsa sini dunia èn gabè mbiar janah ringgodoren ninganna pesangapken Aku, idengkoh kessa tersèngèt karina simerandal sikubakinken meradepken pengisi Jerusalem, dekket tersèngèt kiniduma siKuberrèken mi kuta idi.”

¹⁰Nina JAHOWA ngo, “Idokken dèba ukum bekkas ènda codi bagè padang gurun, oda lot jelma barang binatang merian i sidi. Tuhu ngo gia rana kalak i, kerna karina kuta silot i Juda dekket karina dalan silot i Jerusalem enggo melongo, oda lot jelma barang binatang merian i sidi.

¹¹Tapi i karina bekkas idi terdengkoh nola mo sora lolo atè dekket oang-oang bagi dekket sora pesta merbayo. Terdengkoh nola ma mo bak endè kalak simerembah pèlèen lias atè mi bagesKu. Dokenken kalak i mo, ‘Dokken mo lias atè bai JAHOWA Pergegoh Sisotercodi, kerna permendè basa ngo Ia janah soh mi sidekkahNa ngo kelleng atèna.’ Bakinenku nola mo nduma nagerri èn bagè sienggona. Aku, JAHOWA ngo, sienggo mengerana.”

¹²JAHOWA Pergegoh Sisotercodi mendokken, “Oda nèngè ngo iiani jelma barang pè binatang nagerri dekket kutana sibagè padang gurun èn. Tapi bagidi nola pè, i podi ari lot nola mo dukut-dukut i jampalen bekkas ndèba mermakan biri-birina.

¹³I karina kuta sikettan delleng, ipispis delleng, aur Juda selatan, dekket i tanoh kalak Benjamin bagi dekket i sosor-sosor silot i kumaliang Jerusalem, dekket i kuta-kuta Juda, ibilangi permakan nola mo biri-birina. Aku, JAHOWA ngo, sienggo mendokken i.”

¹⁴Nina JAHOWA ngo, “Dapet nè mo katikana kupahèi bagah-bagahku sienggo Kubaing meradepken Israel dekket Juda.

¹⁵Ipas katika i pilihenku mo sada kalak ntèger merukur i pinempar si Daud nai gabè raja. Ibaing raja i mo kadè ntèger dekket bennar i suberri nagerri.

¹⁶Iperkinijuahi mo kalak Juda dekket pengisi Jerusalem janah nggelluh ibagasen kemènaken. Igerari mo kuta Jerusalem ‘JAHOWA ngo Sipeluah Banta.’

¹⁷Aku, JAHOWA, menjandiken dak mo tong lot sada kalak ibas pemparen si Daud nai gabè raja Israel;

¹⁸dak mo tong lot imam ipas marga Lewi nai simengkebasi Aku dekket memèlèken pèlèen pinakan, pagè dekket pèlèen sinitutung.”

¹⁹Idokken JAHOWA mo taba aku, “Enggo kukelcing padan meradepken mahar dekket berngin, asa mahar dekket berngin dak tong roh ipas katikana; oda ndorok isomadaken perpadanen idi.

²¹Bagi ma ngo enggo kukelcing padan dekket naposongKu si Daud, magahken dak tong lot ibas pinemparna nai sada kalak gabè raja; janah enggo kukelcing padan meradepken imam-imam pemparen Lewi magahken dak tong kalak i mengkebasi Aku. Karina padan idi oda ndorok isomadaken.

²²Tambahenku mo pemparen naposongKu si Daud dekket imam-imam marga Lewi; gabè mèduk mo bilangen kalak i bagè buè kersik sinibiding laut dekket bintang i langit siso ndorok terbilang.”

²³Nina JAHOWA ngo taba aku, “Enggo ma ngo idatèken kono kadè idokken dèba taba Israel dekket Juda? Idokken kalak i ngo enggo Kuambongken duana bangsa sienggo Kupilih idi. Ingo dalanna asa kèdèk ètongen kalak i menèngen bangsangKu, janah oda nèngè iètongi kalak i gabè sada bangsa.

²⁵Tapi bagè sinibettohmu, Aku, JAHOWA enggo memakin sada padan meradepken mahar dekket berngin, dekket memakin hatoren simengatur langit dekket tanoh èn,

²⁶bagidi ma mo Aku tong hot mencèkèp padanKu meradepken pemparen si Jakob dekket naposongKu si Daud. Pilihenku mo sada kalak ibas pemparen si Daud nai lako memerèntah pemparen si Abraham, si Isak, dekket si Jakob. Mermasèh atè mo aku taba bangsangKu, janah kubakin nola mo kalak i balik bèak gabè.”