Read Batak Dairi Jeremia 34 Bible Online

Jeremia 34 - Batak Dairi bible

Jeremia 34

¹Sinderrang si Nebukadnezar raja Babel rebbak dekket tenterrana itambah dekket tenterra karina bangsa dekket negara situnduk tabasa roh mengkubu Jerusalem dekket karina kuta sikulilingna, mongkam mo JAHOWA taba aku.

²Ipasulak ngo aku laus mendahi si Zedekia raja Juda, dekket mendokken bagèen, “Aku, JAHOWA Dèbata Israel, naing menohken kuta èn bai raja Babel janah tutungenna mo kuta èn.

³Oda mo ndorok ko mpellut, tapi itangkup ngo kono janah isohken tabasa. Kono sendiri mo pejumpa dekket mengerana tabasa, ninganna laus mo kono mi Babel.

⁴Tapi dengkohken mo ranangKu ènda tersèngèt kono, alè Zedekia! Oda pella matè ko ibas pergerahaen,

⁵tapi matè ibagasen mènak. Janah bakunè kin cemmalna jelma mbellang menutung dahupa sinderrang mengkuburken empungmu simemerèntah ilebbènkenmu, bagidi ma ngo ginemgem i menutung dahupa lako bamu. Merhendem mo kalak i janah mendokken, ‘Nong alè! Enggo dung Rajanami!’ Aku, JAHOWA ngo, sienggo mengerana.”

⁶Nai kupessoh mo tennah JAHOWA idi bai Raja Zedekia i Jerusalem,

⁷tikan tupung tenterra raja Babel menjuhap kuta idi. Ikubu kalak i ma ngo kuta Lakhis dekket Azeka, dua kuta gotting si lot dèng mertahan i Juda.

⁸Ibakin raja Zedekia mo padan dekket pengisi Jerusalem lako paluahken

⁹hamba-hamba kalak Heber bai kalak i nai, bang anak laki bang daberru asa ulang lot nèngè sada kalak pè ibas bangsa Israel nai simemperhamba dengnganna sada bangsa.

¹⁰Karina ginemgem dekket pugabè-pugabè pemerèntah sienggo mahanken padan idi lako paluahken karina hamba kalak i janah oda nèngè kiperhamba kalak i balik, tuhu-tuhu mo paluahken karina hamba kalak idi.

¹¹Tapi kessa i nola mobah ngo pikiren kalak i, nai ialeng kalak i mo balik hamba-hamba idi, janah memaksa kalak i balik gabè hamba.

¹²Nai ipasulak JAHOWA, Dèbata Israel, mo aku mendokken bagèn taba gennep kalak i, “Sinderrang kuembah empung ndènè ruar i Mesir nai janah paluahken kalak i kan perhambaen nai, enggo ngo kubaing padan dekket kalak i.

¹⁴Kudokken ngo ukum karina kalak Heber sienggo mengkebasi ennem tahun dekkahna, kennah ngo paluahen ipas punca tahun pepituken. Tapi oda uè empung ndènè menuihken bang pè mendengkohken kadè sikudokken idi.

¹⁵Barang piga-piga ari sienggo laus i iobahi kènè ngo pekilako ndènè janah mengulaken sipeloloken ukurKu. Enggo ngo karina kènè menguèken lako paluahken nasa hamba dengngan ndènè sada bangsa janah memakin padan dekket Aku ibagasen BagesKu.

¹⁶Karina pugabè pemèrèntah Juda dekket Jerusalem rebbak dekket Pugabè istana, imam-imam dekket karina mandur tanoh ndènè enggo kisahken padan idi merkitè menembellih lembu, mengelapah gabè dua, janah merdalan arap kellang-kellang sidua mpenggel i. Tapi, kessa i nola mobah mo pikiren ndènè janah mengèlèai Aku. Karina hamba sienggo nipaluah ndènè rembang bagè sinipercinta kalak i, ialengi kè nola mo balik janah ipaksa kènè asa balik gabè hamba. Kerna i, Aku, JAHOWA, mendokken enggo ilausi kènè perèntahKu, janah oda menguèi sarat-saratna, kerna oda uè kènè paluahken samah kènè bangsa Israel. Asa, bagèndari pè selloh mo Kuberrèken kebèbasen bai ndènè: Kebèbasen matè mergeraha barang matè kumerna sakit wabba barang ibaing lèhè. Bakinenku mo taba kènè bagè sinibakin ndènè taba lembu sinisèat ndènè i. Mengerri mo kubaing iakap karina bangsa sini dunia èn mengidah sikubakin taba kènè.

²⁰Pesakatenku mo kènè taba musuh simertaki memunuh kènè. Ipangani manuk-manuk bak binatang sinirambah mo bangkè ndènè.

²¹Pesakatenku mo si Zedekia raja Juda dekket karina pugabè pemerèntahna bai kalak sinaing mertaki memunuh kalak i. Pesakatenku mo kalak i taba tenterra Babel, sienggo menadingken kènè bagèndari.

²²Baingenku mo perèntah asa balik kalak i mi kuta ènda lako menjuhap, menaluken, dekket menutung. Baingenku mo karina kuta silot i Juda codi bagè padang gurun siso i iani jelma. Aku, JAHOWA ngo, sienggo mengerana.”