Read Batak Dairi Jeremia 35 Bible Online

Jeremia 35 - Batak Dairi bible

Jeremia 35

¹Sinderrangna si Joyakim anak si Josia gabè raja Juda, nina JAHOWA mo taba aku,

²“Laus mo ko mengerana dekket horong si Rekhab. Babai mo kalak i mi sada bilik ibagasen BagesKu, janah pehantar anggur bai kalak i.”

³Nai laus mo aku mengaleng karina horong si Rekhab, imo si Jaazanya (dukak sadakalak mergerar si Jeremia anak si Habazinya) rebbak dekket karina kaka-anggina bak dukak-dukakna daholi.

⁴Kuembah mo kalak i mi Bages JAHOWA mi bekkas sisiin Nabi Hanan anak si Jigdalya. Bekkas idi imo i babo bekkas Imam Maaseya anak si Salum, i gembar bilik bekkas pugabè pugabè sidèban. Si Maaseya imo simerpangkat ndates simenjaga karina pèntu i Bages JAHOWA.

⁵Nai kessa i kugamparken mo i lebbè kalak Rekhab idi caban perènumen dom sin anggur, bagi dekket galas perènumen. Nai kudokken mo taba kalak i, “Enum kènè mo.”

⁶Tapi ialoi kalak i mo, “Oda kuènum kami anggur. Igerra empung nami si Jonadab dukak si Rekhab ngo kami dekket pemparen nami mengènum anggur. Merdalan ngo rarangen idi soh mi sidekkah-dekkahna.

⁷Oda ndorok kami menuan-nuani janah oda ma ndorok memahan barang merpekken anggur. Bagi ma sidekkah nggelluh nami oda ndorok kami pejengjengken bages. Kennah ngo kami merian i bagasen undung-undung, asa ndorok menettap i tanoh èn kira kalak pendampin.

⁸Karina sienggo iperèntahken si Jonadab taba kami enggo kuuèi kami. Sidekkah nggelluh, kami dekket dukak-dukak bak sinibages nami oda mengènum anggur.

⁹Oda ngo kupajek kami bages mahan bekkas ianen nami, tapi merian ibagasen sapo-sapo ngo kami. Bagi ma oda lot pekken anggur nami, juma barang bennih pagè lako suanen. Joppok dokonen, karina sinidokken empung nami si Jonadab idi, tuhu-tuhu kuuèi kami.

¹¹Tapi sinderrang ijuhap Raja Nebukadnezar nagerri ènda, kupekatken kami ngo asa mperrus ipas tenterra Babel dekket tenterra Siria nai, janah mengusi mi Jerusalem. Kerna i ngo asa tong kami merian bagèndari i sènda.”

¹²Nai ipasulak JAHOWA Pergegoh Sisotercodi, Dèbata Israel mo aku laus mendahi kalak Juda dekket Jerusalem, janah magahken tennah JAHOWA ènda bai kalak i, “Aku, JAHOWA, mengkusoken kasa kènè oda uè mendengkohken Aku, janah oda uè mengulaken perèntahKu.

¹⁴Igerra si Jonadab ngo pemparenna mengènum anggur, janah patuh ngo kalak i mi gerra-gerra idi. Sakat soh mi sidari èn sada kalak poda bai kalak i nai mengènum anggur. Tapi pukpuk ngo dak mengerana aku taba kènè, tapi laju oda uè kènè mendengkohken.

¹⁵Terrus-terrusen ngo dak pasulakken taba kènè karina nabi-nabi naposongKu, janah enggo ipernoi kalak i kènè lako pemèndèken pekilako ndènè dekket asa mentadi mengulaken jahat. Ipesèngèt kalak i ngo kènè asa ulang menembah dèbata sidèban dekket asa ulang merpenguèi taba kalak i, asa ndorok kènè tong merian i nagerri èn sienggo Kuberrèken bai ndènè dekket bai empung ndènè. Tapi oda uè kènè menuihken dekket mendengkohken Aku.

¹⁶Ukum pemparen si Jonadab tunduk ngo mi perèntah empung kalak i, tapi kènè oda uè tunduk taba Aku.

¹⁷Kumerna i, Aku, JAHOWA Pergegoh Sisotercodi, Dèbata Israel, pesempaken taba kènè — kalak Juda dekket Jerusalem — karina olpek sienggo Kutentuken taba kènè, bagè sienggo Kudokken. Kubakin bagidi kumerna oda uè kènè mendengkohken mula mengerana Aku taba kènè, janah oda uè kènè mengaloi tikan Kudiloi kènè.”

¹⁸Nai ningku mo taba horong kalak Rekhab bagèen ngo idokken JAHOWA Pergegoh Sisotercodi, Dèbata Israel, “Patuh ngo kènè taba empung ndènè si Jonadab, karina sinidokkenna enggo iuèi janah iulaken kènè.

¹⁹Kumerna i, Aku, JAHOWA Pergegoh Sisotercodi, Dèbata Israel, merjandi magahken dak mo tong lot daholi ibas pemparen si Jonadab nai mengkebasi Aku.”