Read Batak Dairi Jeremia 36 Bible Online

Jeremia 36 - Batak Dairi bible

Jeremia 36

¹I tahun pe-empatken enggo kessa si Joyakim anak si Josia gabè raja Juda, nina JAHOWA mo taba aku,

²“Buat mo sada lapihen, janah suratken mo mi sidi karina sienggo Kuranaken bamu tersèngèt Israel dekket Juda, dekket tersèngèt karina bangsa. Suratken mo karina pengeranaenKu mungkah perlebbè kalohon nai Aku mengerana bamu tikan ibas pemerèntahen Raja Josia nai soh mi sidari èn.

³Tah bakunè mentadi kalak Juda mengulaken jahat mula ibeggè kalak i tersèngèt mara sinaing Kupesempa taba kalak i. Nai kuampuni mo dosa bak kejahaten kalak i.”

⁴Kumarna i kudilo mo si Barukh anak si Neria janah membabahi tabasa karina sinidokken JAHOWA taba aku. Nai isuratken si Barukh mo karinana mi lapihen idi.

⁵Nai kupesakat mo perèntah ènda mendahisa, “Oda nèngè aku iduè memengketti Bages JAHOWA.

⁶Kumerna i, mula dapet kessa arina kalak merpuasa, kennah mo kono laus mi sidi, janah menjakaken dekket sora nggang karina sienggo kubabahken bamu, asa idengkoh kalak i karina sinidokken JAHOWA taba aku. Bakinken mo idi i bekkas kettan dikè dok atèmu kono ndorok idengkoh karina kalak silot i Bages JAHOWA, bang kalak Juda siroh i karina kuta kalak idi nai.

⁷Tah bakunè kumerna i gabè mersodip kalak i taba JAHOWA, janah tobat ibas ulah-ulah kalak i si jahat i nai. Melaga kalohon ngo JAHOWA taba kalak i-janah mengasup- kalak i.”

⁸Nai ijakaken si Barukh mo rana JAHOWA i Bages JAHOWA, bagè sikudokken bana.

⁹I bulan sibah tahun pelimaken pemerèntahen si Joyakim raja Juda, puasa mo jelma nterrem lako mengido masèh atè bai JAHOWA nai. Karina mo puasa, pengisi Jerusalem dekket kalak siroh i gennep kuta Juda nai.

¹⁰Nai ijakaken si Barukh mo ibas lapihen idi nai karinana sienggo kudokken janah karina ngo kalak i mendengkohken. Ibages JAHOWA ngo ijakaken surat idi i kantor si Gemarya, anak si Safan kerani negara. Ukum kantor idi merbekkas ngo kettan babo, i gembar pèntu lako mbengket mi Pèntu Pengkeruhen Sirimbaru i Bages JAHOWA.

¹¹Idengkoh si Mikhaya anak si Gemarya dekket kempu si Safan mo si Barukh menjakaken kata ni JAHOWA ibas lapihen idi nai.

¹²Nai laus mo ia mi istana mi kantor kerani negara. Idapet mo karina pengulu-pengulu i sidi sidang runggu. I sidi ma ngo si Delaya anak si Semaya, si Elnatan anak si Akhbor, si Gemarya anak si Safan, si Zedekia anak si Hananya, si Elisama sada kalak kerani, dekket pugabè-pugabè sidèbanna.

¹³Ibagahken si Mikhaya mo bai kalak i, karina sienggo nijakaken si Barukh i Bages JAHOWA.

¹⁴Nai ipasulak pengulu-pengulu i mo si Jehudi (imo anak si Netanya, kempu si Selemya dekket kempuntè si Kusyi) mendahi si Barukh merkitè perèntah asa roh ia janah merembah bai kalak i lapihen sienggo nijakakenna idi. Nai iembah si Barukh mo lapihen idi.

¹⁵“Kundul mo ko,” nina kalak i, “jakaken mo lapihen idi bai nami.” Iuèi si Barukh mo.

¹⁶Enggo kessa pul ia menjaka, mersitengennen mo samah kalak i merdengan ukur terendep-endep ninganna mendokken taba si Barukh, “Kennah bagahenken nami ngo ènda bai raja i.”

¹⁷Kessa i ikusoken kalak i mo, “Bagahken mo lebbè taba kami barang bakunè dalanna asa kono menuratken ènda karinana. Tah si Jeremia ngo membabahi bamu?”

¹⁸“Tuhu ngo i, karina kata sitersurat i sèn enggo ibabahi si Jeremia taba aku, janah aku mo menuratken dekket tinta ibas lapihen ènda,” nina si Barukh mengaloi.

¹⁹“Kennah ciboni kono dekket si Jeremia. Ulang lot kalak memettoh bekkas percibonien ndènè idi,” nina kalak i.

²⁰Ibaingken pengulu-pengulu i mo lapihen idi i bilik si Elisama, kerani idi, kessa i laus mo kalak i mendahi raja janah memagahken karinana tersèngèt misi.

²¹Nai ipasulak raja i mo si Jehudi mengaleng lapihen idi. Enggo kessa ibuat i bilik si Elisama nai, ijakaken si Jehudi mo taba raja dekket taba karina pengulu si cènder i sikulilingna.

²²Tikanna i tupung bulan sibah, janah raja i tekka tupung dogok-dogok i gembar ketaring perciduduenna i istanana mosim mbergoh.

²³Kessa enggo pul si Jehudi menjakaken tellu barang empat mbaris, menter mo raja i menggettap rambar lapihen idi deket raut kètèk janah mengambongken mi bagasen api. Bagidi mo ibakinken ia terrus sampè karinana lapihen idi kerri kenna tutung.

²⁴Tukasi pè si Elnatan, si Delaya, dekket si Gemarya mersembah mengidoken asa ulang itutung raja i lapihen idi, tapi oda ngo uè ia mendengkohken kalak i. Bang raja bang pè karina pengulu simemeggèken kata lapihen idi oda lot gabè mbiar barang pè peteridahken penelsellen.

²⁶Baliksa iperèntahken raja i mo taba anakna, si Jerahmeel, rebbak dekket si Seraya anak si Azriel dekket si Selemya anak si Abdeel, asa menangkup aku dekket si Barukh keraningku. Tapi iboniken JAHOWA ngo kami.

²⁷Enggo kessa itutung si Joyakim lapihen sikubabahken taba si Barukh idi, ipasulak JAHOWA mo aku,

²⁸memuat lapihen sidèban, janah menuratken karina sienggo tersurat ipas lapihen perlebbè i.

²⁹Idokken JAHOWA mo aku mendokken bagèen taba raja i, “Enggo itutung kono lapihen idi, janah kuso-kuso ngo kono mendahi si Jeremia kasa ia menuratken magahken naing roh nè mo Raja Babel janah mengelala nagerri ènda dekket memunuh pengisina rebbak dekket karina pinakan.

³⁰Kumerna i, Aku, JAHOWA, mendokken bamu, alè Raja Joyakim, sada kalak poda lot ibas pinemparmu nai memerèntah bagè raja pinempar si Daud. Ambongenken mo bangkèmu mi ruar ipadar ari tikan mahar, dekket hembun mbarngap tikan berngin.

³¹Ukum kono, pinemparmu, dekket karina pugabèmu hukumenKu mo kerna dosa-dosa siniulaken ndènè. Kupesempa mo taba kènè karina jèkat sienggo Kuasupken taba kènè, kerna bang kono bagi ma pè pengisi Jerusalem dekket Juda oda menuihken asup-asupKu.”

³²Nai kubuat nola mo lapihen rimbaru, janah kuberrèken bai si Barukh keraningku i. Nai isuratken ia mo karina sikubabahken tabasa, imo isi lapihen siperlebbè itambahi barang piga-piga nola ma tennah sidèban sibagidi.