Read Batak Dairi Jeremia 37 Bible Online

Jeremia 37 - Batak Dairi bible

Jeremia 37

¹Tikala ipetadi si Nebukadnezar raja Babel si Joyakhin anak si Joyakim, ipebangkit ia mo si Zedekia anak si Josia gabè raja Juda.

²Tapi agia si Zedekia bagi ma pè karina pugabèna dekket ginemgemna oda ngo menguèi tennah JAHOWA siniberrèkenNa tarapken aku.

³Ipasulak Raja Zedekia mo si Jukhal anak si Selemya, dekket Imam Zepanya anak si Maaseya lako mengidoken asa mersodip aku taba JAHOWA Dèbata mahan keperluen mi bangsa i.

⁴Tikanna i oda dèng ngo aku ipemasuk mi bagasen kurungen janah bèbas deng ngo merdalani i tengah-tengah jelma nterrem.

⁵Tupung ngo tenterra Babel sidang mengkubu Jerusalem, tapi tikan idengkoh kalak i enggo berkat tenterra Mesir i Mesir nai lako geraha, sondar mo kalak i.

⁶Idokken JAHOWA, Dèbata Israel mo aku

⁷mendokken bagèen taba pasulakken Raja Zedekia: “Dokken mo taba si Zedekia, ‘Tenterra Mesir simenuju mi sen bagèndari lako mengurupi kono, sondar nèngè mo kalak i janah molih.

⁸Nai balik mo roh kalak Babel janah menjuhap kuta ènda, bak menaluken janah menutung kuta èn.

⁹Aku, JAHOWA, pesèngètken kènè, asa ulang kènè mengoto-ngotoi diri ndènè merkitè dok atè ndènè ibagasen ukum kalak Babel enggo mo laus janah oda nèngè balik. Kerna pasti ngo kalak i kennah roh.

¹⁰Mula pè italuken kènè karina tenterra Babel tah pellin kalak siluka mparahna nai kessa tading i bagasen undung-undung i, bagidi nola pè kèkè ngo kalak i tong janah menutung kerri kuta èn.’ ”

¹¹Sondar ngo tenterra Babel i Jerusalem nai kerna kebbas ngo tenterra Mesir menuju kuta i.

¹²Nai kutadingken mo Jerusalem janah laus mi ladang kalak Benjamin lako menjalo perbagiin tanoh tading-tadingen bai denganku sisimpangaan nai.

¹³Tapi tikan soh kessa aku mi Pèntu Pengkeruhen Benjamin, itahan kepala tenterra simertugas i sidi mo aku janah idokken, “Naing mperrus ngo pana kono mi kettan kalak Babel!” (Kepala tenterra imo mergerar si Jeria; anak si Selemya ngo ia janah kempu si Hananya.)

¹⁴Kualoi mo, “Oda tuhu i! Oda lot mertaki aku lako mperrus gabè kettan musuh.” Tapi oda ngo uè si Jeria mendengkohken. Itangkup mo aku janah iembah menghadep karina pengulu pemerèntah.

¹⁵Melaga kalohon ngo kalak i taba aku, janah mendokken asa itendelli aku janah ikurung i bages si Jonatan, kerani kerajaen. Ia ukum bages i enggo mo ibakin gabè bekkas kurungen.

¹⁶Ipemasuk mo aku mi bagasen sada bendar i terruh tanoh, janah ndekkah ngo aku ikurung i sidi.

¹⁷Enggo kessa i ipasulak Raja Zedekia mo kalak merembah aku mengadep tabasa mi istana. I si mo ia mboni-mboni mengkusoken taba aku tah lot tennah JAHOWA. “Lot ngo” ningku mengaloi. Ninganna kudokken tambahna, “Pesakaten mo Raja i taba raja Babel.”

¹⁸Kessa i kukusoken mo, “Kadè ngo ndia salahku bai Raja i barang pè bai pengulu-pengulu Raja i barang bai jelma nterrem, asa mènter ipemasuk Raja i aku mi bagasen kurungen?

¹⁹Idikè ngo nabi-nabi Raja i simendokken ukum raja Babel oda nèngè ngo roh lako menjuhap Raja i dekket nagerri èn?

²⁰Bagèndari pè, alè Rajanami simermulia i, uè mo kènè mendengkohken pegidoenku ènda. Ulang nèngè mo itenges Raja i aku balik mi kurungen i bages si Jonatan idi, mada matè mo aku nahan i sidi.”

²¹Nai idokken Raja Zedekia mo asa ikurung aku i kasèan istana. Asa merian i sidi nola mo aku, janah gennep ari iberrèken roti i bekkas pemahanen roti nai sakat soh kerri roti taha-taha i kuta idi karina.