Read Batak Dairi Jeremia 38 Bible Online

Jeremia 38 - Batak Dairi bible

Jeremia 38

¹Idokken JAHOWA mo aku pesakatken tennah èn taba jelma nterrem, “Kuberrèken mo kuta èn taba tenterra Babel, janah italuken kalak i mo kuta èn. Barang isè merian ibas kuta èn matè mo ia ibaing geraha, barang pè kumerna kelèhèen barang kerna sakit wabba. Tapi barang isè simendarat i kuta èn nai janah pesakatken dirina taba kalak Babel, oda mo ia kenna bunuh; maluah mo kessahna.” Idengkoh si Sefaca anak si Matan, si Gedalya anak si Pasyhur, si Jukhal anak si Selemya, dekket si Pasyhur anak si Malkia ngo karina sikudokken idi.

⁴Nai laus mo pengulu-pengulu i mendahi raja janah mendokken, “Kennah ihukum matè ngo kalak èn. Kerna, merkitè ranana bagidi pebiar-biarken karina soridadu ngo ia i si dekket kalak sidèban sitadingna dèng i kuta èn. Oda ngo ia mengurupi jelma nterrem, baliksa mengagoken kalak i nola ngo.”

⁵Ialoi Raja Zedekia mo, “Selloh! Baingken kènè mo mbangsa tosè mi gerrek atè ndènè, oda tergerra aku kènè.”

⁶Nai iembah kalak i mo aku janah itontoni aku merkitè tinali mi bagasen sumur si Malkia anak raja i, simerbekkas i kasèan istana. Oda ngo lot nè laè ibagasen sumur idi, pellin kubang ngo kessa, janah letcep mo aku mi bagasen kubang i.

⁷Ipas katika i lot ngo sada kalak Sudan mengula i istana raja. Gerarna si Ebed-Melekh. Idengkoh ia mo ukum aku enggo imasukken mi bagasen sumur idi. Sinderrang tupung menguluken runggu raja i i Pèntu Pengkeruhen Benjamin,

⁸laus mo si Ebed-Melekh mi si janah mendokken taba raja i,

⁹“Alè Rajanami simermulia i, oda ngo selloh pemahan kalak i. Enggo idabuh kalak i Nabi Jeremia mi bagasen sumur; kennah matè rapar mo nahan ia i si; kerna enggo kerri pangaan i kuta èn.”

¹⁰Nai idokken raja i mo mbang si Ebed-Melekh, “Arahken mo tellu kalak dengnganmu janah pedarat mo si Jeremia i sumur idi nai sinderrang makdèng matè ia.”

¹¹Nai laus mo si Ebed-Melekh rebbak dekket sitellu kalak i mi gudang istana, janah memuat gedda-gedda malè i sidi nai, nai idurdurken mo mendahi aku merdengngan tinali mi bagasen sumur i.

¹²Idokken si Ebed-Melekh mo asa kubakin gedda-gedda i i terruh kikikku mahan lapikna asa ulang gabè ncio tinali i mi dagingku. Nai kuuèi mo bagè sinidokken si Ebed-Melekh i.

¹³Nai iruntun kalak i mo aku mi babo, mendarat i sumur idi nai. Enggo kessa i ikurung mo aku i kasèan istana idi.

¹⁴Ipas katika sidèban nola ipasulak Raja Zedekia mo kalak merembah aku menghadepsa i pèntu pengkeruhen petelluken ipas Bages JAHOWA. Nina mo taba aku, “Naing lot ngo kusonkenku bamu, janah kennah aloi mo ntangkas. Ulang lot mboni baing barang kadè pè.”

¹⁵Kualoi mo, “Mula kudokken nahan situhuna, pasti ngo iputus Raja i hukumen matè taba aku; janah mula kuberrèken peddah, oda ngo uè Raja i menguèi peddah idi.”

¹⁶Merkitè mboni-mboni merjanji mo Raja Zedekia taba aku, nina mo, “Merkitè Dèbata singgelluh i, Dèbata simemerèken kenggeluhen banta oda kubunuh kono barang pè pesakatken kono taba kalak sinaing memunuh kono,”

¹⁷Nai kudokken mo taba si Zedekia ukum JAHOWA Pergegoh Sisotercodi, Dèbata sinisembah Israel, bagèen ngo idokken, “Mula menerrah kono taba pengulu-pengulu raja Babel, oda ngo bunuhenna kono, janah kuta ènda pè oda ilekkup. Maluah mo ko dekket sisimpangaen kènè.

¹⁸Tapi mula oda ngo uè ko menerrah, ndabuh mo kuta èn mi tangan kalak Babel. Ilekkup kalak i mo karina sampè kerri, janah kono pè oda ndorok mpellut.”

¹⁹Ialoi Raja i mo, “Mbiar ngo aku mendahiken kalak bangsanta sienggo mperrus taba kalak Babel. Ulang-ulang ipesakat nola aku taba kalak i janah ipedersa-dersa.”

²⁰“Oda,” ningku mengaloi, “Oda pesakatenna Rajai taba kalak i. Mersembah merkuraja mo aku mengidoken asa iuèi Raja i mo tennah JAHOWA; sandok bèrès ngo i nahan karina, janah oda bunuhenna pella Raja i.

²¹Tapi mula oda ngo uè Raja i lako menerahken diri, enggo ngo ipeteridahken JAHOWA taba aku kadè sinaing masa.

²²Ibas alaten idi kuidah ngo karina nasa daberru silotna dèng i istana Juda ipengeruahi mi ruar ipesakat mendahi pengulu-pengulu raja Babel. Ninganna merdalan idokken kalak i mo, ‘Enggo ikilang Raja i ibaing supan-supanna sincelketna, janah ikuasai kalak i ia. Keppè bagendari, enggo kessa gebbuk nèhèna mi bagasen kubang, pesitading bana mo kalak i karina.’ ”

²³Ningku nola mo, “Karina dukak bak sinibages Rajai iembah mo mi ruar taba kalak Babel. Raja i sendiri pe oda maluah bai kalak idi nai. Itangkup raja Babel mo Raja i, janah kerri mo ilekkup kuta enda.”

²⁴Nai nina si Zedekia mo, “Ulang bagahken barang bai isè pè tersèngèt pengeranaenta ènda, asa ulang mago kessahmu.

²⁵Mula terbertik bai pengulu-pengulu enggo mengeranai aku dekket kono, bakunè pè roh ngo kalak i janah mengkusoken bamu tersèngèt pengeranaenta èn. Merjanji ngo kalak i oda memunuh kono, mula isukutken kono karinana taba kalak i.

²⁶Dokken sambing mo dak ielèk-ièlek kono aku asa ulang nèngè kudokken kono iembah balik mi kurungen janah matè i sidi.”

²⁷Kessa i oda sadikè dekkah roh mo pengulu-pengulu idi janah kuso-kuso mendahi aku. Kubagahken mo taba kalak i pas bage siniperèntahken raja baku. Merkitè bagidi oda mo ndorok kalak i memakin barang kadè pè kerna sada kalak poda lot bettoh-bettohen pengeranaen raja i dekket aku.

²⁸Tong ngo aku itahan i kasèan istana soh mi ari itaban musuh Jerusalem.