Read Batak Dairi Jeremia 39 Bible Online

Jeremia 39 - Batak Dairi bible

Jeremia 39

¹I bulan sipuluh tahun pesibahken pemerèntahen si Zedekia raja Juda, roh mo si Nebukadnezar raja Babel dekket karina tenterrana janah menjuhap Jerusalem.

²I ari sibah bulan empat tahun pesipuluhsadaken pemerèntahen Raja Zedekia, irumpakken musuh mo dingding pagar kuta i,

³janah itaban mo Jerusalem. Nai karina pengulu-pengulu raja Babel merrohen lako kundul i Pèntu Pengkeruhen Tengah. Ukum kalak i silot isidi imo si Nergal Sarezer, si Samgar Nebo, si Sarsekim huntuen rumah tangga istana, si Nergal Sarezer Rabmag dekket pakalima pakalima sidèban.

⁴Sinderrang idah Raja Zedekia dekket karina soridaduna simasa i, merusaha menuju Napa Jordan mperrus mo kalak i karina bernginkenna idi. Arap dalan pekken istana mo kalak i, ninganna ruar arap pèntu pengkeruhen sipedemmuken duana dingding pagar i bekkas i.

⁵Tapi iletlet tenterra Babel mo kalak i janah menangkup si Zedekia i lembeng Jeriko. Kessa i iembah mo ia taba Raja Nebukadnezar i kuta Ribla i ladang kalak Hamat, nai idabuh mo hukumen matè tabasa.

⁶Ibunuh ma mo dekket dukak-dukakna pè i kuta idi i lebbè matana, dekket karina pengulu pemerèntah Juda pè ibunuh.

⁷Enggo kessa i icokil mo mata si Zedekia, ninganna ilanggu janah iembah mi Babel.

⁸Ningankenna i ilekkup kalak Babel mo istana raja dekket bages jelma nterrem, janah mengerumpakken dingding pagar kuta Jerusalem.

⁹Dungna iembah si Nebukadnezar mo jelma nterrem silotna dèng tading i kuta i, rebbak dekket kalak sienggo mperrus mendahi kalak Babel mi Babel.

¹⁰Dèba ibas sinterrem i nai sincorna kalohon dekket siso lot hartana, itadingken mo i Juda ninganna iberrè pekken bak juma.

¹¹Enggo ngo ipasulak Raja Nebukadnezar si Nebuzaradan, ekuten soridaduna mendokken perèntahna bagèen,

¹²“Laus mo kènè menulusi si Jeremia, janah jamoti kènè mo ia selloh. Ulang kekadè kènè ia; ulaken kènè mo barang kadè idokken ia.”

¹³Nai ialengi si Nebuzaradan rebbak dekket sidua kalak pakalimana, si Nebusyazban dekket si Nergal Sarezer bak karina pakalima Babel sidèbanna mo aku,

¹⁴i kasèan istana nai. Nai ipesakat mo aku taba si Gedalya anak si Ahikam dekket kempu si Safan si kennah menaruhken aku balik ibagasen njuah-njuah. Nai merian mo aku i tengah-tengah jelma nterrem.

¹⁵Sinderrang ikurung dèng aku i kasèan istana, ipasulak JAHOWA ngo aku

¹⁶mendokken taba si Ebed-Melekh kalak Sudan idi magahken idokken JAHOWA Pergegoh Sisotercodi Dèbata Israel ngo bagèen, “Bagè sikudokken tikanna i, pemasaenku mo mi kuta èn jèkat, janah oda ngo kiniduma. Idahenmu ngo idi masa.

¹⁷Tapi Aku, JAHOWA ngo menjamoti kono. Oda ngo pesakaten kono taba kalak sinikebiarenmu.

¹⁸Oda ngo bunuhenna kono, kerna paluahenku ngo kono. Maluah ngo kessahmu kerna tunandè taba aku kono. Aku, JAHOWA ngo, sienggo mengerana.”