Read Batak Dairi Jeremia 4 Bible Online

Jeremia 4 - Batak Dairi bible

Jeremia 4

¹JAHOWA mendokken, “Alè bangsa Israel, mula naing ngo kè balik, balik mo kènè mendahi Aku. Ambongken kènè mo lebbèken sembahen-sembahen siKukecegoken idi, janah setia mo kènè baKu.

²Mula merbulaban kènè merkitè gerarKu janah bujur kènè dekket bennar, nai karina mo bangsa mengidoken taba Aku asa Kupasu-pasu kalak i, janah pojien kalak i mo Aku.”

³Nina JAHOWA mo taba pengisi Juda dekket Jerusalem, “ Ula kènè mo tanoh ndènè siso iula dèng; ulang saburken kènè bennih i bekkas suan-suanen merdori tubuh.

⁴Cèkèp kènè mo padan ndè taba Aku, JAHOWA ndènè, janah pepulik kènè mo diri ndènè lako baku, o kènè pengisi Juda deket Jerusalem. Mula oda, nggerger mo lagangKu janah mengelekkup bagè api siso ndorok terènteppen barang isè sambing pè. Karinana idi kennah sempa mi dirimu kerna karina pemahanmu jahat i.”

⁵Persora mo sarunè i suberri nagerri! Diloken mo tangkas janah nggang. Pasulak mo pengisi Juda dekket Jerusalem mer-berrus mi kuta kuta gotting.

⁶Tuduhken mo dalan mi Sion, uruk JAHOWA, ndor mo kè mengusi, ulang kè kom sambing. Sidang perohken jèkat ngo JAHOWA dekket kececèda mbelen kan utara nai.

⁷Codi bagè singa ka ruar ibas percibonienna nai bagi ma ngo enggo berkat pengago bangsa-bangsa siroh lako mengagoken Juda. Gabè merumpaken mo kuta-kuta Juda bekkas siso iiani dèba nèngè.

⁸Kumerna i tangis janah derru-derru mo kènè, selluk kènè mo abit goni tanda bonek. Kumerna laga JAHOWA singgerger i malot dèng surut bai Juda nai.

⁹Nina JAHOWA mo, “Tupung ari i mendellè mo nasa raja dekket pugabè-pugabèna; imam-imam pè buradan, janah nabi-nabi tersengget.”

¹⁰Nai ningku mo, “Alè JAHOWA Sintèmbul kalohon i, enggo iakkal-akkali kono kalak Juda bak pengisi Jerusalem! Idokken kono ngo lot mo damè, keppè bagèndari kessah nami pè enggo iasa dekket golok.”

¹¹Dapet nèngè mo katikana kalak Juda dekket pengisi Jerusalem dapet berita magahken enggo mengembus angin nggara kan padang gurun nai dempak kalak i. Oda ngo bagè angin biasa angin idi pellin mengkabangken apa-apa sambing,

¹²tapi angin ndor siroh merkitè perèntah JAHOWA sendiri ngo lako mendabuh hukumen taba bangsaNa.

¹³Idah mo, musuh roh bagè hembun. Kerèta-kerèta perangna bagè angin kalisungsung, kudana pè nderrasen kan manuk-manuk rajawali nai. Nong alè merjaya mo kita! Ukum èn permagonta mo keppè!

¹⁴Alè Jerusalem, patakken mo kejahaten ibas ukurmu nai asa ipaluah kono. Soh ndigan mo ndia dak pennepenmu dèng perukurenmu jahat i ibas ukurmu?

¹⁵Enggo roh utusen i kuta Dan nai, bagi ma kan delleng Efraim nai merembah berita oda selloh.

¹⁶Ipesèngèt kalak i ngo karina bangsa dekket memagahken bai pengisi Jerusalem enggo roh musuh kan nagerri sindaoh nai. Isurakken kalak i mo surak-surak geraha meradepken kuta-kuta Juda

¹⁷janah mengkubu Jerusalem bagè kalak simenjaga juma. Masa pè karinana idi kumerna enggo memberontak bangsa Juda taba JAHOWA. JAHOWA ngo enggo mengerana.

¹⁸Alè Juda, ko sendiri ngo perohken jèkat idi taba dirimu. Pernggelluhmu dekket ulah-ulahmu ngo memaingken karina kinipersah èn menurah atè-atèmu.

¹⁹Bagi mo mpiahna pengakapku, oda tahan nèngè aku menggong simpersah. Oda tellap nèngè aku petenangken diri bukbak pusuhku ibagaen tentenku, kumerna kudengkoh ngo sarunè mersora, dekket surak geraha merempet.

²⁰Pukpuk peganci jèkat merohen mengelala karina nagerri. Siso pengedeppen icèdaken kemahku, i ribak-ribak karina kaènna.

²¹Soh ndigan ngo ndia kennah kusaksiken kalak mergeraha mengaban-ngabanken kessah? Soh ndigan ngo ndia kennah kudengkohken sora sarunè menelkingi?

²²Nina JAHOWA mo, “Moto kalohon ngo bangsangKu idi, oda itandai kalak i Aku. Codi bagè anak-anak simbangal ngo kalak i cituk poda lot pengantusienna; ncardik ibas kejahaten oda tellap mengulaken selloh.”

²³Menatap ngo matangku mi tanoh èn numar ngo idahen janah ngkarsang, kutarè ngo mi langit, nong alè, oda keppè lot simercuhaya.

²⁴Kuidah delleng dekket uruk-uruk ndates, dumegger-degger kalohon.

²⁵Kutengngen oda lot jelma manuk-manuk pè enggo merkabangen karina.

²⁶Tanoh nggabur gabè kembali gurun ngkerrah, gennep kuta merumpak gerupuh, kumerna melaga kalohon JAHOWA taba bangsaNa. (

²⁷Idokken JAHOWA karina mo dunia èn gabè tanoh gurun, tapi oda ma menter isalpunken karina.)

²⁸Merhendem mo tanoh èn, langit gellap bulita. Enggo mongkam JAHOWA janah oda nèngè obahenna takiNa. Enggo ibakin keputusen janah oda sondar nèngè ia i sidi nai sinteppap pè.

²⁹Terdengkoh mèngèr soridadu merkuda bak merpanah, memaingken karina kalak mperrus mengkas-engkas. Ibengketti kalak i ngo karina rambah, delleng batu ipenangkihi. Karina kuta gabè melongo, oda lot nèngè kalak nggèut merian i sidi.

³⁰Alè Jerusalem, enggo mo itadingken ko janah oda lot kadè terdokken kono! Mahan kadè mo memakè baju mbara janah mengelagak dekket emmas bak pirak, bagi memalit mata merkitè cellak? Percuma ngo ko pemberruken dirimu, kerna oda lemmo nè atè sinikekelengenmu bamu, baliksa naing ngo buaten kalak i kessahmu.

³¹Kudengkoh ngo sora mendempik bagè daberru sinaing tubuh-tubuhen; codi bagè daberru poso dèng menubuhken dukak buka bajuna, bagidi mo tangis Jerusalem posek kessahna. Gaho-gaho ngo tanganna janah kekelsohen ia, “Cilaka mo aku — naing ngo aku ibunuh musuh!”