Read Batak Dairi Jeremia 40 Bible Online

Jeremia 40 - Batak Dairi bible

Jeremia 40

¹Mongkam nola mo JAHOWA taba aku enggo kessa ipaluah si Nebuzaradan, èkuten soridadu idi aku, i kuta Rama. Enggo ngo iembah aku mi sidi terlanggu rebbak dekket karina kalak sidèban i Jerusalem dekket Juda nai iembah sikira tabanen mi Babel.

²Idiloi èkuten soridadu idi mo jaè sadaku janah mendokken, “Enggo iasup JAHOWA Dèbatamu lako mengagoken nagerri èn.

³Bagèndari enggo ngo ipesaut simasa i, kerna enggo merdosa bangsamu janah oda merpenguèi tabasa.

⁴Bagèndari pè kutalkasi mo langgu ènda ibas tanganmu nai janah kupaluah kono. Mula uè kono, ndorok ngo kono dekket mi Babel, janah kupehèdu hèdu pè kono. Tapi mula oda ngo kono uè oda pella kadè. Bebas ngo kono i suberri nagerri èn barang mikè sambing dok atèmu.”

⁵Sinderrang mak dèng berkat, nina si Nebuzaradan mo, “Mula uè ko, ndorok ngo ko balik mendahi si Gedalya anak si Ahikam kempu si Safan, sienggo ipebangkit raja Babel gabè gubèrnur i kuta silot i Juda. Ndorok ngo kono rebbak dekketsa i tengah-tengah jelma nterrem, barang laus mikè sambing dok atèmu.” Nai iberrèken mo bekkel pangaan bak hadiah baku, janah paluahken aku laus.

⁶Laus mo aku mendahi si Gedalya i Mizpa, janah merian rebbak dekketsa i tengah-tengah jelma nterrem sitadingna dèng i nagerri Juda.

⁷Enggo ipebangkit raja Babel si Gedalya gabè gubèrnur i Juda lako mengerajai karina kalak sitadingna dèng i Juda, imo kalak sincorna kalohon. Dèba ibas pakalima dekket soridadu Juda nai siso menerrah taba Babel, mendengkoh tersèngèt perbangkit si Gedalya idi.

⁸Nai laus mo si Ismael anak si Netanya, si Johanan anak si Kareah, si Seraya anak si Tanhumet, dekket dukak-dukak si Efai i Netofa nai, bak si Jezanya i Maakha nai rebbak dekket karina orangna mendahi si Gedalya i Mizpa.

⁹Nina si Gedalya mo taba kalak i, “Oda perlu kènè mbiar lako menerrah taba kalak Babel. Merian sambing mo kènè i nagerrinta ènda, janah uè mo kènè gabè hamba raja Babel. Kujamin oda mermara kènè.

¹⁰Iani kènè mo kuta paina sambing katè ndènè, janah pepulung kènè mo anggur, buah dekket minak zaitun. Aku pè merian i Mizpa ngo janah gancih jelma nterrem menghadeppi mula roh kessa kalak Babel mi sèn.”

¹¹Sintorna bagidi karina kalak Israel simerian i nagerri Moab, Amon, Edom, dekket sini nagerri sidèban, mendengkoh ukum raja Babel enggo ngo iduè dèba kalak Israel merian i Juda, janah enggo ngo ipebangkit raja i si Gedalya gabè gubèrnur.

¹²Kumerna i ipentadingken kalak i mo bekkasna ipesompar-baèrken, lako balik mi Judea. Roh mo kalak i mendapetken si Gedalya i Mizpa, janah pepulungken mbuè kalohon anggur bak buah.

¹³Enggo kessa bagi, roh mo si Johanan dekket nasa pakalima siso menerrah taba musuh, mendahi si Gedalya i Mizpa janah mendokken,

¹⁴“Ibettoh kono ma ngo ukum si Baalis raja Amon enggo pasulakken si Ismael memunuh kono?” Tapi oda ngo tok si Gedalya mi rana kalak idi.

¹⁵Nai mboni-mboni idokken si Johanan mo mbang si Gedalya, “Dolien mo aku laus memunuh si Ismael, sakalak poda lot nahan bettohen i barang isè sipandè ulah. Kasa nola mo ia kennah belliin memunuh kono? Ai memaingken mèrap nola ngo nahan karina kalak Juda sienggo mertumpu i sèn rebbak dekket kono, janah mengagoken karina jelma nterem silotna dèng tading i juda ngo nahan simasa i.”

¹⁶Tapi ialoi si Gedalya mo, “Ulang! Ukum sinidokkenmu tersèngèt si Ismael idi oda ngo tuhuna idi!”