Read Batak Dairi Jeremia 41 Bible Online

Jeremia 41 - Batak Dairi bible

Jeremia 41

¹I bulan pitu tahunkenna i laus mo si Ismael anak si Netanya kempu si Elisama rebbak dekket dengnganna sipuluh kalak mi Mizpa lako pejumpa dekket si Gedalya. (Ismael imo sada kalak pinempar raja, sakalak pakalima ndates kerajaen.) Sinderrangna rebbak mangan kalak i,

²isintak si Ismael bak dengnganna sisipuluh kalak i mo golokna janah memunuh si Gedalya, gubèrnur sinipebangkit kalak Babel i.

³Ibunuh si Ismael dèng ma ngo karina kalak Juda silot rebbak dekket si Gedalya i Mizpa, dekket karina tenterra Babel si tupung lot i sidi.

⁴Sibarembenkenna, sinderrang mak dèng ibettoh dèba terbunuh si Gedalya,

⁵lot mo roh ualuhpuluh kalak i Sikhem, Silo dekket Samaria nai. Enggo igonting kalak i janggutna, mengeribaki olesna, janah mengerariki daging kalak i. Iembah kalak i ngo pagè dekket kemènjen mahan pèlèenken i Bages JAHOWA.

⁶Nai karuar mo si Ismael i Mizpa nai lako menimbaki kalak i. Ninganna tangis, nina mo, “Ita kènè mo laus menengen si Gedalya.”

⁷Gejapkenna i enggo kessa soh kalak i mi tengah-tengah kuta, mènter ibunuhi si Ismael dekket orang-orangna idi mo kalak i. Tapi sipuluh ibas kalak idi nai mendokken taba si Ismael, “Ulang mo bunuh kami! Lot dèng ngo dua bagè nai pagè nami, bagi bang minak zaitun, dekket tenggoli. Kuboniken kami ngo karina i i ruar kuta èn.” Kumerna i oda mo ibunuh si Ismael kalak i, tapi sidèbankenna i ibunuh ngo janah iambongken bangkè kalak i mi bagasen sumur.

⁹Ia sumur idi imo sumur mbellen sinibahan Raja Asa tikanna ijuhap si Baesa raja Israel ia.

¹⁰Kessa i itangkup si Ismael mo nasa berru raja dekket karina kalak silotna dèng i Mizpa sienggo isohken si Nebuzaradan mi penjamotiin si Gedalya. Itaban si Ismael mo kalak i nai berkat mo dekket kalak i menuju nagerri Amon.

¹¹Idengkoh si Johanan anak si Kareah dekket karina pakalima sirebbak dekketsa mo tersèngèt kejahaten si Ismael.

¹²Nai laus mo kalak i rasken dekket anak buah kalak i mengeletletsa, janah menjupasa i bendar mbellen Gibeon.

¹³Mengidah si Johanan dekket pakalima-pakalima idi roh, lolo kalohon mo sinitaban si Ismael,

¹⁴nai merbalik janah lojang mendapetken nuhnuhen si Johanan.

¹⁵Tapi mpellut ngo si Ismael dekket ualuh anak buahna, janah mperrus mi nagerri Amon.

¹⁶Kessa i ipepulung si Johanan dekket pakalimana mo nasa soridadu, daberru, anak-anak, dekket nasa pugabè istana sinitaban si Ismael enggo kessa ibunuh si Gedalya.

¹⁷Mbiar mo kalak i karina midah kalak Babel, kumerna enggo ibunuh si Ismael si Gedalya sinipebangkit raja Babel gabè gubèrnur i nagerri idi. Nai, mperrus mo kalak i mi Mesir. I tengah ndalan, mentadi mo kalak i i Kimham i gembar Betlehem.