Read Batak Dairi Jeremia 42 Bible Online

Jeremia 42 - Batak Dairi bible

Jeremia 42

¹Enggo kessa bagi roh mo karina kalak, simbelgah singkèdèk, rebbak dekket karina pakalima, termasuk si Johanan anak si Kareah dekket si Azarya anak si Hosaya mendahi aku janah mendokken,

²“O Pa, bagè siniidah ndènè sendiri, nterrem ngo bilangen nami buari, keppè bagèndari tading cituk nai ngo. Kupido kami mendahi kènè alè Pa asa uè kènè menodipken kami mendahi JAHOWA Dèbata sinisembah ndènè i. Sodipken kènè mo kami sitadingna ènda dèng,

³asa ituduhken JAHOWA Dèbata bai nami barang dempak dikè ngo kami kennah laus janah barang kadè ngo kennah ulaenken nami.”

⁴Kualoi mo, “Selloh mo mula bagi. Kuuèi pè pengidoen ndènè idi. Mersodip pè aku taba JAHOWA Dèbatanta, janah barang bakunè nola pè pengaloiNa, kubagahken pè karinana; situk poda kurusiaken taba kènè.”

⁵Nina kalak i mo taba aku, “Kupidoken kami mersodip mo Bapa mendahiken JAHOWA Dèbatanta, kerna naing tunduk ngo kami tabasa, asa mendè rejeki nami. Asa selloh barang oda selloh tennah JAHOWA i, sandok uèn nami ngo. JAHOWA mo gabè saksi bujur janah setia bai nami, mula mak kuuèi kami karina perèntah siniberèken JAHOWA taba kami merkitèken kènè Partuanami.”

⁷Sipuluh ari nai nola mengerana mo JAHOWA mendahi aku.

⁸Nai kudilo mo si Johanan bak pakalima pakalimana dekket karina kalak sidèban siroh rebbak dekketsa.

⁹Ningku mo taba kalak i, “Ipasulak kènè ngo aku lako pesakatken pengidoen ndènè taba JAHOWA, Dèbata Israel. En pè dahkè, bagèen mo pendokken JAHOWA,

¹⁰‘Mula uè ngo kènè tong hot merian i nagerri èn, kuteggu mo kènè, oda kudabuhken; pecènderenku mo kènè, oda kurumpakken. Bonek kalohon ngo ukurku kerna enggo kupesempa mara taba kènè.

¹¹Ulang nèngè mo pella mbiar kènè midah raja Babel idi. I tengah-tengah ndènè pè aku lako mengurupi kènè janah paluahken kènè ipas kuasana nai.

¹²Kerna mermasèh atè ngo Aku taba kènè, baingenku mo raja Babel mermasèh atè taba kènè janah padiatken kènè balik. Aku, JAHOWA ngo, sienggo mengerana.’ ”

¹³Tapi ukum kènè sitadingna dèng i Juda ulang mo mengalo-ngalo bai JAHOWA Dèbata ndènè janah ulang lot mendokken, “Oda uè kami merian i nagerri ènda. Naing ngo kami laus mi Mesir janah merian i nagerri idi. Ukum i sadènang oda nèngè mo akapen nami geraha, oda nè ma mo dengkohen nami sora sarunè menenggoi lako mergeraha, janah oda nè ma mo kelèhèen kami.” Mula dak ijuljulken kènè ngo lako laus mi Mesir janah merian i sidi, bagèen ngo tennah JAHOWA Pergegoh Sisotercodi, Dèbata Israel, bai ndènè:

¹⁶“Geraha dekket kelèhèen sinikebiaren ndènè idi, mengeletlet kènè soh mi Mesir, janah mermatèen mo kènè i nagerri i.

¹⁷Karina kalak simenjuljulken kennah laus mi Mesir janah merian i sidi kennah matè ibas geraha, barang matè kumerna kelèhèen barang sakit wabba. Sada kalak poda mpellut ipas mara sikupesempa taba kalak i; karinana kennah matè.

¹⁸Bakunè kin Aku, JAHOWA Dèbata Israel menghempasken lagangku dekket gerrah-atèngKu taba pengisi Jerusalem, bagi ma mo kennah hempasenkenku gerrah atèngku taba kènè si laus mi Mesir. Bejogiten mo kalak mengidah kènè; ilèai mo kènè, janah ibaing mo gerar ndènè gabè sumpah. Oda nèngè mo idahen ndènè lebbuh ndènè ènda.”

¹⁹Nai ningku nola dèng ma, “Enggo idokken JAHOWA asa kènè sitadingna dèng i Juda ulang mo laus mi Mesir. Kerna i kupesèngèt mo kènè bagèndari

²⁰magahken enggo ibakinken kènè sada kesalahen mbellen. Ipido kènè ngo asa mersodip aku taba JAHOWA Dèbatanta mahan keperluen bai ndènè, janah merjandi ngo kènè lako mengulaken karina sinidokken JAHOWA.

²¹Bagèndari pè enggo kubagahken tennah JAHOWA Dèbatanta bai ndènè, tapi oda uè kènè menguèi tennah idi.

²²Kumerna i, èngèt mo: I nagerri sinaing dahien ndènè i, mermatèen mo kènè ibas pergerahaen, barang pè kumerna kèlèhèen barang ibaing sakit wabba.”