Read Batak Dairi Jeremia 43 Bible Online

Jeremia 43 - Batak Dairi bible

Jeremia 43

¹Enggo ngo kupesakat karina tennah, JAHOWA Dèbata Israel, si kennah kusohken bai jelma nterrem.

²Nai idokken si Azarya anak si Hosaya dekket si Johanan anak si Kareah deket karina kalak sidèban sintunggang i mo taba aku, “Luap ngo ko. Oda tuhuna JAHOWA Dèbata nami mendokken kono lako menggerra kami lako laus merian i Mesir.

³Si Barukh anak si Neria i ngo mengajar-ngajari kono lako menoal kami, asa ikuasai kalak Babel kami dekket asa ndorok ibunuh barang merembah kami mi Babel.”

⁴Bang si Johanan bang pè karina pakalima dekket jelma nterrem oda uè menguèi perèntah JAHOWA lako merian i Juda.

⁵Ibabai si Johanan deket karina pakalima i mo mi Mesir karina kalak silotna dèng i Juda, bagi ma karina kalak sienggo balik i nagerri sidèban nai i bekkas kalak idi mèrap i nai.

⁶Anak laki, daberru, anak-anak, dekket berru raja sinisohken si Nebuzaradan mi penjamotiin si Gedalya, termasuk aku dekket si Barukh, karinana iembah mi Mesir.

⁷Ialo kalak i ngo perèntah JAHOWA, janah laus mi Mesir sanga soh daohna mi kuta Tahpanhes.

⁸I sidi nina JAHOWA mo mbang aku,

⁹“Buat mo batu-batu mbellen, janah tanem mo i tanoh i lebbè pèntu lako mbengket mi Bages pemèrentah i kuta i. Usahaken mo asa karina kalak Juda mengidah kono memahanken idi.

¹⁰Nai dokken mo taba kalak i ukum Aku, JAHOWA Pergegoh Sisotercodi, Dèbata Israel naing pasulakkenku mo naposongKu si Nebukadnezar raja Babel, mi bekkas idi. Janah i babo batu-batu sinitanemmu ibas tanoh idi, ipajek mo tahtana ninganna pekimbangken undung-undung kerajaenna.

¹¹Roh nè mo si Nebukadnezar janah menaluken Mesir. Janah karina kalak sienggo itentuken kin lako matè kerna sakit wabba matè mo ibaing sakit wabba. Kalak sienggo itentuken kin ibantun mahan tabanen ibantun ma mo gabè tabanen, janah sinitentuken matè ibas pergerahaen matè ma mo ibas geraha.

¹²Lakatenku mo api i sapo sembahen kalak Mesir, janah ilelekkup raja Babel mo gana-gana sembahen sini sidi barang ibantun mi nagerrina. Codi bagè sada kalak permakan mengagoi tuma ibas geddana nai, bagi ma mo raja Babel menapu mbersih kalak Mesir nai berkat mo laus oda lot isè pang mengambatisa.

¹³Tugu-tugu sembahen i Heliopolis i Mesir, kennah irumpakken janah, bages sembahen kalak Mesir kennah ilekkup kerri.”