Read Batak Dairi Jeremia 44 Bible Online

Jeremia 44 - Batak Dairi bible

Jeremia 44

¹Mongkam nola mo JAHOWA taba aku, tersèngèt karina kalak Israel simerian i Mesir, imo sinikuta Migdol, Tahpanhes, Memfis, dekket i aur selatan.

²Bagèen mo tennah JAHOWA Pergegoh Sisotercodi, Dèbata Israel, taba kalak i, “Enggo ngo isaksiken kènè sendiri mara sikupesempa taba Jerusalem dekket karina kuta sidèban sini Juda. Sakat soh mi bagèndari tong dèng ngo kuta idi mercèdaen oda lot isè mengiani.

³Masa pè bagidi kumerna merdosa ngo pengisina, gabè memaingken Aku melaga. Ipèlèken kalak i ngo pèlèen janah mersembah taba dèbata siso nung dèng kin i sembah kalak i sendiri, isembah kènè barang empung ndènè.

⁴Dak ngo pukpuk kupasulak mendahi kènè naposongKu nabi-nabi, simenggerra kalak i mengulaken kejahaten siKukecegoken idi.

⁵Tapi laju ngo oda uè kènè mendengkohken janah oda nggèut menuihken. Oda uè kènè mentadi mengulaken jahat, imo memèlèken pèlèen taba dèbata sidèban.

⁶Kumerna i mo asa Kuempasken lagangku bak pungurKu taba kuta silot i Juda dekket dalan-dalan sini Jerusalem. Karinana Kulekkup dungna gabè puntung-puntung bak dakkir nai ngo bagè sindoroh idahen ndènè bagèndari èn.

⁷Janah bagèndari Aku, JAHOWA Pergegoh Sisotercodi, Dèbata Israel, mengkusoken kasa mo kènè mengulaken simemaing perohken jekat mbellen i mi diri ndènè. Mada ngo naing iripasken kènè karina jelma — anak laki, daberru, anak-anak dekket anak mbara asa ulang nèngè giam lot tading i bangsa ndènè nai?

⁸Kasa mo ulanken ndènè ulah-ulah simemaingken Aku melaga? Roh ngo kènè janah merian i Mesir, nagerri siso nitandaen ndènè i, nai isembah kènè mo gana-gana janah memèlèken pèlèen taba sembah-sembahen sini nagerri idi! Mada ngo naing mengago diri ndènè asa ilèai karina bangsa sini dunia èn kènè janah ibaing gerar ndènè gabè sumbiah?

⁹Mènter enggo mo ndia lupa kènè tersèngèt karina kejahaten i tanoh Juda dekket i karina dalan silot i kuta Jerusalem siniulaken empung-empung ndènè, raja Juda dekket nasa perukat kalak i, bang kènè dekket karina perukat ndènè?

¹⁰Tapi soh sidari èn oda lot kènè pecerrepken diri ndènè. Oda ipersangapi kènè Aku janah oda nggelluh merpengelako rembang mi patiin siKuberrèkan taba kènè dekket taba empung ndènè.

¹¹Kumerna i, Aku, JAHOWA Pergegoh Sisotercodi, Dèbata Israel kennah mengalo kènè janah mengkeriken karina Juda.

¹²Janah mula lot bai kalak Juda sitadingna i nai dèng tong sèkel laus mi Mesir lako merian i sidi, kennah binasa ngo kalak i karina. Karina kalak i, simbelgah barang kedèk matè mo i Mesir kerna geraha barang kerna kelèhèen. Bejogiten mo kalak menengen kalak i janah ilèai mo kalak i. Gerar kalak i pè ibaing mo penggerarenken sumbiah.

¹³Bakunè kin Aku menghukum Jerusalem, bagidi ma mo aku menghukum kalak i simerian i Mesir. Matè mo kalak i ibas geraha, kumerna lèhè barang ibuat sakit wabba.

¹⁴Sada kalak poda maluah barang pè nggelluh ipas kalak Juda sitadingna sienggo laus mi Mesir lako merbekkas i sidi. Sada nèngè poda kalak i balik mi Juda, tukasi pè idi iketedohken kalak i. Tuhu-tuhu, oda lot nèngè balik laènken barang piga-piga kalak pengusi.”

¹⁵Nai merrohen mo nterrem kalohon kalak mendahi aku, imo karina anak laki simemettoh enggo memèlèken pèlèen taba dèbata sidèban sinibagesna, dekket karina daberru si cènder i sidi, bagi dekket kalak Israel simerian i Patros, kettan selatan Mesir. Nina kalak i mo mbang aku,

¹⁶“Oda uè kami mendengkohken barang kadè sinidokkenmu bai nami merkitè gerar JAHOWA.

¹⁷Karina sienggo kujandiken kami, kennah ngo ulaenken nami tong. Kennah tong ngo kami memèlèken pèlèen taba Raja Daberru Sorga, janah mengorèken laè anggur sikira pèlèen bana bagè kecemmalen sinibakin i karina kuta silot i Juda dekket i karina dalan silot i Jerusalem sinibaingken empung nami, raja-raja, dekket karina pugabè pemerèntah nami dekket kami sendiri. Tikala i cukup ngo pangaan nami, nduma ngo kami, janah oda lot kesusahen kadè pè bainami.

¹⁸Tapi kessanai mentadi kami memèlèken pèlèen bai Raja Daberru Sorga, janah oda nèngè mengorèken anggur pèlèen tabasa, karinana ngo gabè kurang bai nami; mermatèen ngo dengngan nami i pergerahaen barang pè kerna kelèhèen.”

¹⁹Kessa i nina daberru-daberru idi mo, “Setuju ngo sinibalènami mula kubahan kami pè roti bagè rupa Raja Daberru Sorga dekket menutung pèlèen bang memèlèken anggur taba sembahen nami idi.”

²⁰Mendahi karina anak laki dekket daberru simendokken bagidi, ningku mo,

²¹“Tah dok atè ndènè ngo oda ibettoh JAHOWA barang pè enggo ilupaken karina pèlèen sinipèlèken i karina kuta Juda dekket dalan silot i Jerusalem, sinibakin empung ndènè, raja-raja dekket simerpangkat, bang jelma nterrem sini nagerri èn dekket kènè sendiri?

²²Oda nèngè tahan JAHOWA menengen kènè memèlèken pèlèen taba dèbata sidèban. Jahat janah merlèa ngo pemakin ndènè idi. Enggo merdosa kènè taba JAHOWA janah oda nè tunduk taba perèntahNa. Kerna i bagèndari pè enggo mo melencoh nagerri ndènè gabè mak nèngè ndorok terianen, janah ipenggerarken dèba gabè gerar sumbiah. Ngerri pengakap kalak simengidahsa.”

²⁴Nai kubagahken mo bai kalak i karina, tuana mendahiken daberru-daberru, magahken bagèen ngo idokken JAHOWA taba karina kalak Juda simerian i Mesir, “Ukum kènè dekket karina sinibages ndènè enggo ngo merpadan taba Raja Daberru Sorga magahken tutungen ndènè ngo pèlèen dekket memèlèken laè anggur tabasa. Enggo ngo ipahèi kènè padan ndènè idi. Mula bagi ngo keppè, selloh! Bahanken kè sambing mo kadè sienggo ijandiken kènè kin!

²⁶Tapi bagèndari pè dengkohken kènè mo kadè sikudokken bai ndènè, alè kènè kalak Israel si lot i Mesir: Aku, JAHOWA, mersumpah merkitè gerarKu sitermurmur i magahken oda nè kupadiat kènè menggegoli gerarKu lako memakin sada perpadanen. Oda ndorok nèngè dokonen ndènè, ‘Kusumpahken mo merkitè Dèbata Singgelluh i!’

²⁷Dak baingenku mo bakunè asa cilaka kènè janah oda ndorok sennang ukur ndènè, soh matè kènè karina, bang ipas geraha barang pè kumerna ibuat sakit wabba.

²⁸Pellin barang piga-piga kalak sambing ngo kessa maluah janah balik mi Juda i Mesir nai. Nai karina kalak Juda silot i Mesir mengidah tah rana kalak i ngo tuhu saut barang ranangKu.

²⁹Bakinenku mo roh taba kènè mara i bekkas ènda lako memaingken tanda betti taba kènè magahken tuhu-tuhu kennah masa hukumen sinaing bakinenku taba kènè.

³⁰Ukum si Hofra raja Mesir kennah Kusohken taba musuh sinaing memunuhsa, tosè bagè penohkenku si Zedekia raja Juda taba si Nebukadnezar raja Babel, alona sinaing memunuhsa idi.”