Read Batak Dairi Jeremia 46 Bible Online

Jeremia 46 - Batak Dairi bible

Jeremia 46

¹Itersèngèti JAHOWA mo taba aku tersèngèt bangsa-bangsa,

²mungkah tersèngèt Mesir nai. Ibagahken ia ngo taba aku tersèngèt tenterra Nekho raja Mesir, sinitaluken si Nebukadnezar raja Babel i Karkemis i gembar Laè Efrat i tahun pe-empatken tikki pemerèntahen si Joyakim, raja Juda. Enda ngo idokken JAHOWA tersèngèt misi,

³“Isurakken pakalima-pakalima Mesir ngo nggang kalohon taba soridaduna asa merjaga-jaga, ‘Tajemmi mo kujur! Ipakkè mo baju bessi dekket tangkuluk baja! Ijemmak mo tambeng-tambeng janah mbengket mo karina merbaris! Kènè soridadu simerkuda, pelanoi mo kuda ndènè! Pasang kènè mo kuda ndènè, juhap mo mergeraha!’

⁵Tapi Aku, JAHOWA, mengidah kalak i sondar kerna buradan. Italuken ngo soridadu-soridadu kalak i, janah mperrus barat-burut oda nèngè pang tumulih mi podi.

⁶Si liskatna pè oda nè tellap merberrus, janah simergegohna pè oda mpellut i musuh nai. Terdengdeng ngo kalak i janah tergempang i utara, i biding Laè Efrat idi.

⁷Isè ngo ia merginja bagè Laè Nil, bagè laè simengeremrem karina bidingna? Imo nagerri Mesir. Nina ngo, ‘Kèkè mo aku janah mengerajai tanoh èn. Kubinasaken mo kuta kuta bak pengisina.

⁹Merpatcu mo kè, alè nasa kuda! Merdalan mo, alè karina kurèta! Kebbas mo, alè perbabang simerembah tambeng-tambeng i Sudan dekket Libia nai. Bagi ma kènè, alè karina sipandè memanah i nagerri Lidia nai.’ ”

¹⁰Tapi aku, si Jeremia mendokken èn mo ari JAHOWA Pergegoh Sisotercodi janah Sintèmbul i; i ari i mo ia memalesken karina pemakin musuh-musuhNa. PeddangNa mo kipangan kalak i soh bessur, dekket mengènum daroh kalak i soh pulak. I ari èn isèati JAHOWA Pergegoh Sisotercodi i ngo, pèlèenNa i utara, i biding Laè Efrat idi.

¹¹Alè kènè pengisi Mesir, laus mo kènè mi Gilead lako menulusi tambar! Tapi, tukasi nola pè bagidi oda lot tambar sindorok pemalumken kènè.

¹²Enggo ibettoh bangsa-bangsa ulah-ulah ndènè sipemaluken i. Enggo idengkoh suberri dunia èn sora derko-derko ndènè. Mersijemba bana ngo soridadu sisada mi sidèbanna; rebbakken geppah mo kalak i mi tanoh.

¹³Tikan roh si Nebukadnezar raja Babel menjuhap Mesir, mongkam mo JAHOWA taba aku, nina mo,

¹⁴“Alè Jeremia tingtingken mo berita ènda i karina kuta silot i Mesir, imo i kuta Memfis, Migdol dekket Tahpanhes, ‘Kebbas mo kènè lako mempertahanken diri ndènè kerna karina silot bai ndènè idi naing isudahi tikan geraha!

¹⁵Kasa mo ndia Apis, dèbata ndènè simergegoh idi gabè mperrus? Kerna enggo italuken JAHOWA ia!’

¹⁶Mèduk ngo soridadu ndènè terdengdeng janah tergempang. Nina kalak i ngo samahsa, ‘Ita kè balik mendahi bangsanta asa ndorok kita maluah i babah golok musuhta nai.’

¹⁷Sibaingken mo gerar rembaru bai raja Mesir: ‘Simèngèr sipaluahken kesempaten.’

¹⁸Aku ngo Dèbata singgelluh, Aku ngo raja, JAHOWA Pergegoh Sisotercodi. Bagè Delleng Tabor mencuat i tengah-tengah delleng, dekket Delleng Karmel i babo laut, bagidi mo kegegohenna roh menjuhap kono.

¹⁹Mer kebas-kebas mo kènè pengisi Mesir, lako itaban janah iembah laus! Kennah gabè empak-empak mo kuta Memfis gabè — bekkas melongo kerna oda nè lot simengiani.

²⁰Codi bagè anak lemmbu nggomok ngo Mesir, tapi ilolah naleng mbellen i utara nai.

²¹Baliksa soridadu soridadu siniupahenna pè oda mergoldè bagè anak lembu nggomoksu. Oda terbaing kalak i mertahan. Karinana merbalik janah mperrus asa maluah. Enggo dapet katika ari perhukumen taba kalak i; enggo tikkina kalak i iserpai permaraen.

²²Mperrus ngo kalak Mesir ninganna mendurisik bagè nipè kerna enggo muat njolmitna soridadu musuh. Ijuhap ngo kalak i merkitè beliung bagè kalak simenabah kayu

²³deket mengerabi rambah talintua siso terbellus. Oda terbilangen buè tenterra musuh, buèn dèng daripada balang. Aku, JAHOWA ngo mendokken i.

²⁴Termèla mo kubaing pengisi Mesir, kerna italuken bangsa i utara nai. Aku, JAHOWA ngo, simendokken i.”

²⁵JAHOWA Pergegoh Sisotercodi, Dèbata Israel, mendokken, “Hukumenku mo Amon, dèbata kan Tebe nai, rebbak dekket karina kalak Mesir bagi dekket debatana bak raja-raja kalak i. Raja Mesir dekket karina kalak simengasangken ia

²⁶kusohken mo taba si Nebukadnezar raja Babel rasken soridaduna sinaing memunuh kalak i. Tapi i podi ari, balik nola mo terianen Mesir bagè sienggona. Aku, JAHOWA ngo, sienggo mendokken i.”

²⁷“Alè bangsangKu, Israel, ulang kènè mbiar! Alè naposongKu si Jakob, ulang kono ringgodoren! Paluahenku ngo kènè dekket pinempar ndènè i nagerri sindaoh nai, bekkas ndènè i taban. Balik nè mo kènè janah merian i nagerri ndènè ibagasen mènak. Sennang mo kènè nggelluh; oda lot nèngè sikebiaren ndènè

²⁸Asa ulang kènè mbiar, alè kènè bangsangKu, roh mo Aku lako paluahken kènè. Ukum bangsa-bangsa, bekkas ndènè Kupemèrap, kusalpuni mo i karina, tapi ukum kènè oda ngo bagidi Kubaing. Tuhu oda ngo maluah kènè ipas hukum nai tapi nteger ngo hukum sikubaing taba kènè rembang mi hatoren. Aku, JAHOWA ngo, sienggo mendokken i.”